20 عاسىردىڭ باسىندا ارحەولوگتار پومپەيدەگى ۆۋلكاننىڭ قالدىقتارىنىڭ استىنان ءبىر-بىرىنىڭ قۇشاعىندا جاتقان ەكى دەنەنى تاۋىپ العان. ءبىراز جىلدار بويى بۇلاردى ايەل ادامدار دەپ تانىپ كەلگەن، الايدا عالىمدار بىرنەشە ۋاقىت بۇرىن تابىلعان دەنەلەردىڭ جىنىسىن انىقتاۋ ماقساتىندا سۇيەكتەرى مەن تىستەرىنە كەڭنەن زەرتتەۋ جۇمىستارىن جۇرگىزە باستادى، دەپ حابارلايدى "قامشى" اقپاراتتىق اگەنتتىگى شەتەلدىك باق-قا سىلتەمە جاساپ.

ستەفانو ۆاناكورا ەسىمدى عالىم باستاعان ءبىر توپ زەرتتەۋشىلەردىڭ اشقان جاڭالىقتارى بۇعان دەيىن ايتىلعان پىكىرلەردىڭ ءبارىن جوققا شىعاردى، «ەكى ايەل» ەكى ەر ادام بولىپ شىقتى.

«پومپەيلىكتەر تاڭ قالدىرۋدان جالىقپايدى. وسى ۋاقىتقا دەيىن بۇلاردى ەكى ايەل ادام دەپ ويلاپ كەلگەنبىز. الايدا، كومپيۋتەرلىك توموگرافيا مەن دنق ساراپتاماسى بۇل ەكەۋىنىڭ ەر ادام ەكەندىگىن دالەلدەدى. مالىمەتتەرگە سايكەس، ەكى ەر ادامنىڭ جاس مولشەرى 18-20 شاماسىندا. بۇلاردىڭ دەنەسى ءبىرى ەكىنشىسىنىڭ كەۋدە تۇسىنا باسىن قويىپ جاتقان كۇيىندە تابىلدى»، - دەپ حابارلادى ارحەولوگيالىق زەرتتەۋلەردىڭ جەتەكشىسى ماسسيمو وساننا.

سونىمەن قاتار، عالىمداردىڭ ويىنشا، ەكى ەر ادام ءبىر-بىرىنىڭ سۇيگەن ادامدارى بولۋى ابدەن مۇمكىن. دەگەنمەن، مۇنى 100 پايىز قۇپتاي المايدى. تەك، ءبىر عانا ناقتى دالەل – ەكەۋى بىر-بىرىمەن تۋىستاس بولماعان، باۋىرلار دا ەمەس، اكە مەن بالا دا ەمەس.

ۆەزۋۆيي ۆۋلكانىنىڭ اتقىلاۋى ءبىزدىڭ زامانىمىزدىڭ 79 جىلىندا تامىز ايىندا بولعان. سونىڭ سالدارىنان پومپەي، گەركۋلانۋم، ستابيي اتتى ءۇش قالا مەن بىرنەشە كىشىگىرىم اۋىل تۇرعىندارى قازا تاپقان. پومپەي قالاسىنداعى 20 مىڭ تۇرعىننىڭ ەكى مىڭعا جۋىعى كوز جۇمعان بولاتىن.  كوپتەگەن باسقا تۇرعىندار بۇل اپاتقا دەيىن قالانى تاستاپ كەتكەن، ال قازا تاپقانداردىڭ دەنەسى قالا سىرتىندا كومىلىپ قالىپ قويعان. سول سەبەپتى دە، كوز جۇمعان ادامداردىڭ ناقتى سانىن شىعارۋ مۇمكىن ەمەس.

اۋدارعان: نازەركە لابيحان