وتكەن جۇما كۇنى قازاقستان رەسپۋبليكاسى پرەمەر-مينيسترىنىڭ ورىنباسارى – اۋىل شارۋاشىلىعى مينءيسترى اسقار مىرزاحمەتوۆ باستاعان قازاقستان دەلەگاسياسىنىڭ جۇڭگو حالىق رەسپۋبليكاسىنداعى قحر ساپانى قاداعالاۋ، ينسپەكسيا جانە كارانتين جونىندەگى باس باسقارماسىنىڭ ءتوراعاسى چجي شۋپينمەن العاشقى كەزدەسۋى بولىپ ءوتتى، دەپ جازدى egemen.kz ۇكىمەتتىڭ باسپا ءسوز قىزمەتىنە سىلتەمە جاساپ.
كەزدەسۋ بارىسىندا تاراپتار قازاقستاننىڭ اۋىل شارۋاشىلىعى ونىمدەرىنىڭ جۇڭگو نارىعىنا كىرۋى مەن شەكتەۋلەردى جويۋ ماسەلەلەرىنىڭ ءبىرقاتارىن تالقىلادى. اتاپ ايتقاندا، جۇڭگو تاراپى قحر-دىڭ جەتكىزۋشى كومپانيالار تىزىلىمىنە ەنگىزۋ ءۇشىن بيىل ساۋىردە قوي ەتى ءوندىرىسىنىڭ جۇيەسىن جانە ەت وڭدەۋشى كاسىپورىنداردى تەكسەرەتىنىن راستادى. ەكى جاق تا قازاقستاننان قىتايعا ەكسپورتتالاتىن 34 ونىمگە قاتىستى ۆەتەرينارلىق جانە فيتوسانيتارلىق تالاپتار حاتتامالارى جوبالارىن كەلىسىمدەۋ ۇدەرىسىن جىلدامداتاتىن بولدى.
سونداي-اق، قازاقستان تاراپى ەل اۋماعىندا اۋىل شارۋاشىلىعى ونىمدەرىنىڭ ساپاسى مەن قاۋىپسىزدىگىن باقىلاۋعا ارنالعان بىرىككەن زەرتحانا قۇرۋ جانە ونى تىركەۋ باستاماسىن كوتەردى. ايتا كەتەيىك، كەزدەسۋ قورىتىندىسى بويىنشا كورشىلەس ەلگە ەكسپورتتالاتىن بيداي كەبەگى پارتيالارىنا قويىلاتىن تەكسەرىس، كارانتين جانە سانيتارلىق تالاپتار تۋرالى حاتتاماعا قول قويىلدى. اتالعان كەلىسىمنىڭ ارقاسىندا قازاقستاندىق بيزنەسمەندەر تۇڭعىش رەت جۇڭگو نارىعىنا بيداي كەبەگىن ەكسپورتتاۋ مۇمكىندىگىنە يە بولادى جانە دە بۇل ءۇردىسءتى العاشقىلاردىڭ ءبىرى بولىپ جۇزەگە اسىرۋ مۇمكىندىگى «Huoerguosi Irbis International Trading Co LTD» كومپانياسىنىڭ ۇلەسىنە ءتيىپ وتىر.
ءوز كەزەگىندە، كومپانيانىڭ باس ديرەكتورى مارات داۋلەتقالييەۆ وسىنداي ءتيىمدى شەشىمدەردىڭ استىق ەكسپورتىنا سەرپىن بەرەتىنىن اتاي وتىرىپ، سىندارلى كەلىسىم ءۇشىن كاسىپكەرلەر اتىنان قازاقستان ۇكىمەتىنە العىس ءبىلدىردى.
