استانادا جانە رەسپۋبليكانىڭ شەكارالاس وبلىستارىندا «ەكسپو 2017» حالىقارالىق مامانداندىرىلعان كورمەسىن وتكىزۋ قارساڭىندا قۇقىقتىق ءتارتىپ پەن قوعامدىق قاۋىپسىزدىك دەڭگەيىن ارتتىرۋعا، كريمينوگەندىك احۋالدى تۇراقتاندىرۋعا باعىتتالعان پروفيلاكتيكالىق پىسىقتاۋ شارالارى جۇرگىزىلۋدە،-دەپ حابارلايدى قامشى اقپاراتتىق اگەنتتىگى astana.gov.kz-كە سىلتەمە بەرە وتىرىپ. 

جەدەل-الدىن الۋ شاراسى (جاش) ەكى كەزەڭمەن وتكىزىلۋدە، ءبىرىنشى كەزەڭ 10 ساۋىردە باستالىپ، 20 ساۋىرگە دەيىن جالعاسادى.

شاراعا قۇقىق قورعاۋ ورگاندارىنىڭ ەلەۋلى كۇشتەرى تارتىلىپ وتىر. جاش وتكىزۋ شەڭبەرىندە ىشكى ىستەر ورگاندارىندا پروفيلاكتيكالىق تىركەۋدە تۇرعان ادامدار تۇرعىلىقتى جەرى بويىنشا تەكسەرىلەدى. بۇعان قوسا، ءتارتىپ ساقشىلارى جوسپارلى نەگىزدە اتىس قارۋى مەن اڭشىلىق قارۋىنىڭ يەلەرىن ساقتاۋ جانە قايتا تىركەۋ ەرەجەلەرى بويىنشا تەكسەرۋدە.

ەلوردالىق وپەراتيۆتى شتاب قالا تۇرعىندارى مەن قوناقتارىن قۇقىقتىق ءتارتىپتى قامتاماسىز ەتۋ بويىنشا جۇرگىزىلىپ جاتقان شارالارعا تۇسىنىستىكپەن قاراپ، قۇقىق قورعاۋ ورگاندارىنىڭ قىزمەتكەرلەرىنە بارىنشا قولداۋ كورسەتۋگە شاقىرادى.