اقش-تىڭ لوندونداعى ەلشىلىگى ءۇش ايلىق بالادان «تەرروريزمگە» قاتىستى جاۋاپ الدى، دەپ حابارلايدى قامشى اقپاراتتىق اگەنتتىگى.
Guardian گازەتىنىڭ حابارلاۋىنشا، ءسابيدىڭ اتاسى ۆيزانى تولتىرۋ كەزىندە قاتەلىك جىبەرگەن. حارۆي كەنونا-كەيرنستىڭ اتاسى نەمەرەسى اتىنان امەريكاندىق تۋريستىك ۆيزانى تولتىرۋ كەزىندە «ءسىزدىڭ تەرروريستىك ۇيىمعا، گەنوسيدكە، تىڭشىلىق ۇيىمعا قاتىسىڭىز بار ما؟» دەگەن سۇراققا قاتەلەسىپ، «ءيا» دەپ جاۋاپ بەرگەن. وسىدان كەيىن ءۇش ايلىق بالانى امەريكا ەلشىلىگىنە جاۋاپ الۋعا شاقىرعان.
«مەن ولاردىڭ قاراپايىم قاتەلىكتى تۇسىنبەگەندەرىنە قايران قالدىم. بالادان قانداي ءقاۋىپ ءتونۋى مۇمكىن»، — دەگەن ونىڭ 62 جاسار اتاسى پول كەنون.
اتاسىنىڭ ايتۋىنشا، ول بالانى ەلشىلىككە تۇرمەدەگىلەر كيەتىن قىزعىلت سارى كيىممەن اپارماق بولعان. الايدا ول: «ديپلوماتتار ءازىلدى تۇسىنە المايتىن سەكىلدى، سوندىقتان بۇل ويىمنان باس تارتتىم»، - دەگەن ەكەن.
اتاسى ءسابيدىڭ جاۋاپ الۋ كەزىندە ءوزىن جاقسى ۇستاعاندىعىن، جىلاماعاندىعىن ايتقان. «ارينە تەرگەۋ سوڭىندا بالانىڭ تىڭشىلىقپەن اينالىسپايتىندىعى، تەررورعا قاتىسى جوقتىعى بەلگىلى بولدى. ونىڭ بار جاساعان قىلمىسى بىر-ەكى جايالىقتى ءبۇلدىرىپ قويعاندىعى، ءبىراق مۇنى ەلشىلىكتەگىلەر بىلمەيدى»، - دەگەن ول ءوزىنىڭ مالىمدەمەسىندە.
