ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەملەكەتتىك قىزمەت بەدەلىن تۇسىرەتىن ارەكەتتەر ساناتىنا ادەپ بۇزۋشىلىقتاردىڭ جەكە قۇرامىن ەنگىزبەك.  بۇل جايىندا بۇگىن اتالعان اگەنتتىك ءتوراعاسىنىڭ ورىنباسارى اليك شپەكبايەۆ ءمالىم ەتتى، دەپ حابارلايدى قامشى اا قازاقپاراتقا سىلتەمە جاساي وتىرىپ.

 سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىندە وتكەن «قر-دا سىبايلاس جەمقورلىققا قارسى ءىس-قيمىل ماسەلەلەرى بويىنشا زاڭنامانى جەتىلدىرۋ» تاقىرىبىنداعى دوڭگەلەك ۇستەل بارىسىندا نەگىزگى بايانداما جاساعان شپەكبايەۆتىڭ ايتۋىنشا، ەلىمىزدە ادەپ كودەكسىن بۇزعان مەملەكەتتىك قىزمەتشىلەرگە جازا جەڭىل. ماسەلەن، ولار قىزمەتتىك كولىكتەردى جەكە ماقساتىندا پايدالانسا، ازاماتتارعا جانە قىزمەتتەستەرىنە دورەكىلىك تانىتسا، كولىكتى ماس كۇيىندە باسقارسا نەمەسە ماس كۇيىندە قوعامدىق ورىنداردا جۇرسە ەسكەرتۋ الادى نە قاتاڭ سوگىس الىپ قۇتىلادى. «بىردەن قاتاڭ شارالار قابىلداۋ قاجەت دەپ وتىرعانىمىز جوق. دەگەنمەن، تىم بولماعاندا قىزمەتىنە تولىق سايكەس كەلمەيتىندىگىن جاريالاپ، ءۇش جىل بويى جوعارى تۇرعان لاۋازىمعا جوعارىلاۋ قۇقىعىنان ايىرۋعا نەمەسە لاۋازىمىن تومەندەتۋگە بولار ەدى. ارى كەتكەندە، ادەپ نورماسىن ورەسكەل بۇزعانى ءۇشىن جۇمىستان شىعارۋ قاجەت»، - دەدى ول.

وسى رەتتە حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا اگەنتتىك باسشىسىنىڭ ورىنباسارىنان مەملەكەتتىك قىزمەتشىنىڭ ازاماتتارعا دورەكىلىك تانىتقانىن قالاي دالەلدەۋگە بولاتىنىن سۇرادى. «بىزدە جازبا جۇرگىزۋگە تىيىم سالىنباعان. اركىمنىڭ دە مۇنداي مۇمكىنشىلىگى بار. مۇنداي شاعىمداردى قاراعان كەزىمىزدە كوپشىلىگى جازىپ الىپ، سونىمەن فاكتىنى دالەلدەپ جاتادى. ءقازىردىڭ وزىندە 62 فاكتى بويىنشا جاۋاپقا تارتتىق. مۇنداي فاكتىلەرگە جول بەرگەندەردىڭ باسىم بولىگى مەملەكەتتىك قىزمەتشىلەر»، - دەپ جاۋاپ بەردى شپەكبايەۆ.