بۇگىنگى زامان اقپاراتتىق زامان ەكەنىن ەشكىم جوققا شىعارمايدى. كورشى ءۇي تۇگىلى، التى قۇرلىقتىڭ ارعى بەتىندەگى ءقازىر بولىپ جاتقان وقيعانى ءقازىر ءبىلىپ، ەستىپ، كورىپ وتىرمىز. بۇل قازاق ەلىنىڭ اقپاراتتىق دامۋ جاعىنان الەمدىك كوشتە العاشقى ەلدەردىڭ ءبىرى ەكەنىنىڭ ايقىن كورىنىسى. ءتىپتى، بۇل كوشتەن قازاقستاننان تىسقارى جەرلەردە تۇراتىن قازاقتاردا قالىس قالعان ەمەس. سولاردىڭ ىشىندە ينتەرنەت سايتتارى جاقسى دامىعانى – قىتايداعى قانداستارىمىز.
ولاردىڭ ءار ءتۇرلى باعىتتا ەل يگىلىگىنە ارنالعان 50-گە جۋىق سايتى اقىن، اعارتۋشى، قوعام قايراتكەرى قازاقتىڭ قاسقا ماڭداي ازاماتى احمەت بايتۇرسىنوۆ قالىپتاستىرىپ كەتكەن توتە جازۋ ۇلگىسىمەن جارىق كورىپ كەلەدى. بۇل سايتتاردىڭ ادرەسىن ءار جەردەن جەكە-جەكە ىزدەمەي-اق، مىنا kz321.com- سىلتەمەنى باسىپ قالساڭىز، ايتىپ وتىرعان اڭگىمەمىزدىڭ اقيقاتىنا كوز جەتكىزەسىز. ءار سايتتىڭ توپتاستىرىلعان ءاتى-جونىن انىق كورۋگە بولادى. كەز-كەلگەن بىرەۋىن باسىپ قالساڭىز سول سايتتىڭ وقىرمانى بولدىم دەپ ەسەپتەي بەرىڭىز.
جوعارىدا اتاپ وتكەنىمىزدەي ءار سايت ءار ءتۇرلى باعىتقا ارنالعان. سونىڭ ىشىندە «senkazakh.com» سايتىنىڭ ورىنى ەرەكشە! جالپى، شەتتەگى قازاق ءتىلدى سايتتار تۋرالى سۇراساڭىز ەل اۋزىنا بىردەن وسى سايت ىلىنەدى. ولاي دەيتىنىمىز وسى سايت ارقىلى ارعى بەتتەگى قانداستارىمىز اتاجۇرتىنداعى قىبىر ەتكەن قۇبىلىستىڭ بارلىعىنان قۇلاعدار بولىپ كەلەدى. ال، بىزدە وسى اقپارات كوزى ارقىلى سول جاقتاعى قانداستارىمىزدىڭ تۇرمىس-تىرشىلىگىنەن، كۇندەلىكتى ومىرىنەن حاباردار الىپ وتىراتىنىمىز جاسىرىن ەمەس. ءتىپتى، قانداستارىمىز عانا ەمەس، قىتايدىڭ ىشىندە بولىپ جاتقان كەيبىر ماڭىزدى اقپاراتتاردى دا وسى سايت ارقىلى ەستىپ، ءبىلىپ جاتامىز.
«Senkazakh.com» سايتى - قازاقستان مەن جۇڭگو قازاقتارى اراسىنداعى اقپارات كوپىرى بولعالى ءبىراز جىل بولىپ قالدى. سوڭعى جىلدارى بۇل سايت ەكى ەل اراسىنداعى اقپارات كوپىرى عانا ەمەس، الەمدەگى قازاقتاردىڭ عالامتورداعى ەڭ ۇلكەن رۋحاني ورداسىنا اينالدى دەسەك ارتىق ايتقاندىق بولماس. بۇلاي ايتۋداعى سەبەبىمىز – سايت تەك توتە جازۋمەن عانا شەكتەلمەي، كيريلليسا نۇسقادا دا وقىرماندارىن جاڭالىقتارىمەن بولىسە الاتىندىعى. وسىدان بىرەر جىل بۇرىن اتالمىش سايت پروگرامماسىنا توتە-كيريلدى سايكەستىرەتىن قابىلەت قوسىپ، جاڭالىق اشىپ، الەم قازاقتارىنىڭ جازۋ ۇقساماستىعىنان ءبولىنىپ قالعان اقپارات كەڭىستىگىن تۇتاستىرىپ، تەك جۇڭگو عانا ەمەس، قازاقستان، رەسەي، قىرعىزستان، وزبەكستان، مونعوليا، تۇركياداعى قانداستارىمىزدىڭ بىر-بىرىمەن رۋحاني توعىسۋ الاڭىن قالىپتاستىردى. بۇل سايتتىڭ ەلىمىزدەن تىسقارى جەردە ءومىر ءسۇرىپ جاتقان قانداستارىمىزدى تامىرى ءبىر ۇلتتىق قۇندىلىقتارىن بولىسۋگە، الماستىرۋعا قوسىپ جاتقان ولشەۋسىز ەڭبەگى دەپ باعالاساق ارتىق بولماس.
