ەرتە سونگەن جارىق جۇلدىز، اكادەميالىق تەاتردىڭ ءارتىسى مارقۇم شالقار ۇركىمبايەۆتىڭ وتباسى دالادا قالماق. م.اۋەزوۆ اتىنداعى اكادەميالىق دراما تەاترىنىڭ باسشىسى مارقۇمنىڭ وتباسىن قىزمەتتىك  جاتاقحانادان قۋىپ جاتىر. ال اياداي عانا بولمەدە تۇرىپ جاتقان كوپ بالالى انا كىمنەن اراشا سۇراتىن بىلمەي دال، دەپ حابارلايدى الماتى تەلەارناسى.

تالانتتى اكتەر  شالقار ۇركىمبايەۆ 29 جاسىندا بەلىگىسىز جاعدايدا كوز جۇمدى. اكتەردىڭ  3-قاباتتاعى گريم بولمەسىنىڭ بالكونىنان سەكىرىپ كەتكەندىگى، نە بىرەۋدىڭ قاساقانا يتەرگەنى بەلگىسىز. شالقار كورەرمەننىڭ سۇيىكتى اكتەرى بولعان ەدى دەپ ەسكە الادى ونىڭ قاسىندا بولعان ارىپتەستەرى. جاس ءارتىستىڭ قايتىس بولعانىنا بەس جىلدان بەرى ۋاقىت وتكەنمەن، ونىڭ ارتىندا قالعان جانۇياسى تەاترعا تيەسىلى جاتاقحانادا تۇرىپ جاتىر.

«2012 جىلدان باستاپ جاڭاعى تەاتردىڭ باسشىسى ءۇي العانشا وسى جاتاقحانادا تۇرا بەرىڭدەر دەگەن. قالاي باسشى اۋىستى، 2016 جىلى، سولاي مەنى وسى جاتاقحانانى بوسات دەپ قۋدالاپ جاتىر. مەنىڭ ءقازىر ءتورت بالام بار. كوپ بالالى انامىن»، - دەدى مارقۇمنىڭ ايەلى وكسانا ۇركىمبايەۆا.

تەاتر باسشىسى جاستاي جەسىر قالعان وكسانانىڭ اياداي بولمەنى بوساتۋىن تالاپ ەتىپ، سوتقا بەرگەن. وسى ايدا ەكى سوت وتىرىسى وتكەن. جالعىزباستى انا سوتتا قۇقىعىمدى قورعايتىن ادۆوكات جالداۋعا دا جاعدايىم  بولعان جوق دەيدى. ءتورت بالامەن دالادا قاڭعىپ جۇرگەننەن قاراعاندا تار بولمەدە تۇرا تۇرسام دەگەن جاس انانىڭ ارمانى جەلگە ۇشقالى تۇر.

«پاناسىز قالىپ، بالانى ءوزى قاراپ، اسىراۋشىسىز قالعان وعان وتە قيىن. نەگىزىندە تەاتر ءۇيىن بەرىپ، سودان كەيىن بارىپ قانا جاڭاعى بولمەنى الۋى كەرەك. ەگەر ونى بوسات دەسە ءۇش بالامەن قايدا بارادى؟  تەاتر وعان مىندەتتى. ويتكەنى جۇمىس ورنىدا جۇبايى قايتىس بولدى»، - دەدى ق ر ەڭبەك سىڭىرگەن ءارتىسى  قانات قۇدايبەرگەنوۆ.

جالپى جامبىل مەن بايزاقوۆ كوشەلەرىنىڭ قيىلىسىنداعى بۇل جاتاقحانا ءاۋ باستا تەاترعا تيەسىلى بولعانمەن، بولمەلەردىڭ كوبى جەكەلەنىپ كەتكەن.  ءبىراق ۇركىمبايەۆتار وتباسى بولسا كەزىندە ءۇي كەزەگىنە تۇرىپ، پاتەر الامىز دەگەن ۇمىتپەن جەكەشەلەندىرۋگە اسىقپاعان. ال مۇحتار اۋەزوۆ تەاترىنىڭ ديرەكتورى تەاتردىڭ قازىرگى ارتىستەرى دە تۇرۋ كەرەك دەيدى.

«ءوزىمىزدىڭ قىزمەتكەرلەر، ۇيسىز-كۇيسىز جۇرگەن جاستار، وتباسىلارى بار. سولار ەندى ەستيدى عوي، بىلەدى. مەن ەستىدىم، ول باسقا كۇيەۋگە ءتيىپ كەتكەن، ودان بالا تاپقان دەپ. سول كەزدە مەن ويلادىم، ول ەندى شالقاردىڭ وتباسى ەمەس»، - دەدى م.اۋەزوۆ اتىنداعى اكادەميالىق دراما تەاترىنىڭ ديرەكتورى ەرلان ءبىلالوۆ.

قوڭىر داۋىسىمەن پوەزيالىق تۋىنىدىلاردى ورىنداپ، ستۋدەنت كەزىنىڭ وزىندە-اق شەكسپيردىڭ «رومەو دجۋلەتتاسىنداعى» باستى ءرولدى سومداعان اكتەردىڭ ءومىرى روەمونىڭ تاعدىر سەكىلدى قايعىلى اياقتالدى. ال ونىڭ ارتىندا قالعان وتباسى 13 شارشى مەتر تار ۇيدە تاعدىرلارىن قالاي بولاتىنىن كۇتىپ وتىر. سوت ۇكىمى تەاردىڭ پايداسىنا شەشىلسە، ءتورت بالالى جاس انا ءۇش مىڭ ادامنان كەيىنگى  پاتەر كەزەگى كەلگەنشە كوشىپ-قونىپ جۇرە تۇرماق.