مۇنايلى اۋدانىنىڭ تۇرعىنى تۋعان ۇلىن الاياق كەلىنشەكتىڭ الداپ ۇستاپ وتىرعانىن ايتۋدا. 9 ءساۋىر كۇنى ۇيىنەن شىعىپ كەتكەن ۇلى بۇگىنگە دەيىن اتا-اناسىمەن بايلانىسپاي وتىر، دەپ جازادى "قامشى" اقپاراتتىق اگەنتتىگى Nur.kz پورتالىنا سىلتەمە جاساپ.
"مەنىڭ بالام ءبىر اي بۇرىن ۇيلەنگەن كەلىنشەگىن تاستاپ، لاريسا دەگەن قىزدىڭ سوڭىنان كەتتى. قازىرگى اكەلگەن كەلىنشەگىمەن بۇرىننان تانىس بولاتىن. ول قىزىنىڭ مەكتەپ بىتىرگەنىن كۇتىپ جۇرگەندە، مىنا لاريسا دەگەن الاياققا تاپ بولدى. وسى قىزعا ۇيلەنەمىن دەپ، شاڭىراققا الىپ كەلدى. بالام اكەلگەن سوڭ بەتاشار جاساۋعا قامدانا باستىق. سول كۇنى بۇل كەلىنىمنىڭ الاياق ەكەنىن ايتىپ، بۇرىنعى كۇيەۋى حابارلاستى. بالاما دەيىن سول جىگىتتىڭ جارى بولعان، ەكى جارىم جاسار قىزى بار ەكەن. سول ۇيگە كەلىن بولىپ ءتۇسىپ، تويىن جاساتىپ، ءۇش ايدان سوڭ ۇيدەگى بارلىق التىندارىن الىپ قاشىپ كەتكەن. ول جىگىتتىڭ اناسىمەن ءالى كۇنگە دەيىن سويلەسىپ تۇرامىن. ءوزى ون التى جاسىندا بوسانعان ەكەن"،- دەيدى ەرلاننىڭ اناسى جانار سولتانوۆا.
9 ساۋىردەن باستاپ بالاسىنان ەش حابار الا الماي وتىرعان انانىڭ ايتۋىنشا، لاريسا ۇلىن قارا سيقىرمەن اينالدىرىپ، ۇستاپ وتىرعان كورىنەدى. سەبەبى ەرلان ناۋرىز ايىندا عانا تارازدىق قىزبەن وتباسىن قۇرعان.
"ۇلىم ناۋرىزدا قازىرگى كەلىنىمدى الىپ قاشىپ كەلگەن. بەتاشارىن جاساپ، ۇلكەن تويعا دايىندالىپ جاتقانبىز. مىنە، ءبىر اپتادان بەرى بالام بىزبەن سويلەسپەدى، جاس كەلىنىمە وبال. لاريسا كۇندە اۋزىنا كەلگەندى ايتىپ، كەلىنىمە نەشە ءتۇرلى سمس جازادى. مەن كەلىنىم سۋيسيد جاساي ما دەپ قورقامىن. اىىب-گە ءوتىنىش ارىز جازىپ، ىزدەستىرۋ دە جاريالادىم. ازىرشە، ەش ناتيجە جوق"، - دەيدى جانار.
جانار جۇماي قىزى لاريسادان ەشتەڭە قاجەت ەمەس ەكەنىن، تەك تۋعان ۇلىمەن تىلدەسىپ، ونىڭ نە سەبەپتى بۇلاي جاساپ جۇرگەنىن بىلگىسى كەلەتىنىن ايتادى.
"ماعان بالامدى تاۋىپ بەرسە بولدى، ول ايەلدەن ماعان ەشتەڭە كەرەك جوق. نە سەبەپتى ۇلىمنىڭ وسىلاي ىستەپ جۇرگەنىن بىلسەم دەيمىر. جاس كەلىننىڭ نە كىناسى بار؟! ماعان، مەنىڭ ۇلكەن ۇلىما، ەرلاننىڭ ايەلىنە نەشە ءتۇرلى حات جازاتىنى ازداي، لاريسا كەلىنىمنىڭ اپكەلەرىنە ءتۇرلى sms جازىپ، داۋ شىعارۋدا.
