قاراعاندى وبلىسىنىڭ 13 جاستاعى تۇرعىنى جەكە ءتىس ەمحاناسىندا قازا تاپتى. قايعىلى جاعداي وسىدان 1 جىل بۇرىن ورىن العان. الايدا، قىزدىڭ اتا-اناسى مەدبيكەلەردىڭ جازاسىن ءالى الماعانىنا ناليدى، دەپ جازادى قامشى اقپاراتتىق اگەنتتىگى.

كتك ارناسىنىڭ مالىمەتىنشە، جانسايا وماروۆا كىشكەنتاي كەزىنەن سال اۋرۋىنا شالدىققان. قىزىن اۋرۋىنان ايىقتىرۋ ءۇشىن اتا-اناسى ءبارىن ىستەدى: ەمدىك قاسيەتى بار تەڭىزدەرگە اپاردى، شەتەلدىك ماماندارعا دا قارالدى، سونداعى ناتيجە – قىز ءوز ەركىمەن تۇرىپ-جۇرە الدى، سويلەي الدى. الايدا، ءتىس ەمحاناسىندا قايعىلى جاعداي ورىن الادى دەپ ەشكىم ويلاعان جوق.

مارجاننىڭ اكەسى قىزىن ەسكە الا وتىرىپ، بىلاي دەيدى:

«وعان ناركوز جاسادى. ادەتتە، الدىمەن سىناقتان وتكىزۋشى ەدى، ونداي ەشتەڭە بولعان جوق. 16 ءتىسىن جۇلىپ الۋ كەرەك دەدى. ءبىر كۇننىڭ ىشىندە 16 ءتىسىن جۇلىپ، ەمدەۋ مۇمكىن بە دەپ تاڭقالدىق. دارىگەرلەر ءبارى جاقسى بولاتىنىنا سەندىردى. ءبىز سەندىك. ماماننىڭ اتى مامان عوي».

قىزدىڭ جاعدايى ناشارلاپ كەتكەن سوڭ، ءتىس دارىگەرلەرى ءوز بەتتەرىنشە كومەك كورسەتپەك بولدى. بۇنىڭ ءبارى ۆيدەو كامەراعا انىق تۇسىرىلگەن. تەك بىرنەشە ۋاقىتتان كەيىن ەش ناتيجە شىقپاعان سوڭ جەدەل-جاردەم شاقىردى. وكىنىشكە وراي، تىم كەش بولدى. ساراپتاما ناتيجەسى جانسايانىڭ ناركوزدان انافيلاكتيكالىق ەسەڭگىرەۋگە شالدىققانىن دالەلدەدى. تەرگەۋ بارىسىندا دا كلينيكانىڭ انەستەزيا وتكىزۋگە ليسەنزياسى بولماعانىن انىقتاعان. الايدا، ءىس سوتقا سول كۇيى جەتپەگەن.

«تەرگەۋ 1 جىلعا سوزىلدى. ءبىراق ناتيجە جوق. ساراپشىلار باسقا دا اۋرۋحانالاردى، ەمحانالاردى تەكسەرىپ، ۋاقىتتى سوزۋدا. نە ءۇشىن؟ سوت-مەديسينالىق ساراپتامانىڭ ناتيجەسى دە ايقىن دالەل ەمەس پە؟» دەيدى ادۆوكات تولەۋباي مۋسين.

ال، ەمحانا قىزمەتكەرلەرى وزدەرىن سۇتتەن اق، سۋدان تازا ەتىپ كورسەتپەكشى. قىز قايعىلى جاعدايدا قازا تاپتى دەپ سىلتاۋراتىپ وتىر. ونىڭ ۇستىنە، ليسەنزيا بولماعانى ءۇشىن ايىپپۇل تولەۋ كەرەك ەكەن. الايدا، جانسايانى قابىلداعان انەستەزيولوگ قايتا دايارلاۋ كۋرستارىنان ءوتىپ، بالالارعا ناركوز بەرۋدى جالعاستىرىپ جۇرگەن كورىنەدى.

«جانساياعا دەيىن جەزقازعاندىق بالا دا ەكى رەت ەمدەلگەن، ءدال سول پرەپاراتتاردى قولداندىق، ناتيجەسى دە جاقسى بولعان» دەپ اقتالدى ءتىس ەمحاناسىنىڭ ديرەكتورى ەرلان اناجبايەۆ.

قازا تاپقان قىزدىڭ اتا-اناسى ءتىس دارىگەرلەرىن قاتاڭ جازالاۋدى تالاپ ەتىپ وتىر. پوليسەي قىزمەتكەرلەرى رەسپۋبليكالىق ساراپتامانىڭ جەتكىلىكسىز ەكەنىن العا تارتىپ، تەرگەۋ جۇمىستارىن جالعاستىرىپ جاتىر. ال، وتباسى قورعاۋشىسى ونداي تەرگەۋدىڭ قاجەتى جوق ەكەنىن ايتادى. ءىىد باسقا اقپاراتتاردى بەرۋدەن باس تارتتى.