قازاقستاندا جاقىن ارادا مۇسىلماننىڭ ورتاق كيىم ۇلگىسى پايدا بولادى. قىز-كەلىنشەكتەردى داستۇردەن وزباي، ءدىننىڭ تالاپتارىنا ساي كيىنۋىن ءدىني باسقارما ءوز موينىنا الدى، دەپ جازادى قامشى اقپاراتتىق اگەنتتىگى.
قازاقى كيىمنىڭ باستى مىندەتى قىزدارىمىزدى قارا جامىلعىدان ارىلتىپ، اق جاۋلىق، كەڭ ەتەك كويلەكتى قايتارۋ. قاۋعا ساقال، قىسقا بالاقپەن دە كۇرەس كۇشەيەدى. بۇدان بىلاي كىمدەر جانە قانداي ءتۇر-سۇرپات زاڭعا كەلتە كەلۋى ءمۇمىن؟
كتك جاڭالىقتار قىزمەتىنىڭ حابارلاۋىنشا، رەسمي اقوردا ساياسات، ەكونوميكادان قولى بوساپ، ەلدىڭ يدەولوگياسىنا مىقتاپ كىرىسكەن سىندى. ەندى پرەزيدەنت، ايتا-ايتا ابدەن جاۋىر بولعان قاۋعا ساقال مەن قارا جامىلعى داۋىنا سوڭعى نۇكتە قويۋعا پارمەن بەردى. ءتىپتى بولماي جاتسا، زاڭمەن تىيۋدى قاراستىرىڭدار دەپ قاتاڭ ايتتى. نازاربايەۆتان كۇنى كەشە تاپسىرما العان دىنگە جاۋاپتى مينيسترلىك ىسكە كىرىسىپ تە كەتتى.
«ساپسيعان ساقال، قىسقا بالاق ارقىلى مۇسىلماننىڭ سيپاتى ناسيحاتتالعاندا - بۇل قوعامدى ۇرەيلەندىرەدى. مۇسىلماندىق تۋرالى قالىپتاسقان قۇندىلىقتار جويىلادى. بۇل جەردە ءسوزسىز ۇلتتىق قاۋىپسىزدىككە نۇسان كەلەدى. سوندىقتان بۇل ءۇردىستى توقتاتار ناقتى شارالار قابىلدانۋى كەرەك»، دەدى ق ر ءدىن ىستەرى كوميتەتى ءتوراعاسىنىڭ مىندەتىن اتقارۋشى باقىتجان قۇلەكەيەۆ ءوز سوزىندە.
شارانىڭ ءبىرى مۇسىلماننىڭ سىرت كەلبەتى. ەندى قاپ-قارا بوپ الابوتەن بولعان قىزداردىڭ كيىمى ەندى اشىق ءتۇستى ورامال، كويلەكپەن الماستىرىلماق. ەڭ ءبىرىنشى مەدرەسە شاكىرتتەرىنە تىگىلەتىن مۇسىلماندىق كيىم ۇلگىلەرىن قوعام قۇپتاسا، كوپشىلىككە ۇسىنىلادى.
اعابەك قونارباي ۇلى، قازاقستان مۇسىلماندارى ءدىني باسقارماسىنىڭ وكىلى:
«ءدال قازىرگى ۋاقىتتا مەدرەسەدە وقىپ جاتقان قىزدارىمىزعا، شاكىرتتەرىمىزگە اشىق ءتۇستى، كوك ءتۇستى كيىم ۇلگىلەرىن دايىنداپ جاتىرمىز. ول كيىم ۇلگىلەرى شاريعاتقا دا ساي، داستۇرىمىزگە دە ساي، جالپى قوعام الدىندا وعاش كورىنبەيتىن كيىم ۇلگىسىن دايىنداپ جاتىرمىز».
مۇسىلمان كيىمىن بۇتىندەۋدەن بولەك، مولدالار الدىندا تۇرعان ودان زور مىندەت بار. جاماعاتتى ۇيىتا المايتىن، ءسوزى ءوتىمسىز يمامداردى مەملەكەت باسشىسى سىنادى. بۇدان بىلاي شاريعاتتان اسا المايتىن، سىڭارجاق دۇمشە مولدا ءدىن ىسىنەن شەتتەتىلۋى مۇمكىن.
دوساي كەنجەتاي، ءدىنتانۋشى:
«تىيىم دەگەن ماسەلە سىرتقى كورىنىستەگى ماسەلەلەردى سەن زورلىقپەن الىپ تاستاۋىڭ مۇمكىن. زورلىقپەن ساقالىن قىرىپ الىپ تاستاۋىڭ مۇمكىن. ءبىراق ىشكى جان دۇنيەسى، رۋحى، ءدىلى، سەنىم ماسەلەسىنە ءبىز ەشقاشان تىيىم سالا المايمىز. ولاردىڭ ءبارى شابلوندار، قۇندىلىقتار. سىرتتان كەلىپ جاتقان ءبىز ءۇشىن قۇنسىز قۇندىلىقتار».
ءدىنتانۋشى قۇنسىز قۇندىلىقتان ارىلماق كەرەك دەيدى. ال قاي قۇندىلىقتىڭ بىزگە بوتەن ەكەنىن پرەزيدەنت ءوزى تارقاتىپ بەرگەن بولاتىن.
نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:
«سوڭعى كەزدە ورىمدەي جاس جىگىتتەر ساقالىن ساپسيتىپ قويىپ، بالاقتارىن شورت كەسىپ كەلەدى. بەتىن تۇمشالاپ، بۇركەپ، قاپ-قارا كويلەك كيگەن قىزداردىڭ قاتارى كوبەيدى. ارينە اركىمنىڭ نە كيەمىن دەسە، ءوز ەركى، بوستاندىعى دەگەن ءسوز عوي. ول باسقا نارسە. مىناۋ ادەيىلەپ تۇرىپ، بىزگە قارسى شىعاتىن قازاقتى بولەتىن. قۇداي دەگەن ادامنىڭ جۇرەگىندە بولۋى كەرەك ەمەس پە؟».
پرەزيدەنتتەن پارمەن العان ءدىن ىستەرى مينيسترلىگى مۇفتياتپەن بىرىگىپ دەرەۋ ىسكە كىرىستى. مەشىتتەر جاماعاتتىڭ جۇرەگىندەگى قۇداي تۋرالى تۇسىنىكتى تۇزەسە، مينيسترلىك مۇسىلماننىڭ ءسىرت-پىشىنىن، كەرەك بولسا جىل سوڭىنا دەيىن بەكىتەمىز دەپ بەكىنىپ وتىر.