ول مەنىڭ ۇلىمدى وقىتىپ العان، تۋعان ۇلىمدى تاني الماي ءجۇرمىن، زومبي سياقتى. ولار قاشىپ جۇرمەسە، بالام نەگە الدىما كەلمەيدى؟ ءبىز ونىڭ قايدا تۇرىپ جاتقانىن بىلمەيمىز، ىزدەمەگەن جەرىمىز جوق. كەلىنىم ەتەگى جاسقا تولىپ، كۇيەۋىن ۇيدە كۇتىپ وتىر. مەن قازاقشا ەمشىلەرگە بارسام، بالاڭىزدى وقىتىپ العان، ونى ءبىز قايتارا المايمىز دەيدى. لاريسا ماعان حابارلاسىپ: "بالاڭىزدى كورسەتپەيمىن، نە ىستەيسىڭدەر؟" دەپ اشىق ايتادى، -دەپ مۇڭىن شاقتى ەرلاننىڭ اناسى.
"ءبىزدىڭ ەرلانمەن ۇيلەنگەنىمىزگە ءبىر جارىم جىلداي بولدى. مەنىڭ ەرلاننان ءبىر قىزىم بار. ول ءبىر جاعدايلارمەن تارازعا كەتتى. سوسىن اكە-شەشەسى ارتىنان بارىپ، ماعان ۇيلەندىرمەۋ ءۇشىن باسقا قىزدى الىپ بەردى. ەرلان ونى سۇيمەيتىندىگىن ايتىپ، بالام مەن ايەلىمە بارامىن دەپ ماعان قايتىپ كەلگەن. مەن ونى كۇشتەپ ۇستامايمىن، ول كۇنى كەشە عانا اناسىمەن سويلەستى. ول قازىرگى كەلىنشەگىن ۇيىنە قايتارىڭىز دەگەن، ءبىراق اناسى كونەر ەمەس، -دەيدى لاريسا.
ول بۇعان دەيىن ءبىر رەت تۇرمىستا بولعانىن جاسىرمادى. ءبىرىنشى نەكەسىنەن تاپقان بالاسى اناسىنىڭ قولىندا ەكەنىن دە ايتتى. ال سيقىرلاپ الدى دەگەن پىكىرمەن لاريسا مۇلدەم كەلىسمەيتىندىگىن مالىمدەدى.
"وقىتىپ الدى دەگەن قازىرگى زاماندا ەرتەگى سياقتى، وزدەرى تىم ىرىمشىل بولعان سوڭ، سەنەتىن بولار. ايتپەسە، ۇپ-ۇلكەن جىگىتكە مەن قالاي وتىر-تۇر دەپ ايتامىن"،- دەپ جاۋاپ بەردى لاريسا.
ۇي-ىشىمەن بايلانىسقا شىقپاي جۇرگەن ەرلانمەن لاريسانىڭ تەلەفونى ارقىلى تىلدەسىپ كورىپ ەدى. ەرلاننىڭ ايتۋىنشا، ول ەشكىمنەن قاشىپ جۇرگەن جوق. ال قازىرگى كەلىنشەگىن اكە-شەشەسىنىڭ ءوتىنۋى بويىنشا عانا العان.
"مەن جيىرما ەكى جاستاعى جىگىتپىن عوي، مەنى قالاي كۇشتەپ ۇستايدى؟! مەن ولاردى تىڭدامايمىن، سوعان اشۋلانىپ وتىرعان بولار. جاقىندا ۇيلەنگەنىم راس، بىزدە ءالى ۇلكەن توي بولمادى. ول ءبىراق ءقازىر ءوز ۇيىنە كەتىپ قالدى"، -دەدى ۇيقىلى-وياۋ جاۋاپ بەرگەن ەرلان وڭالباي.
ايتا كەتەتىنى، ەرلان وڭالبايدىڭ اناسى جانار جۇماي قىزى جاس كەلىنىنىڭ ۇيدە ەكەنىن ايتىپ، ءتىپتى تەلەفون تۇتقاسىن دا بەرگەن. ءبىراق، كۇيەۋىنەن تىرىدەي ايىرىلىپ، قايعىدان قان جۇتىپ وتىرعان كەلىنشەك لاريسانىڭ ارالارىنا تۇسكەنىنە ءتورت جىلدان اسىپ كەتكەنىن عانا ايتتى.
مۇنايلى اۋدانىنىڭ ءاىىب قىزمەتكەرلەرى بۇل ىسكە قاتىستى جاۋاپ بەرۋدەن باس تارتىپ وتىر.
