باسقارماداعىلار قازاقستان مۇسىلماندارى ءدىني باسقارماسىنىڭ وسىعان دەيىن بىرنەشە رەت ءدىني كيىم ماسەلەسىندە ءوزىنىڭ رەسمي ۇستانىمىن جاريالاعانىن ايتىپ وتىر، دەپ حابارلايدى قامشى اا tengrinews.kz-كە سىلتەمە جاساپ.

«قازاقستان مۇسىلماندارى ءدىني باسقارماسى ەلىمىزدەگى مۇسىلمان قىز-كەلىنشەكتەر مەن ايەلدەردى كيىم كيۋ ۇلگىسىندە شاريعات تالاپتارىن ساقتاي وتىرىپ، قازاق حالقىنىڭ سالت-داستۇرلەرىن ەسكەرىپ، جيناقى كيىنۋگە كەڭەس بەرەدى. كوزگە ەرسى كورىنەتىن، دەنە ءبىتىمىن ايقىندايتىن، قارا ءتۇستى كيىم-كەشەكتەردى پايدالانباعان دۇرىس. ال پارانجا (نيقاب) مەن قارا كيىم كيۋ - سالتىمىزعا قايشى، بۇل اتا-بابالارىمىزدىڭ جولى ەمەس»، - دەلىنگەن مالىمدەمەدە.

يسلام دىنىندە ساقال قويۋدىڭ دا وزىندىك ادەبى مەن مادەنيەتى بار ەكەنىن ايتقان ءدىني باسقارما وكىلدەرى مۇسىلمان جاماعاتىن ساقال قويۋدا ونىڭ جاراسىمىنا اسا ءمان بەرۋگە شاقىردى. ايتا كەتەيىك، كەشە، 19 ساۋىردە استانادا وتكەن ءىى رەسپۋبليكالىق يمامدار فورۋمىندا قمدب-نىڭ "حانافي ءمازھابى مەن ماتۋريدي سەنىم مەكتەبى - قازاقستانداعى يسلامنىڭ ءداستۇرلى جولى" اتتى ۇستانىمى جاريالانعان ەدى.

«وسى قۇجاتتا اتاپ كورسەتىلگەندەي، ەلىمىزدەگى بارشا مۇسىلمان قاۋىمىن ءتول ءمازھابىمىز - ءابۋ حانيفا ءمازھابىن ۇستانۋعا شاقىرامىز. ءبىر ءمازھاب ءبىزدى بىرلىككە، ىنتىماققا ۇندەپ، ءدىني الاۋىزدىقتان ساق بولۋعا شاقىرادى»، - دەدى قمدب وكىلدەرى.

ايتا كەتەيىك، كەشە، 19 ساۋىردە نۇرسۇلتان نازاربايەۆ قازاقستان مۇسىلماندارى ءدىني باسقارماسى وكىلدەرىمەن كەزدەسۋىندە قىسقا بالاق پەن ۇزىن ساقالدىڭ ءبىزدىڭ داستۇرگە ساي كەلمەيتىنىن ايتىپ، مۇندايعا زاڭ جۇزىندە تىيىم سالۋدى ۇسىنعاەن ەدى. 

«ءدىني ساۋاتسىزدىعىنىڭ ناتيجەسىندە جاستارىمىز ساقال قويىپ، شالبارىنىڭ بالاقتارىن قىسقارتىپ تاستايدى. قارا كويلەك كيىپ، بەتى-اۋزىن تۇمشالاعان قىزدارىمىزدىڭ قاتارى كوبەيدى. بۇل ءبىزدىڭ داستۇرىمىزگە دە، حالقىمىزعا دا جات. بۇعان زاڭنامالىق دەڭگەيدە تىيىم سالۋ ماسەلەسىن پىسىقتاۋ كەرەك. قازاق قارا كيىمدى قارالى كەزدە عانا كيەدى»، - دەگەن ەدى مەملەكەت باسشىسى.