قاراعاندى وبلىسىندا تابيعي سيپاتتاعى توتەنشە جاعداي جاريالاندى، - دەپ حابارلايدى qamshy.kz
باسپا ءسوز قىزمەتىنىڭ مالىمەتىنشە، بۇقار جىراۋ، قارقارالى جانە اباي اۋدانىنىڭ جەكەلەگەن ەلدى مەكەندەرىندە سۋ تاسقىنى بولعان. وسىدان كەيىن بۇل اۋدانداردىڭ اكىمدەرى جەرگىلىكتى كولەمدە تابيعي سيپاتتاعى تج جاريالاۋ تۋرالى شەشىم قابىلداعان.
"قازىرگى كەزدە جەتى ەلدى مەكەندە تۇرعىن ۇيلەر مەن اۋلا اۋماقتارى سۋ استىندا قالدى: سارىتوبە، چكالوۆو، سادوۆوە، اندرەينيكوۆكا، قىزىلجار، كراسنايا پوليانا، قارامۇرىن. چكالوۆو جانە سادوۆوە اۋىلدارىندا 49 جانە 42 باسپانانى سۋ باسقان. چكالوۆودان 137، سادوۆوە اۋىلىنان 308 ادام ءقاۋىپسىز جەرگە كوشىرىلدى. ءۇش ەلدى مەكەندە - قاراعايلى جانە قايراقتى، تۇزدى اۋىلدىق وكرۋگىنىڭ 1-ماي بولىمشەسىندە - سۋ باسۋ ءقاۋپى ساقتالادى. شوپا اۋىلىندا شەرۋباي-نۇرا وزەنىندە ارناسىنان اسقان سۋ جولداردى شايىپ كەتتى. وبلىستا اۆتوموبيل جولدارىنىڭ سەگىز ۋچاسكەسىن سۋ باستى. "قاراعاندى-قارقارالى" جول ۋچاسكەسىندە كولىكتىڭ بارلىق تۇرلەرى ءۇشىن كولىك قوزعالىسى توقتاتىلدى"، - دەلىنگەن حابارلامادا.
ايتا كەتسەك، كەشە كەشكىسىن سۋ تاسقىنى سالدارىنان اقتوبە وبلىسىندا دا توتەنشە جاعداي جاريالانعان بولاتىن. ەلەك، قارعالى، سازدى، جىڭىشكە جانە بۇتاق وزەندەرى ارناسىنان تاسىپ، 283 ساياجاي ءۇيىن سۋ باستى. 5 ءۇي قيراپ قالدى. كەشەلى بەرى 700-دەن استام ادام ءقاۋىپسىز جەرگە كوشىرىلدى. ەكى مەكتەپتىڭ عيماراتىندا 12 ەۆاكۋاسيا پۋنكتى اشىلعان. ارنايى ورىنعا 200-دەن استام ادام جەتكىزىلدى. ەلەك وزەنىنىڭ قوس جاعاسىندا دا قوعامدىق ءتارتىپ كۇزەتى مەن قۇتقارۋشىلار توبى جۇمىس ىستەپ جاتىر. تاسقىن سالدارىن جويۋعا توتەنشە جاعداي قىزمەتى، ۇلتتىق گۆارديا، جەرگىلىكتى پوليسيا قىزمەتىنەن بارلىعى 500 ادام مەن 124 بىرلىك تەحنيكا جۇمىلدىرىلعان. قۇتقارۋ جۇمىستارى ءالى دە جالعاسىپ جاتىر. ارنايى قۇرىلعان كوميسسيا توتەنشە جاعدايدىڭ شىعىنىن انىقتايتىن بولادى. مۇنداي جاعداي وڭىردە وسىدان 20 جىل بۇرىن بولعان.
سونداي-اق، قوستاناي وبلىسىنا دا سۋ تاسقىنى سالدارىنان تونگەن ءقاۋىپ كۇشەيدى. ايماقتا القاپتارداعى قار ەرىپ، سۋ دەڭگەيى كوتەرىلدى. سونىڭ سالدارىنان بىرنەشە ەلدى مەكەن اپاتتى جاعدايدا تۇر. «اۋليەكول اۋدانى، كوكتال اۋىلىندا ەكى تۇرعىن ۇيگە سۋ كىرىپ كەتكەن. ءقازىر ول جەردە سۋدى بۇرۋ جۇمىستارى ءجۇرىپ جاتىر. ال قاراسۋ اۋدانىندا ەكى ەلدى مەكەندە 7 ءۇي سۋ استىندا قالىپ، ادامدار ءقاۋىپسىز جەرگە كوشىرىلدى. قۇتقارۋ شارالارىنا 40-قا تارتا تەحنيكا مەن 70-تەن استام ادام كۇشى جۇمىلدىرىلعان دەپ مالىمدەيدى وبلىستىق توتەنشە جاعدايلار دەپارتامەنتىنىڭ باسپا ءسوز حاتشىسى. ءقازىر ءتۇرلى الەۋمەتتىك جەلىلەردە ىرگەسىنە دەيىن سۋ جەتكەن ەلدى مەكەندەردىڭ ۆيدەولارى كوبەيگەن.
