ەل كونستيتۋسياسىنا وزگەرىستەر ەنگىزۋ بويىنشا 16 ءساۋىر كۇنى وتكەن رەفەرەندۋمداعى داۋىس ساناۋ جۇمىستارى اياقتالدى. پرەزيدەنتتىك باسقارۋ جۇيەسىن ەنگىزۋدى جاقتاۋشىلار جەڭىسكە جەتتى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

دەگەنمەن پرەزيدەنتتىك باسقارۋ جۇيەسىن قولدۋشىلار مەن وعان قارسىلاردىڭ اراسىنداعى ايىرماشىلىق اسا ۇلكەن ەمەس. نەبارى 1،25 ملن سايلاۋشى (51،3 پروسەنت 48،7 پروسەنتكە قارسى).

تۇركيانىڭ ورتالىق سايلاۋ كوميسسياسىنىڭ باسشىسى سادي گيۋۆەننىڭ مالىمدەۋىنشە، داۋىستاردى ساناۋ جۇمىستارى اياقتالۋعا تاياۋ. الدا نەبارى 600-گە جۋىق بيۋللەتەندەردى وڭدەۋ عانا قالدى. وسىلايشا، رەفەرەندۋمنىڭ ناتيجەسى وسى كەزدەن-اق بەلگىلى دەپ ايتۋعا بولادى.

«بيۋللەتەندەردى وڭدەۋ شارالارىنىڭ الدىن الا ناتيجەلەرى رەفەرەندۋمدا «ءيا» دەپ داۋىس بەرگەندەر سانى 1،25 ملن-عا كوپ بولدى، بارلىعى 24،5 ملن. داۋىس بەرۋ قورىتىندىلارى «ءيا» دەپ وتىر. تولىق قورىتىندى ناتيجەلەر كەمىندە 11-12 كۇننەن سوڭ بەلگىلى بولادى»،-دەدى گيۋۆەن.

تۇركيا پرەزيدەنتى تاييپ ەردوعان پرەمەر-مينيستر بينالي يىلدىرىمدى جانە ەلدىڭ باستى زاڭىنا وزگەرىس ەنگىزۋدى قولداۋشى پارتيا وكىلدەرىن رەفەرەندۋمداعى جەڭىستەرىمەن تەلەفون ارقىلى قۇتتىقتادى.

بۇل تۋرالى تۇركيا كوشباسشىسىنىڭ اكىمشىلىگىندەگى دەرەككوز حابارلادى. «پرەزيدەنت رەفەرەندۋمداعى جەڭىسىمەن ادىلەت جانە دامۋ پارتياسىنىڭ ءتوراعاسىن، پرەمەر-مينيستر بينالي يىلدىرىمدى، ۇلتتىق قوزعالىس پارتياسىنىڭ باسشىسى ديەۆلەت باحچەلي مەن ۇلى بىرلىك پارتياسىنىڭ ءتوراعاسى مۋستافا دەستيدجيدى قۇتتىقتادى. ول داۋىس بەرۋ قورىتىندىلارىنا بايلانىستى تۇرىك حالقىنا باقىت تىلەدى»،-دەدى اكىمشىلىك وكىلى.

اتالعان ءۇش پارتيا سايلاۋ ناۋقانى كەزىندە بىرىگە وتىرىپ، تۇزەتۋلەردى ناسيحاتتادى. وسى ۋاقىتتا بيۋللەتەندەردىڭ 98 پايىزى وڭدەلدى. الدىن الا مالىمەتتەر بويىنشا، داۋىس بەرۋشىلەردىڭ 51،3 پروسەنتى تۇركيادا پرەزيدەنتتىك بيلىكتى ەنگىزۋ جونىندەگى تۇزەتۋلەردى قولدادى.