شەكارادا تاركىلەنگەن 50 مىڭ دوللارىن داۋلاپ جۇرگەن گۇلجان ءماۋىتحاننىڭ قىلمىستى بولعانى ءوز الدىنا، ەندى ۇلى مەن ءىنىسى دە جاۋاپقا تارتىلماقشى ەكەن. 4 كۇن بۇرىن وتكەن سوت وتىرىسىندا وسىنداي قاۋلى قابىلدانىپتى. بۇعان دەيىن 9900 دوللاردىڭ جالعىزباستى انانىڭ ۇلىنا قايتارىلعانىن ايتقان بولاتىنبىز. ەندى قالعان 40 مىڭ دوللار مەملەكەتتىڭ مەنشىگى بولىپ قالا بەرە مە؟

سوتتىڭ ۇكىمىمەن گۇلجان ءماۋىتحان ايىپتى دەپ تانىلدى. ياعني، ەكونوميكالىق كونتراباندامەن اينالىستى دەلىنىپ، 68 مىڭ تەڭگە ايىپپۇل سالىنعان. 40 مىڭ دوللاردى مەملەكەتتىڭ كىرىسىنە الىپ قويعانى تاعى بار. زايسانعا ۇلكەن ۇمىتپەن بارعان جالعىزباستى انانىڭ تاۋى شاعىلىپ قايتا ورالعان، دەپ حابارلايدى قامشى اقپاراتتىق اگەنتتىگى 31 ارناعا سىلتەمە جاساپ.

سوت بارىسىندا جاڭا دەرەكتەر بەلگىلى بولىپتى. شەكاراشىلار ولاردىڭ ناقتى قانشا اقشا الىپ كەلە جاتقانىن الدىن الا بىلگەن كورىنەدى. جالعىزباستى انا ولاي بولسا شەكارادان ءوتىپ، اۆتوبۋسقا وتىرعانشا كۇتپەي زاڭدى جولىن ۇسىنسا بولار ەدى دەپ اشىنىپ وتىر.

گۇلجان ءماۋىتحان، ورالمان:
-  ءبىز "اقشا جوق" دەپ قاشىپ تۇرعانىمىز جوق. ايىپپۇلىنان دا قاشىپ تۇرعانىمىز جوق. "مىنانداي سىزدەردە اقشا بار ەكەن. دەكلاراسيا دەي مە، سونى تولتىرىڭدار" دەسە ءبىز ودان قاشىپ تۇرعانىمىز جوق. ءبىزدى بارىنشا قىلمىسقا يتەرىپ، اۋرەشىلىككە سالىپ 2 اي مىنە.

الايدا، سۋديالار جازىلعان زاڭنىڭ شەڭبەرىندە شەشىم شىعاردىق دەپ وتىر. ءتىپتى سول زاڭعا سۇيەنىپ جالعىزباستى انانىڭ ءىنىسى مەن بالاسىن دا جاۋاپقا تارپاقشى ەكەن.

نۇرماحانبەت ەلەمەسوۆ، شىعىس قازاقستان وبلىستىق سوتىنىڭ سۋدياسى:
-  ءماۋىتحان گۇلجاننىڭ بالاسى جانە ونىڭ ءىنىسى الدىن الا تەرگەۋدە بەرگەن جاۋابى جانە سوتتا بەرگەن جاۋابى ەكەۋى قاراما-قارسى كەلگەندىكتەن سوت وسىنداي جەكە قاۋلى شىعارعان. جەكە قاۋلىدا زايسان اۋداندىق پروكۋرورىنىڭ نازارىنا اۋدارعان.

ياعني، سوتتا جالعان جاۋاپ بەرگەنى ءۇشىن قىلمىستىق جاۋاپكەرشىلىككە تارتىلماق. الايدا، ادىلبەك تاركىلەۋ كەزىندە كەدەنشىلەر مەن شەكاراشىلاردىڭ ايتقانىن ىستەدىك دەيدى.

ادىلبەك مۇقاش ۇلى، گ.ءماۋىتحاننىڭ ۇلى:
-  ءبىرىنشى كەزىندە راسىندا بىزگە "1 ادامدىكى دەپ ايتىڭدار، ءازىر ءسويتىپ ايتساڭدار ءقازىر جىبەرەمىز. 50 مىڭ تەڭگە شتراف قانا تولەيسىڭدەر" دەپ باسىندا الداعان. ناعاشى اعانى قورقىتقان. "سەن ءويتىپ انا كىسىنىكى دەپ ايتپاساڭ سەنى قارا تاڭبا باسىپ، ايەلىڭ مەن بالا-شاعاڭ شىرىلداپ وسى جاقتا قالادى، سەنى قىتايعا قۋىپ جىبەرەمىز" دەپ.

سۋديالار بۇل ايىپتاۋلار تۋرالى ءتىس جارمادى. ال زايسان سوتىنىڭ شەشىمى زاڭدى كۇشىنە ەنبەگەنىن العا تارتىپ، نۇكتە قويىلدى دەۋگە ەرتە ەكەندىگىن ايتتى. گۇلجان ءماۋىتحان بولسا، 40 مىڭ دوللاردان كۇدەرىن ۇزە باستاعان.

زاڭدى بىلمەۋ - جاۋاپكەرشىلىكتەن اراشالاي المايدى. بۇل - قۇقىق قورعاۋشىلاردىڭ وسىنداي جاعدايدا ايتاتىن جاتتاندى ءۋاجى. دۇرىس ارينە. ءبىراق، قاساقانا ەمەس، بىلمەستىكتەن كەتكەن قاتەلىكتەرگە وسىنشاما شۇيلىگۋ، پرەزيدەنتتىڭ ءوزى باستاماشى بولعان "ۇلى كوشكە" كەدەرگى كەلتىرەتىنى كوپ ازاماتتاردى ويلاندىرمايتىن سياقتى.