37 جاستاعى حالىقارالىق دەڭگەيدەگى فەرعانا وبلىسى ريشتان اۋدانىنىڭ تۋماسى شەرزود مادامينوۆ ەسىمدى اسپازشى 1 ءساۋىر كۇنى «قابىلداۋ بولىمىنە» كەلىپ بيلىك تۇلعالارى وتىراتىن جەردەن جۇمىس بەرۋىن سۇراپ كەلگەن بولاتىن. اسپازشىنىڭ ايتۋىنشا، وبلىس اكىمى شۋحرات عانييەۆ ونى جۇرتتىڭ كوزىنشە ساقال وسىرگەنى ءۇشىن ايىپتاپ، كۇلكى قىلعان، دەپ حابارلايدى centralasian.org. مالىمەتتىڭ قازاقشا نۇسقاسىن «قامشى» اقپاراتتىق اگەنتتىگى وقىرمان نازارىنا ۇسىنادى.

شەرزود مادامينوۆ بىرنەشە جىلدار بويى رەسەيدىڭ ءتۇرلى مەيرامحانالارىندا جۇمىس ىستەپ، ءوزىنىڭ اسپازدىق ونەرىن دامىتقان. سونىمەن قاتار رف پرەزيدەنتى ۆلاديمير ءپۋتيننىڭ قاتىسۋىمەن وتكەن ءتۇرلى رەسمي ءىس-شارالارعا اس ازىرلەگەن. الايدا، وزبەكستانعا ورالعاننان سوڭ جۇمىسسىز قالىپ وتىر.

«1 ءساۋىر كۇنى «قابىلداي بولمەسىنە» بارعانىمدا ريشتان اۋدانىنداعى ءدامحانالارعا شاقىرتۋ الدىم. دەگەنمەن، مەن بيلىك وكىلدەرىنىڭ اس ۇيىنەن جۇمىس تاپقىم كەلىپ ەدى»، - دەيدى شەرزود مادامينوۆ.

ونىڭ ايتۋىنشا، «حالىقتى قابىلداۋ بولمەسىنىڭ» وكىلى وعان نەسيە الىپ، جەكە كاسىبىن اشۋعا كەڭەس بەرىپتى.

«مەن قاتتى قۋانىپ كەتتىم. الايدا، كەنەتتەن فەرعانا وبلىسىنىڭ اكىمى شۋحرات عانييەۆ ورنىنان تۇرىپ كەلدى دە، مەنىڭ قاسىما جاقىنداپ كەلىپ: «مىناۋ نە؟» دەپ سۇرادى. مەنىڭ ساقالىم جايلى سۇراپ جاتقاندىعىن بىردەن اڭعاردىم دا، «بۇل – ەسپانانولكا» دەپ جاۋاپ بەردىم. مەنەن ەكىنشى قايتارا سۇراعانىندا، قايتادان سولاي جاۋاپ بەردىم. سوسىن ول جۇرتتىق كوزىنشە ماعان: «ساقالدارىڭدا قىرىپ، ءبىز سەكىلدى دۇرىستالىپ، ادام سياقتى بولىپ كەلگەننەن سوڭ نەسيە الاسىڭدار» دەپ ايتتى. قاتتى اشۋلانىپ كەتتىم دە، سىرتقا شىقتىم»، - دەپ مالىمدەدى شەرزود مادامينوۆ.

اسپازشىنىڭ ايتۋىنشا، وبلىس اكىمىنىڭ سوزدەرىنەن كەيىن ءوزىنىڭ تۋعان اۋدانى ريشتان تۇرعىندارى ونى مازاقتاي باستاعان.

«مەن بارعان كۇنى قابىلداۋ بولىمىندە ادامدار كوپ بولاتىن. ەندى ادامدار مەنى كورگەن كەزدە بەتىمە قاراپ كۇلەدى دە، «ءالى كۇنگە دەيىن دەنى دۇرىس ادام بولماعانسىز با؟» دەپ ايتادى. مەن وبلىس اكىمىنىڭ ۇستىنەن سوتقا ارىز جازباق بولىپ ەدىم، الايدا وعان قارسى شىققىسى كەلەتىن بىردە-بىر ادۆوكات تابا المادىم. مەن الەمنىڭ كوپ جەرلەرىندە جۇمىس ىستەگەنمىن، الايدا ەشبىر جەردە مەنى ءدال بۇلاي قورلاعان ەمەس»، - دەپ شاعىمداندى شەرزود مادامينوۆ.

اۋدارعان: نازەركە لابيحان