حۋبەي پروۆينسياسىنىڭ تۇرعىنى قۇرىلىس جۇمىستارى كەزىندە قۇلاپ، ونىڭ ميىنا بەس سانتيمەتر تەرەڭدىككە دەيىن شەگە كىرىپ كەتكەن. بۇل تۋرالى قامشى اا حابارلايدى  China News Service اگەنتتىگىنىڭ مالىمەتىنە سۇيەنىپ.

وقيعا 12 ءساۋىر كۇنى يچان قالالىق وكرۋگىندە بولعان. العاشقىدا ەر ادام جەرگىلىكتى اۋرۋحاناعا جەتكىزىلىپ، ارتىنشا يچان قالاسىنداعى مامانداردىڭ قاراۋىنا جىبەرىلگەن.

اۋرۋحاناداعى نەيروحيرۋرگيالىق ءبولىمنىڭ مەڭگەرۋشىسى چجاو دۋنگاننىڭ ايتۋىنشا ۇزىندىعى 8 سم بولاتىن شەگە ەمدەلۋشىنىڭ ميىنىڭ 5 سم بولىگىنە دەيىن ەنىپ كەتىپتى. زارداپ شەگۋشى اۋرۋحاناعا جەتكىزىلگەن كەزدە ول كومادا بولعان.

ءبىراق، شەگە ميداعى ماڭىزدى تامىرلاردى زاقىمداماعاندىقتان ونى الىپ شىعۋ مۇمكىن بولعان. پروسەدۋرانىڭ قيىن بولعانى سونشالىق دارىگەرلەر شەگەنى سۇيەك بولىگىمەن بىرگە سۋىرىپ الۋعا ءماجبۇر بولادى. بۇل ءبىرىنشى كەزەكتە ەمدەلۋشىنىڭ قاۋىپسىزدىگى ءۇشىن جاسالعان. وسىلايشا ەكى ساعاتقا سوزىلعان وپەراسيا ءساتتى وتەدى.

قازىرگى تاڭدا ەر ادام اۋرۋحانادا ەم قابىلداپ جاتىر. جاعدايعا نە سەبەپ بولعانى ناقتىلاپ انىقتالۋ ۇستىندە.