رەسەي فەدەرالدى قاۋىپسىزدىك قىزمەتى (فقق) 3 ءساۋىر كۇنى پەتەربور مەتروسىندا تەراكت ۇيىمداستىردى دەگەن كۇدىكپەن ورتالىق ازيانىڭ تۋماسى 27 جاستاعى ابرور ازيموۆتى ۇستادى، دەپ جازادى قامشى اقپاراتتىق اگەنتتىگى.

فقك مالىمەتىنشە، ابرور ازيموۆ تەراكتىنى ۇيىمداستىرۋشى قىرعىزستان تۋماسى اقبارجون دجاليلوۆتى دايىنداعان. تاسس اگەنتتىگىنىڭ حابارلاۋىنشا، ازيموۆتى تەمىر جول بويىندا ۇستالعان.

جەدەل قىزمەتكەرلەردىڭ ءبىرى كۇدىكتىدەن: «ءسىزدى نە ءۇشىن ۇستاعانىن بىلەسىز بە؟»، - دەپ سۇرادى. «ءيا»، - دەدى ازيموۆ. كەيىن ودان تاپانشا مەن ەكى سمارتفون تاركىلەندى. تەرگەۋ كوميتەتىنىڭ رەسمي وكىلى سۆەتلانا پەترەنكو تك تەراكتىنى ۇيىمداستىرۋشىلاردى انىقتاۋدى جالعاستىرىپ جاتقانىن مالىمدەدى.

ەسكە سالا كەتەيىك، 3 ءساۋىر كۇنى پەتەربور مەتروسىنىڭ «سەننايا پلوششاد» بەكەتىندە جارىلىس بولدى. سالدارىنان 14 ادام قازا تاۋىپ، 50 ادام جاراقاتتاندى. اجال قۇشقاندار اراسىندا قازاقستان ازاماتى، پەتەربور مەملەكەتتىك ەكونوميكالىق ۋنيۆەرسيتەتىنىڭ ستۋدەنتى ماكسيم ارىشيەۆ بولدى.