14 ءساۋىر كۇنى 8 جاستاعى ءبۇلدىرشىن ماسكۇنەمنىڭ قۇربانىنا اينالۋعا شاق قالدى. الايدا، جالپى جۇرتقا بەلگىلى بولعانداي، 17 جاستاعى تيمۋر ەسىمدى ازامات قىزدىڭ ومىرىنە اراشا ءتۇسىپ، قىلمىسكەردى قولعا تۇسىرۋگە ەداۋىر كومەگىن تيگىزگەن. بۇل جايىندا بارشا ينتەرنەت جەلىسىنە تارالىپ، ەرلىك جاساعان جاس جەتكىنشەك ەلدىڭ ىقىلاسىنا بولەنۋدە. پەدوفيلدەر كوبەيىپ، ءسابي زورلاۋ ءىسى – بۇگىنگى تاڭدا ءورشىپ تۇرعان ماسەلە، دەپ حابارلايدى قامشى اقپاراتتىق اگەنتتىگى.

«مەن بۇل بالانىڭ ەسىمىن عانا بىلەمىن – تيمۋر. ونى ءوز كوزىممەن كورگەنىم جوق، الايدا ول وتە باتىل ارەكەت جاسادى. 14 ءساۋىر كۇنى كەشكى 18:00 شاماسىندا قونايەۆ اتىنداعى مەكتەپتىڭ جوعارعى سىنىپ وقۋشىسى ۇلكەن بالەنىڭ الدىن الىپ، كىشكەنتاي ءبۇلدىرشىننىڭ ءومىرىن، بولاشاعىن قۇتقارىپ قالدى. ءوز ءومىرىن قاتەرگە تىگە وتىرىپ، زورلاماق بولماق پەدوفيلدەن ءبۇلدىرشىندى اراشالاپ الدى. بۇكىل ەل تانۋعا تۇرارلىقتاي جىگىت. قۇزىرلى ورىندار بۇل جىگىتتى بايقاپ، كوپ ادامنىڭ قولىنان كەلە بەرمەيتىن باتىلدىعى ءۇشىن ماراپاتتاۋ دۇرىس بولادى. قازىرگى قوعامدا ءومىر ءسۇرىپ جاتقان ادامدار ادامدىعىن جوعالتقان، سول ءبۇلدىرشىننىڭ جانىنان ءوتىپ بارا جاتقان كوپتەگەن ۇلكەن كىسىلەر كومەك قولىن سوزبادى. ال بۇل جىگىت كىشكەنتاي قىز كومەككە شاقىرىپ، ايقايلاعاندا ويلانباستان قىزعا كومەككە جۇگىرىپ، قۇتقارىپ قالدى»، - دەپ جازادى Facebook قولدانۋشىسى يسلام كۋرايەۆ ءوزىنىڭ جەكە پاراقشاسىندا.

دەرەكتەرگە سايكەس، پوليسيا قىزمەتكەرلەرى سەگىز جاستاعى ءبۇلدىرشىننىڭ ءومىرىن قۇتقارىپ قالعان تيمۋردى ماراپاتتاۋعا قاتىستى شەشىم قابىلداماق.

ەستەرىڭىزگە سالا كەتسەك، ەڭبەكشىقازاق اۋدانىندا جانتۇرشىگەرلىك وقيعا ورىن الۋعا شاق قالدى. اششى سۋدى ءىشىپ العان ماسكۇنەم سەگىز جاستاعى قىزعا تاپ بەرىپ، ونى زورلاماق بولعان. الايدا، مەكتەپ وقۋشىسىنىڭ باتىل ىس-ارەكەتىنىڭ ارقاسىندا كىشكەنتاي قىز امان قالدى. اتالمىش وقيعاعا قاتىستى تيمۋر: «مەنىڭ ورنىمدا باسقا بىرەۋ بولسا، ول دا ءدال مەنىڭ ىس-ارەكەتىمدى قايتالايتىن ەدى»، - دەيدى.