وسىلاي «Senkazakh.com» سايتى ارقىلى ءار ەلدەگى قانداستار بىر-بىرىمەن جۇزدەرى توعىسپاسا دا، جۇرەكتەرى، تىلەكتەرى توعىسىپ جاتىر. بۇگىنگى مالىمەتتەرگە سۇيەنسەك، سايتقا ءبىر كۇندە 2 مىڭعا جۋىق اقپارات، ماقالا سالىنسا، قارالىمى جاعىنان كۇندىك كورسەتكىشى 100 مىڭنان اسىپ جىعىلادى ەكەن. ال قازىرگە دەيىن قازاق مادەنيەتىنىڭ ءار قىرىنان سىر شەرتەتىن، اقپاراتتىق تانىمدىق مالىمەتتەر 2 ميلليونعا جەتسە، تۇراقتى تىركەلۋشىلەرى 60 مىڭ ادامنان اسقان.
سايت جۇڭگو ەلىندە بولعاندىقتان وزگە ەلدەگى قىتايتانۋشى اۋەسقويلارعا تاپتىرماس اقپارات كوزى بولىپ تۇرعانى ايتپاساق تا تۇسىنىكتى. الايدا، وسىنداي اۋىر جۇكتى ارقالاپ كەلە جاتقان «Senkazakh.com» سايتى سوڭعى كەزدەرى، ناقتىراق ايتسا، تامىزدىڭ ورتاسىنان بۇگىنگە دەيىن بىردە اشىلىپ، بىردە مۇلدەم اشىلماي كەلەدى.
وسىعان بايلانىستى الەۋمەتتىك جەلىلەر ارقىلى سايت جەتەكشىسى اقىتبەك شەريزاتۇلىمەن سويلەسكەن ەدىك. ءقازىر تەحنيكالىق سەبەپتەرگە بايلانىستى سايتتىڭ توقتاپ تۇرعانىن ايتتى. سونىمەن قاتار سايتتىڭ تاعدىرى جابىلىپ قالۋ قاۋپىندە تۇرعانىن دا جاسىرمادى. بۇگىنگە دەيىن بۇل اقپارات كوزى ەڭبەكقور ۇجىم مۇشەلەرى مەن ءبىر قاتار ۇلت جاندى ازاماتتاردىڭ كومەگىمەن كۇن كورىپ كەلەدى ەكەن. ارينە، ءبىر سايتتى وسىنداي دەڭگەيگە جەتكىزۋ، ۇستاپ وتىرۋ قانشاما قارجىنى تالاپ ەتەتىنى ايتپاساق تا تۇسىنىكتى.
ەگەر، قىتايداعى قانداستارىمىزدىڭ باستى اقپارات كوزىنە اينالعان «Senkazakh.com» سايتى ءومىر ءسۇرۋىن توقتاتاتىن بولسا، ونسىز دا ءتىلى شۇبارلانىپ بارا جاتقان ونداعى ۇرپاقتاردىڭ ءتىلى دە بىرگە جوعالارى ءسوزسىز. بۇل سايت ەكى ەل اراسىنداعى اقپارات كوپىرى عانا ەمەس، سول جاقتاعى قانداستارىمىزدىڭ تىلدىك قورىنىڭ دا التىن باستاۋى ەكەنىن ەستەن شىعارماعانىمىز ابزال.
ءيا، «Senkazakh.com» سايتى ءدال ءقازىر وندىرىستىك بايلانىستان اجىراپ تۇر. مۇمكىن، ەكونوميكالىق قيىنشىلىق، مۇمكىن، بەلگىسىز قوعامدىق قىسىم سالدارىنان، نەمەسە باسقالاي سەبەپتەرگە بايلانىستى ەسىگىن جاۋىپ تاستاعان بولار. الايدا، ونداعى الاش اماناتىنا قيانات جاسامايتىن باتىر باۋىرلارىمىز اتالمىش اقپارات كوزىنىڭ ەسىگىن قايتادان ايقارا اشادى دەگەن سەنىمدەمىز.
ءبىز «كورشىسى اتقا ءمىنىپ، بايگەگە شاپسا، ۇيدە وتىرىپ، تاقىمىن قىساتىن» قازاقتىڭ بالاسىمىز. شەتتەگى ءبىر قازاق بالاسى جەتىستىككە جەتسە، ءبىزدىڭ دە مەرەيىمىز تاسىپ، ابىرويىمىز اسىپ جاتادى. كەرىسىنشە، كەلەڭسىز وقيعالاردى ەستىگەندە كوڭىلىمىز ءپاس تارتىپ قالادى. مىنە، الەم قازاقتارى اراسىنداعى اقپاراتتىڭ التىن كوپىرىنە اينالعان «Senkazakh.com» سايتىنىڭ باسىنا «قاۋىپ ءتونىپ تۇر» دەگەندى ەستىگەندە جابىرقاپ قالعانىمىز شىندىق. بۇل سايتتى الىستاعى اعايىندارىمىز اشسا دا، قازاق تىلىندە، قازاقتىڭ وركەنيەتىنە ەڭبەك ەتىپ جاتقانى ءۇشىن قازاق ءباسپاسوزىنىڭ ءبىر بۇتاعى دەپ ەسەپتەيىك اعايىن. ال بۇتاقتى سىندىرىپ الۋ ءار ءبىر قازاق ازاماتىنا سىن...
مۇرات الماسبەك ۇلى
