ەلىمىزدە ەڭ تومەنگى ءومىر ءسۇرۋ دەڭگەيى - 17 مىڭ 439 تەڭگەگە جەتتى. داعدارىس جايلاپ، قىمباتشىلىق شارىقتاعان ۋاقىتتا بۇل قارجىعا ءبىر اي قالاي ءومىر سۇرۋگە بولادى؟

"ماردىمسىز اقشاعا ازىق-تۇلىك تە كەلمەيدى" دەپ دابىل قاققان قوعام وكىلدەرى، جاڭا ۇكىمەتكە ءوز تالاپتارىن قويىپ وتىر. ولاردىڭ ايتۋىنشا، "بۇل كورسەتكىش كەم دەگەندە 3 ەسە ارتىق بولۋى ءتيىس". سەرىك احمەتوۆ ۇكىمەت باسىنا كەلە سالىسىمەن، "وسى جىلى ورتاشا جالاقى 11،7 پايىزعا ءوسىپ، 98 مىڭ تەڭگەگە جەتتى" دەگەنى بار. الايدا، قازىرگى ەڭ تومەنگى ءومىر ءسۇرۋ كورسەتكىشى ءار ازاماتقا شاققاندا 17 مىڭ 439 تەڭگەدەن كەلگەندىكتەن، قوعام وكىلدەرىنىڭ ۇكىمەت باسشىسىنا دەگەن ايتار نازى باسقا. ق ر پارلامەنت ءماجىلىسىنىڭ دەپۋتاتى جامبىل احمەتبەكوۆ "شىقپا جانىم شىقپامەن" وتىرۋعا بولادى. سۋ ءىشىپ، شاي الماي، نان الىپ، ەت جەمەي. وندا 17 مىڭ تەڭگە جەتىپ قالاتىن شىعار"، - دەيدى. وتكەن جىلى پرەزيدەنتتىكە ۇمىتكەر اتانعان جامبىل احمەتبەكوۆ، سول كەزدە ەڭ تومەنگى كۇنكورىس دەڭگەيى 200 مىڭ تەڭگەنى قۇراۋى ءتيىس دەپ، كوپشىلىكتىڭ كوكەيىندەگىسىن ءدوپ باسقانى ەدى. ءالى دە وسى بايلامىن بەرىك ۇستانعان ول، "ەۋروپادا حالىق قانشا تۇتىنادى، سونى تولىق ەسەپتەيدى. ءبىز قۇزىرلى مينسترلىككە ساۋال جىبەردىك، تەك قاراستىرىپ جاتىرمىز دەگەن جاۋاپ قانا كەلەدى" دەيدى.

"امان-ساۋلىق" قوعامدىق قورىنىڭ پرەزيدەنتى باقىت تۇمەنوۆا دا بىزدەگى ەڭ تومەنگى ءومىر ءسۇرۋ كورسەتكىشىنە كۇن كورۋ مۇمكىن ەمەس دەگەن پىكىردە. ونىڭ ويىنشا، بۇل كورسەتكىشتى ەڭ كەمىندە ءۇش ەسەگە ارتتىرۋ قاجەت.

ول دامىعان ەلدەردە كۇنكورىس دەڭگەيى كورسەتكىشىنىڭ 30 پايىزى ازىق-تۇلىككە، قالعانى وزگە قاجەتتىلىكتەرگە جۇمسالاتىنىن العا تارتادى. "ءبىزدىڭ ەلىمىزدە 60 پايىزدى قۇرايدى. بۇل دۇرىس ەمەس" دەيدى قوعامدىق قور وكىلى. ەندى ساناپ كورەلىك. حالىقتىڭ كۇندەلىكتى تۇتىناتىن ازىق-تۇلىگىنىڭ ءبىرى ناننىڭ ورتاشا باعاسى - 60، ءسۇت - 225، ماي - 140 تەڭگە تۇرادى. بارلىعى 425 تەڭگەنى قۇرايدى. ونى 30 كۇنگە كوبەيتسەك، 12750 تەڭگەگە جەتەدى. ال، كوممۋنالدىق تولەم مەن وزگە دە قاجەتتىلىكتەردى ايتپاعاننىڭ وزىندە، ادامنىڭ ۇنەمى اڭسارى اۋىپ تۇراتىن جەمىس-جيدەكتى تۇسىڭىزدە كورەسىز. ۇكىمەت بەلگىلەگەن مەجەمەن الەۋمەتتىڭ تۇرمىس دەڭگەيى سايكەس كەلمەسە، قازىرگى بيلىككە ۇلكەن سىن دەيدى قوعام وكىلدەرى.