قازاقستاننىڭ قارۋلى كۇشتەرىندە اسكەري-مەديسينالىق مەكەمەلەر، تۇرلەر، اسكەر تەكتەرى جانە وڭىرلىك قولباسشىلىقتاردىڭ مەديسينا قىزمەتتەرىنىڭ وكىلدەرىمەن جيىن ءوتتى.

بۇل تۋرالى قامشى اقپارات اگەنتتىگى  ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

مەديسينالىق ماماندار الداعى 5 جىلعا قازاقستان قارۋلى كۇشتەرى اسكەري-مەديسينالىق قىزمەتىنىڭ پەرسپەكتيۆاسى مەن دامىتۋ جولدارىن تالقىلاپ، سونداي-اق، قول جەتكىزىلگەن جەتىستىكتەر مەن وڭ ناتيجەلەردى، سونىمەن قاتار، شەشۋدى قاجەت ەتەتىن ماسەلەلەردى بەلگىلەپ، 2016 جىل جانە 2017 جىلدىڭ ءبىرىنشى توقسانى بويىنشا جۇمىستى قورىتىندىلادى. جيىنعا قاتىسۋ ءۇشىن ق ر دەنساۋلىق ساقتاۋ مينيسترلىگى، ۇلتتىق ۇلان، ق ر ءىىم توتەنشە جاعدايلار جونىندەگى كوميتەتى، ق ر ۇقك شەكارا قىزمەتى مەديسينالىق قىزمەتتەرىنىڭ وكىلدەرى شاقىرىلدى. بۇگىندە ق ر قك اسكەرلەرىن مەديسينالىق قامتاماسىز ەتۋ جۇيەسى اسكەري بولىمدەردىڭ مەديسينالىق بولىمشەلەرى، اسكەري ەمدەۋ مەكەمەلەرىنىڭ جەلىسى، ق ر قم ورتالىق اسكەري-دارىگەرلىك كوميسسيانى، مەديسينالىق مۇلىك پەن تەحنيكانى ساقتاۋ قويمالارى، سانيتارلىق-ەپيدەميولوگيالىق مەكەمەلەردى، سونداي-اق، مەديسينالىق پەرسونالدى، ونىڭ ىشىندە، تاكتيكالىق بۋىندى وقىتۋ جانە بىلىكتىلىكتى ارتتىرۋمەن اينالىساتىن مەكەمەلەردى قامتيدى.

قارۋلى كۇشتەردەگى اسكەري مەديسينا سالاسى جىلدان جىلعا ساپالى جاڭا دەڭگەيگە كوتەرىلىپ كەلەدى. اسكەري دارىگەرلەر زاماناۋي الەمدىك مەديسينامەن ىلگەرى قادام باسىپ كەلەدى. ولار ەمدەۋدىڭ جاڭا تەحنولوگيالارى مەن ادىستەمەلەرىن زەردەلەيدى، ونى جوعارى الەمدىك ستاندارتتارعا ساي كەلەتىن مەديسينالىق جابدىقتى قولدانا وتىرىپ، ءىس جۇزىندە قولدانادى. بارلىق ەمدەۋ مەكەمەلەرىندە ءارتۇرلى اۋرۋ-سىرقاۋلار كەزىندەگى تەكسەرۋ الگوريتمدەرى ازىرلەندى. بۇل ناقتى دياگنوز قويۋدى جەدەلدەتەدى جانە باستاپقى كەزەڭدەردە كۇردەلى اۋرۋ-سىرقاۋلاردى دياگنوستيكادان وتكىزۋگە، بارابار ەم جۇرگىزۋگە جانە دۇرىس ساراپتامالىق شەشىم قابىلداۋعا مۇمكىندىك بەرەدى.