ماسكەۋدە ماحمۋد ۆەليتوۆ ەسىمدى مولدانى ادام جەرلەۋ راسىمىندە ايتقان ءسوزى ءۇشىن سوتتاپ جاتىر، دەپ حابارلايدى قامشى اقپاراتتىق اگەنتتىگى Lenta.ru باسىلىمىنا سىلتەمە جاساي وتىرىپ.

ماسكەۋ قالاسىنىڭ ايماقتىق اسكەري سوتىندا يادريام مەشىتىنىڭ يمامى ماحمۋد ۆەليتوۆقا قاتىستى سوت ءىسى باستالدى. 2013 جىلى ونىڭ رەسەيدە تىيىم سالىنعان «حيزب ۋت-تاحرير ال-يسلامي» ۇيىمى مۇشەسىنىڭ جەرلەۋ راسىمىندە وقىعان ءسوزى تەرروريزمدى اقتاۋ ەسەبىندە قارالىپ وتىر. يمام بولسا، قايتىس بولعان ادامنىڭ بۇل ۇيىمعا قاتىسى بار ەكەندىگىن بىلمەگەنىن ايتىپ، ءوزىنىڭ كىناسىزدىگىن دالەلدەمەكشى.

تەرگەۋ ىسىنە سايكەس، يمام 2013 جىلى مەشىتتە وقىلعان جانازا نامازى الدىندا سويلەگەن سوزىندە «داعىستان ازاماتى ابدۋللا گاپپايەۆتىڭ ءدىني كوزقاراسىن وڭ باعالاعاندىعى» ءۇشىن ايىپتالادى. گاپپايەۆ تىيىم سالىنعان ۇيىمنىڭ مۇشەسى بولعان. ونى 2013 جىلدىڭ قىركۇيەك ايىندا ماحاچكالادا بەلگىسىز جاعدايدا ءولتىرىپ كەتكەن.

ۆەليتوۆتىڭ قورعاۋشىسىنىڭ ايتۋىنشا، ونى قايتىس بولعان ادامعا قۇران باعىشتاعانى ءۇشىن ايىپتاۋدا. قورعاۋشىنىڭ پىكىرىنشە، يمام قايتىس بولعان ادام تۋرالى تەك جاقسى ءسوز ايتۋى كەرەك. جانە ونىڭ اعىمىنا قاراماستان باسىنا قۇران باعىشتاۋ يمامنىڭ مىندەتى. «يمامعا مۇسىلمان ادام كەلىپ، «باۋىرىمىز قايتىس بولدى» دەپ حابار بەرەدى. ول «پايعامبار ۇمبەتىنىڭ جاقسى ءبىر پەرزەنتى قايتىس بولدى» دەپ، وعان قۇران باعىشتايدى. ال تەرگەۋ سول ءسوزى ءۇشىن ونى «حيزب ۋت-تاحرير ال-يسلامي» ۇيىمىن جاقتاپ ءسوز سويلەدى» دەپ ايىپتايدى. ونىڭ سوزدەرىنىڭ ىشىندە بۇل ۇيىم تۋرالى مۇلدەم ايتىلعان ەمەس»، - دەيدى ۆەليتوۆتىڭ قورعاۋشىسى داگير حاساتوۆ.

ونىڭ پىكىرىنشە، يمامداردىڭ وسىلاي ايىپتالۋى «مەملەكەتتىڭ ءدىني ۇستانىمدار ەركىندىگىنە جاساپ وتىرعان قىسىمى».

ايتا كەتەرلىك جاقداي رەسەيدە يمامداردى سوتقا تارتۋ جيىلەپ بارادى. وسىعان دەيىن قورعان قالاسىندا جەرگىلىكتى مەشىتتىڭ بۇرىنعى يمامى الي ياكۋبوۆتى «ۆكونتاكتە» جەلىسىندەگى پاراقشاسىندا قىتايداعى حيدجاب كيۋگە تىيىم سالىنعان زاڭ تۋرالى جازعان پىكىرى ءۇشىن ايىپتالعان بولاتىن.

داعىستاندىق مەشىت يمامى ماگومەدنابي ماگومەدوۆتى جەرگىلىكتى سالافيتتەردىڭ باستاۋشىسى دەپ ايىپتاپ، بەس جىلعا باس بوستاعاندىعىنان ايىرعان.

ەكاتەرينبۋرگتەگى «راحمەت» مۇسىلمان قاۋىمداستىعىنىڭ يمامى امير مۋزافاروۆتى مەشىتتە ەكسترەميستىك ادەبيەت ساقتادى دەگەن ايىپپەن بەس جىلعا باس بوستاندىعىنان ايىرعان. ونىڭ كومەكشىسى البەرت بايازيتوۆتى 360 ساعاتتىق قوعامدىق جۇمىس جاساۋعا بەكىتكەن.

بەلگورودتاعى مەشىتتىڭ يمامى فايزۋللا يسمايلوۆتى سۋىق قارۋ مەن جارىلعىش زاتتاردى ساقتادى دەگەن ايىپپەن ءۇش جىل باس بوستاندىعىنان ايىرعان. سوتتا يمام  وزىنە بۇل زاتتاردى قۇقىق قورعاۋ ورگانىنىڭ قىزمەتكەرلەرى تاستاپ كەتتى دەپ اقتالعان. جانە ونىڭ قورعاۋشىسى بۇل زاتتاردان يسمايلوۆتىڭ ساۋساق ىزدەرىنىڭ تابىلماعاندىعىن ايتىپ شاعىمدانعان.