الماتى وبلىسى قاراساي اۋدانىنداعى تۇرعىن ۇيلەردىڭ بىرىنەن 11ء-شى سىنىپتا وقيتىن قىزدىڭ ءولى دەنەسى تابىلدى، دەپ حابارلايدى 31 ارنا.

 قاسكويدىڭ جەكە تۇلعاسىن انىقتاعان ءتارتىپ ساقشىلارى 35 جاستاعى كۇدىكتىنى ۇستادى. ايۋاندىق ارەكەتتىڭ قۇربانى بولعان ورىمدەي جاس قىزدىڭ قانداي جاعدايدا كوز جۇمعانىن كورشىلەرى دە، جاقىن ماڭداعىلار دا بىلمەگەن. بۇعان دەيىن قايتىس بولعان قىز بەن كۇدىكتى تۋىس بولۋى مۇمكىن دەگەن اقپارات تاراعان.

ءدال الماتى ىرگەسىندەگى «اسىل ارمان» كەشەنىنەن مازا قاشقان. 19ء-ۇيدىڭ الدىندا قاپتاعان پوليسەي. ەكى كۇن بۇرىن التىنشى قاباتتاعى پاتەرلەردىڭ بىرىنەن جاس قىزدىڭ ءولى دەنەسى تابىلعان. جاقىندارى مەن ءوز ومىرلەرى ءۇشىن الاڭداعان تۇرعىندار سۇمدىق وقيعادان كەيىن سەسكەنىپ قالعان. مۇنداعى تۇرعىنداردىڭ باسىم بولىگى پاتەردى جالداپ تۇرادى. قايعىلى جاعداي ورىن العان پاتەردىڭ يەلەرى دە جالداپ تۇرعان ەكەن. «اسىل ارمان» تك تۇرعىندارىنىڭ ايتۋىنشا، قابىرعا جۇقا، ءبىراق سول كۇنى ەشكىم ەشتەڭە ەستىمەگەن.

كۋاگەرلەردىڭ ايتۋىنشا، بۇل پاتەردە كىمدەردىڭ تۇراتىنىن، قايتىس بولعان قىزدىڭ كىم ەكەنىن ەشكىم بىلمەيدى. الدىن الا اقپارات بويىنشا 2000 جىلى تۋعان قىز تۋىستارىنا كوكتەمگى دەمالىسقا كەلگەن. 

جەرگىلىكتى تۇرعىن، 1982 جىلعى ازامات ادام ولىمىنە قاتىسى بار دەگەن كۇدىكپەن ۇستالدى. ءقازىر ول قاراساي اۋداندىق ىشكى ىستەر باسقارماسىنا جەتكىزىلىپ، تەرگەۋ امالدارى جالعاستىرىلۋدا.  

قاماۋعا الىنعان كۇدىكتىنىڭ زورلاۋ دەرەگىنە قاتىسى بار جوعىن انىقتايتىن قوسىمشا ساراپتامالار دا تاعايىندالعان. ناقتىلانباعان اقپارات بويىنشا قىز ءوز جەزدەسىنىڭ قولىنان قازا بولۋى مۇمكىن.