جەكسەنبى كۇنى اقمولا وبلىسىندا دا سۋ تاسقىنى بولىپ، ەرىگەن قار سۋى وقۋشىلار مىنگەن اۆتوبۋستى اعىزىپ اكەتكەن. وقيعانىڭ كۋاگەرلەرى تاسقىن سۋدىڭ جولدان اسىپ-تاسىپ جاتقانى تۇسىرىلگەن بەينەجازبانى جاريالاعان بولاتىن. كەيىنىرەك انىقتالعانداي، وقيعا 16 ءساۋىر كۇنى ساندىقتاۋ اۋدانىندا اتباسار-كوكشەتاۋ جولىندا بالكاشينو جانە ماكسيموۆكا اۋىلدارىنىڭ اراسىندا بولعان.
ودان بولەك، ساندىقتاۋ اۋىلىنىڭ تۇرعىندارىن كوشىرىپ جاتقان كەزدە سۋعا كەتكەن ۇيلەردىڭ بىرىنەن 59 جاستاعى ايەلدىڭ مۇردەسى تابىلدى. ايەلدىڭ نەدەن كوز جۇمعانى انىقتالىپ جاتىر.
ايتا كەتەيىك، ساندىقتاۋ اۋىلىندا جاباي وزەنىندە سۋ دەڭگەيى كوتەرىلۋىنىڭ سالدارىنان جەتى ءۇي مەن اۋلانى سۋ باستى. 17 ادام، ونىڭ ىشىندە 5 بالا كوشىرىلگەن.
الداعى ۋاقىتتا سۋ تاسقىنى تاعى دا كۇشەيۋى مۇمكىن. اۋا رايىن بولجاۋشىلار الداعى بىرنەشە كۇن جاۋىن-شاشىندى بولادى دەپ بولجاپ وتىر.
اتموسفەرالىق اعىمداردىڭ وتۋىنە بايلانىستى دۇيسەنبى كۇنى قازاقستانىڭ باسىم بولىگىندە جاڭبىر جاۋىپ، وڭتۇستىك پەن وڭتۇستىك شىعىسىندا نايزاعاي سوعادى. رەسپۋبليكانىڭ ءبىرقاتار ايماقتارىندا تۇمان ءتۇسىپ، سولتۇستىك ايماقتاردا جەل كۇشەيەدى، دەپ حابارلايدى «قازگيدرومەت» رمك. اقمولا، پاۆلودار، سولتۇستىك قازاقستان وبلىستارىندا جەلدىڭ كۇشى سەكۋندىنا 15-20 مەترگە، كەي جەرلەردە 30 مەترگە جەتەدى. سولتۇستىك قازاقستان وبلىسىندا تۇمان تۇسەدى دەپ كۇتىلۋدە. قوستاناي، وبلىسىنىڭ ءبىرقاتار ايماقتارىندا جەلدى ەكپىنى سەكۋندىنا 15-20 مەترگە دەيىن جەتەدى. كەي جەرلەرگە تۇمان تۇسەدى. قاراعاندى وبلىسىنىڭ كەي جەرلەرىندە جەلدىڭ كۇشى 17-22 مەتر/سەكۋند بولادى. وڭتۇستىك قازاقستان، الماتى وبلىستارىندا دا جەل 15-20 مەتر/سەكۋندقا دەيىن كۇشەيەدى. جامبىل، وبلىسىندا نايعاعاي سوعىپ، جەل كۇشەيەدى. قىزىلوردا، باتىس قازاقستان وبلىستارىندا كۇندىز ماڭعىستاۋ وبلىسىنىڭ كەي جەرلەرىندە جەلدىڭ كۇشى سەكۋندىنا 15-20 مەترگە جەتەدى. شىعىس قازاقستان وبلىسىندا جەلدىڭ ەكپىنى 15-20 مەتر-سەكۋند بولادى، كەي جەرلەردە 25 مەترگە جەتەدى. تۇندە جانە تاڭ اتا تۇمان تۇسەدى. اقتوبە وبلىسىندا تۇمان.
