گەرمانيا الەۋمەتتىك جەلىدە وشپەندىلىك پەن ازعىندىقتى ناسيحاتتايتىن جازبالارعا شەكتەۋ قويدى. ەندى ەلدە بۇل ماسەلە زاڭمەن رەتتەلمەك.  جاڭا قۇجات بويىنشا الەۋمەتتىك جەلى تىيىم سالىنعان كونتەنتتى دەر كەزىندە الىپ تاستاماسا، وعان ءىرى كولەمدە ايىپپۇل سالىنادى.  گەرمانيا ۇكىمەتى وسىعان قاتىستى ارنايى زاڭ قابىلدادى،-دەپ حابارلايدى قامشى اقپارتاتتىق اگەنتتىگى khabar.kz تەلەارناسىنا سىتەمە جاساي وتىرىپ. 

ەل ۇكىمەتى بۇعان دەيىن دە Facebook، Twitter، YouTube سياقتى سايت قولدانۋشىلارىن جونگە كەلۋگە شاقىرعانىمەن، ناتيجە بولمادى. ەندى حالىق اراسىندا ىرىتكى تاستاپ، ارانداتۋ ماقساتىندا جازىلعان ءاربىر كونتەنت ءۇشىن  جاۋاپ بەرەدى.  وسىنداي ۇلتارالىق شيەلەنىس پەن وشپەندىلىك تۋدىراتىن جازبالار جەلىگە سالىنعان جاعدايدا 24 ساعاتتىڭ ىشىندە الىنىپ تاستالۋى ءتيىس. ەندى جاڭا زاڭ بويىنشا جەلىنىڭ گەرمانياداعى وكىلدىگىنە 5 ملن ەۆرو، ال كومپانيانىڭ وزىنە 50 ملن ەۆروعا دەيىن ايىپپۇل سالىنباق.  گەرمانيا حالقىنىڭ جاڭا زاڭعا دەگەن پىكىرى ەكىگە جارىلدى. ماسەلەن، وسى ەلدىڭ جۋرناليستەر وداعى مەن ءبىرقاتار ساياساتكەرلەر جاڭا زاڭدى جاپپاي سىنعا الدى. ولار بۇل ءسوز بوستاندىعىن شەكتەۋ دەپ سانايدى.  ال تۇرعىنداردىڭ دەنى الەۋمەتتىك جەلىدە تالاپتىڭ قاتايتىلۋىنا قولداۋ ءبىلدىرىپ جاتىر.  الەۋمەتتىك جەلىنى باقىلاۋ مۇنىمەن شەكتەلمەيدى. سونىمەن قوسا جەلىگە جالعان اقپارات سالۋعا دا تىيىم سالىندى. العاش بولىپ، Facebook زاڭ اياسىنان شىقپايتىندىعىن مالىمدەدى.  كومپانيا مالىمەتتى تەكسەرەتىن مەكەمەلەرمەن دە بىرىگىپ جۇمىس ىستەۋگە دايىن. تەحنولوگياسىن دا وسىعان ورايلاستىرادى. 

اۆتورلارى: شولپان نايمانبايەۆا، ميلوسلاۆ لاۆرينوۆسكيي