ق ر اقپارات جانە كوممۋنيكاسيالار ءمينيسترى داۋرەن ابايەۆ پرەزيدەنتتىڭ «بولاشاققا باعدار: رۋحاني جاڭعىرۋ» اتتى ماقالاسىنا پىكىر ءبىلدىردى، دەپ حابارلايدى قامشى اقپاراتتىق اگەنتتىگى قازاقپارات اقپارات اگەنتتىگىنە سىلتەمە جاساي وتىرىپ.

ءمينيستردىڭ ايتۋىنشا، جەكە وزىنە پرەزيدەنتتىڭ 100 ۇزدىك الەمدىك وقۋلىقتى مەملەكەتتىك تىلگە اۋدارۋ، قازاقستاندىق مادەنيەتتى شەتەلدە ىلگەرىلەتۋ ۇسىنىسى قىزىقتى بولدى.

«بۇل جۇمىس ءبىزدىڭ بۇكىل قوعامىمىزعا قاتىسى بار. عالىمدارعا دا، ەكونوميستەرگە دە، شاعىن بيزنەسكە دە. مۇنىڭ بارلىعى ءبىزدىڭ ەلىمىزدى الەمدىك مادەني ورتاعا ىلگەرىلەتۋدەگى بەرەكەلى جۇمىس قوي. مەن بۇل ماقالانى زەيىن سالىپ وقۋدى وتىنەمىن»، - دەدى ول «داۋرەن ابايەۆپەن اشىق سۇحبات» باعدارلاماسى بارىسىندا.

اقپارات جانە كوممۋنيكاسيالار ءمينيسترى داۋرەن ابايەۆ لاتىن الىپبيىنە كوشۋ قازاقستاننىڭ ءوزىنىڭ ستراتەگيالىق سەرىكتەسى سانالاتىن رەسەي فەدەراسياسىمەن اراداعى قارىم-قاتىناسىنا ەش اسەر ەتپەيتىندىگىن دە باسا ايتىپ ءوتتى.

«ب ا ق ەڭ الىپساتارلىق تاقىرىپتى لاتىنعا كوشۋدى قاعىپ الدى. بۇل قادامدى پرەزيدەنت ءوزىنىڭ 2012 جىلعى جولداۋىندا ايتقان بولاتىن. ياعني، ءقازىر تاپسىرمانى جۇزەگە اسىرۋ جايىندا ءسوز بولىپ وتىر»، - دەدى ول.

ۆەدومستۆو باسشىسىنىڭ اتاپ وتۋىنشە، كەيبىر ب ا ق بۇل پروسەستى شامادان تىس ساياسيلاندىرىپ جىبەردى. نەگىزىنەن ماسەلە لينگۆيستيكالىق تۇرعىدا كوتەرىلىپ وتىر.

«بۇل تازا سپەكۋلياسيا. كوشۋ ماسەلەسى لينگۆيستيكالىق تۇرعىدا تۇر. وداقتاسىمىز رەسەي فەدەراسياسىمەن ءبىزدىڭ قارىم-قاتىناسىمىزدى قايتا قاراستىرۋ جايىندا ءسوز جوق. جانە بولۋى دا مۇمكىن ەمەس، بىرنەشە جىل وتكەننەن كەيىن بارلىق سىنشىلار مۇنىڭ ولاي ەمەستىگىنە تۇسىنەتىندىگىنە مەن كامىل سەنەمىن جانە بۇل تاقىرىپ توڭىرەگىندەگى وسىناۋ الىپساتارلىقتىڭ بارلىعى دا وتكەن ءىس بولىپ قالادى»، - دەدى داۋرەن ابايەۆ.

سونىمەن قاتار ول قازاقستاننىڭ رەسەيمەن ستراتەگيالىق ارىپتەس بولعاندىعىن ءارى بولىپ تا قالا بەرەتىندىگىن باسا ايتتى. مينيستر قۇجاتتىڭ ەڭ قاجەتتى ۋاقىتتا جارىق كورىپ وتىرعاندىعىن دا اتاپ ءوتتى.

«ەلىمىزدىڭ بارلىق تۇرعىندارى ماقالانى مۇقيات وقۋ بارىسىندا ءبىزدىڭ العا قادام باسۋىمىزعا قاجەتتى دۇنيەلەردى تابارىنا سەنىمدىمىن. مەملەكەت باسشىسى وزگەلەردەي ەمەس الەمدە ورىن الىپ جاتقان وزگەرمەلى ترەندتەردى بىردەن سەزەدى»، - دەدى مينيستر.

ونىڭ پايىمىنشا، قۇجات كونستيتۋسيالىق رەفورمالار مەن ەكونوميكالىق جاڭعىرۋدىڭ لوگيكالىق جالعاسى بولىپ وتىر.

«قوعامدىق سانا-سەزىمدى دە وزگەرتەتىن ۋاقىت جەتتى»، - دەدى ول.

«داۋرەن ابايەۆپەن اشىق سۇحبات» باعدارلاماسىنىڭ تولىق نۇسقاسىن «حابار» تەلەارناسىنىڭ سايتىنان كورۋگە بولادى.