باتىس قازاقستان وبلىسىنىڭ پوليسەيلەرى زەلەنوۆ اۋدانى شالعاي اۋىلى اكىمىنىڭ 22 جاستاعى جۇرگىزۋشىسىنىڭ ولىمىنە قاتىستى قىلمىستىق ءىستى توقتاتتى. تەرگەۋشىلەر اكىم جۇرگىزۋشىسىنىڭ ولىمىندە قىلمىس قۇرامى جوق دەپ ەسەپتەيدى، - دەپ حابارلايدى قامشى اقپارات اگەنتتىگى tengrinews.kz-كە سىلتەمە بەرىپ . ەسكە سالا كەتەيىك، ۆيكتوردىڭ ءمايىتى بىلتىر 2 جەلتوقساندا ءوز ۇيىنەن تابىلعان ەدى. ونىڭ قىلقىنىپ ولگەنى حابارلانىپ وتىر. سول كۇنى ول جۇمىسقا شىقپاعان ەكەن. ۆيكتور ياكوۆەنكونىڭ دەنەسىن ونىڭ ۇيىنە كەلگەن باۋىرى كورگەن. كورشىلەر قازا تاپقان جىگىتتىڭ ءوز ۇيىندە ورىندىققا بايلاۋلى تابىلعانىن ايتقان ەدى. "ونىڭ ءتىپتى ءىش كيىمى دە ايەلدىكى بولعان. ال اۋزىندا ايەلدىڭ شۇلىعى بولعان. ونى ولتىرگەندەر شۇلىقتى جاس جىگىتتىڭ اۋزىنا تىققانى سونشا، ونىڭ الىپ شىعۋ مۇمكىن بولماعان"، - دەگەن مالىمەت بەرىلەن بولاتىن.

"بارلىق ايعاق جىگىتتىڭ زورلىقپەن ولتىرىلگەنىن كورسەتكەن ەدى. الايدا پوليسەيلەر وسى قىلمىسقا قاتىستى مالىمەت ايتۋعا اسىقپادى. جۋرناليستەر تەرگەۋدىڭ قالاي جۇرگىزىلىپ جاتقانىن سۇراستىرىپ تۇراتىن. ال ءتارتىپ ساقشىلارى بولسا "قىلمىسقا قاتىسى بار دەگەن كۇدىكتىلەردى تابا الماي جاتىرمىز" دەپ جاۋاپ بەرگەن. ال ءتورت ايدان كەيىن ولار ءتىپتى بۇل ءىستى جاي جابا سالۋدى شەشكەن"، - دەپ جازادى باسىلىم. "قىزىق جاعداي بولىپ تۇر: دەنەسىندە زورلىق بەلگىلەرى بولعان ادام ءولىمى، ءبىراق وندا قىلمىس قۇرامى جوق. سوندا جىگىت ءوز-وزىن بايلاپ، ءوزىن ولتىرگەن بولىپ تۇر ما؟

الايدا ءىىد وكىلدەرى ونى وز-وزىنە قول جۇمساعان دەپ تە ايتپايدى"، - دەيدى باسىلىمداعىلار. ال پروكۋراتۋرا وكىلدەرى پوليسەيلەردىڭ شەشىمىنىڭ قانشالىقتى زاڭدى ەكەنىن تەكسەرۋگە ۋادە بەردى. ادام قۇقىقتارى جونىندەگى حالىقارالىق بيۋرونىڭ وبلىستىق فيليالىندا بۇل شەشىمدى زاڭسىز دەپ اتادى. "مەنىڭشە، بۇل زاڭسىز ۇكىم، پروكۋراتۋرا شەشىمدى جويۋى كەرەك. مۇندا ەكى نۇسقا بار: مۇمكىن، پوليسەيلەر بۇل ىسپەن اينالىسقىسى كەلمەيدى نەمەسە ولاردىڭ بۇل قىلمىستى اشۋعا مۇمكىندىك بەرمەيتىن قانداي دا ءبىر سەبەپتەرى بار"، - دەدى فيليالدىڭ ديرەكتورى پاۆەل كوچەتكوۆ.