14ء-ساۋىر كۇنى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ كىتاپحانا بولمەسىنىڭ وقىرماندار زالىندا «ەكسپو-2017 كورمەسى ەلدىكتىڭ ەرەن جەمىسى» اتتى كورمەنىڭ اشىلۋى بولىپ ءوتتى دەپ حابارلايدى قامشى اقپاراتتىق اگەنتتىگى. كورمە ەلىمىزدە 2017 جىلى حالىقارالىق مامانداندىرىلعان ەكسپو-2017 كورمەسىنىڭ وتكىزىلەتىندىگىنە جانە وسى كورمەنى ناسيحاتتاۋ، تانىتۋ ماقساتىندا ۇيىمداستىرىلدى.

كورمەنىڭ اشىلۋىنا «ازىرەت سۇلتان» مەملەكەتتىك تاريحي-مادەني قورىق-مۋزەيى قىزمەتكەرلەرىمەن بىرگە، مۋزەيگە ەرەن ەڭبەگى سىڭگەن سايان قوجامۇراتوۆ، جاينا يلياسوۆا سىندى ارداگەرلەرىمىز قاتىسىپ ءوز ويلارىن ورتاعا سالدى. 

«ازىرەت سۇلتان» مەملەكەتتىك تاريحي-مادەني قورىق-مۋزەيىندە جىلدار بويى قىزمەت ەتىپ، ەڭبەگىنىڭ زەينەتىن كورگەن س.قوجامۇراتوۆ ەكسپو-2017 كورمەسىن وتكىزۋدىڭ ءبىزدىڭ تاۋەلسىز جاس مەملەكەتىمىز ءۇشىن ماڭىزدىلىعىن ايتىپ، بارلىق قىزمەتكەرلەرگە ساتتىلىك پەن بيىك بەلەستەرگە جەتۋگە شىعارماشىلىق تابىستار تىلەدى.

كەلەسى كەزەكتە قورىق-مۇراجايدىڭ عىلىمي قىزمەتكەرى ا.ورىنبەكوۆا الەمنىڭ 100-دەن استام ەلى، حالىقارالىق ۇيىمدار مەن يننوۆاسيالىق كومپانيالارى قاتىساتىن «بولاشاق ەنەرگياسى» ەكسپو-2017 كورمەسىنىڭ تاريحى، ماقساتى، اتقارىلعان جۇمىستارى مەن جەتكەن جەتىستىكتەرى جايلى قىسقاشا مالىمەت بەردى.

كورمە ەكسپوزيسياسىندا ەكسپو-2017 تاريحى جايلى سىر شەرتەتىن بىرەگەي فوتوسۋرەتتەر، باسپا ءسوز بەتتەرىنە باسىلعان ماقالالار، مۇراجايىمىزدىڭ باسپا ونىمدەرى كوپشىلىك نازارىنا ۇسىنىلدى.