ەرنەست حەمينگۋەيدىڭ اكتريسا مارلەن ديتريحكە دەگەن سەزىمىن بىلدىرگەن عاشىقتىق حاتى اۋكسيونعا شىعارىلادى، دەپ حابارلايدى قامشى اقپاراتتىق اگەنتتىگى.

جەرگىلىكتى باق-تىڭ مالىمەتىنشە، حاتتىڭ العاشقى باعاسى 30 مىڭ دوللاردان باستالادى. اۋكسيون 4 مامىردا نيۋ-يوركتەگى Swan گالەرەياسىندا وتكىزىلەدى.

حەمينگۋەي 1952 جىلى ديتريحكە دەگەن ىستىق سەزىمگە تولى حاتىن كۋبادا تۇرعاندا جازعان ەكەن. بۇدان ءبىر جىل بۇرىن اكتريسا ونىڭ سۋرەتتەرىن ساقتاپ جۇرگەنىن مويىنداعان.

حەمينگۋەي مەن ديتريح 1934 جىلى تانىسىپ، سول ساتتەن باستاپ ۇزدىكسىز حات الىسىپ جۇرگەن. سولاي بولا تۇرا، جازۋشى مەن اكتريسانىڭ اراسىندا جاقىن قارىم-قاتىناس بولا قويماعان. حەمينگۋەي ءوز حاتىندا ەكەۋىن «مەزگىلسىز ماحابباتتىڭ قۇرباندارى» دەپ اتاعان. سونداي-اق، ءوزىنىڭ ىستىق سەزىمىن دە جەتكىزە وتىرىپ، بىلاي جازادى: «وتىنەمىن، سەنى ءاردايىم ءسۇيىپ وتەتىنىمدى ءبىل. كەي كەزدەرى سەن جايلى ويلاۋدى ۇمىتىپ كەتەمىن، ول ۋاقىتتا جۇرەگىمنىڭ دە سوعىپ تۇرعانىن ۇمىتامىن. ءبىراق ول ۇزدىكسىز سوعىپ تۇرادى».

گولليۆۋد جۇلدىزى مەن نوبەل سىيلىعىنىڭ يەگەرى اراسىنداعى ماحاببات حاتتارىن ۇرپاقتارى كوپ جىلدار بويى ساقتاپ كەلگەن. ديتريحتىڭ نەمەرەلەرى سوڭعى جىلدارى اكتريسانىڭ جازۋشىدان العان حاتتارىن اۋكسيونعا شىعارىپ ۇلگەرگەن.