12 مامىر كۇنى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا  كورنەكتى اكتەر، رەجيسسەر، قازاقستان جانە كسرو حالىق ءارتيسى، مەملەكەتتىك سىيلىقتاردىڭ لاۋرەاتى ءاسانالى ءاشىموۆتىڭ 80 جاسقا تولۋىنا وراي سالتاناتتى كەش وتەدى دەپ حابارلايدى قامشى اقپاراتتىق اگەنتتىگى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ باسپا ءسوز قىزمەتىنە سىلتەمە جاساپ. 

         ءاسانالى ءاشىموۆ 1937 جىلى 8 مامىردا جامبىل وبلىسى، سارىسۋ اۋدانى،  ساۋداكەنت (بۇرىنعى بايقادام) اۋىلىندا دۇنيەگە كەلگەن. 1956-1961 جج. قازاق مەملەكەتتىك قۇرمانعازى ۇلتتىق كونسەرۆاتورياسىنىڭ تەاتر فاكۋلتەتىن اكتەر ماماندىعى بويىنشا ءوقىپ-بىتىرىپ،  «قازاقفيلم» كينوستۋدياسىنا اكتەرلىك شتاتقا قابىلدانادى. ال، 1964 ج. بەرى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءۇزىلىسسىز ەڭبەك ەتىپ كەلەدى.

         تەاتردا نەگىزىنەن باستى رولدەردى سومداعان اكتەر م.اۋەزوۆتىڭ «ابايىندا» ايدار، كەرىم، «ەڭلىك-كەبەگىندە» كەبەك، «قاراقىپشاق قوبىلاندىسىندا» ايشۋاق،  «تاڭعى جارىعىندا» جاراسباي، ع.مۇسىرەپوۆتىڭ «قوزى كورپەش –بايان سۇلۋىندا» قودار، ن.حيكمەتتىڭ «ەلەۋسىز قالعان ەسىل ەرىندە» اسسيستەنت، ق.مۇحامەدجانوۆتىڭ «جات ەلدە» دراماسىندا اسان اقىن،  ت.احتانوۆتىڭ «بورانىندا» قاسبولات،  ش.ايتماتوۆ پەن ق.مۇحامەدجانوۆتىڭ «كوكتوبەدەگى كەزدەسۋىندە» يوسيف تاتايەۆيچ، ءا.نۇرپەيىسوۆتىڭ «قان مەن تەرىندە»  ەلامان،  ءا.ءتارازيدىڭ «كۇلمەيتىن كومەدياسىندا» ءسانجان، ي.ۆوۆنيانكونىڭ «اپاتىندا» اسان قارت، شەكسپيردىڭ «يۋليي سەزارىندە» يۋليي سەزار، م.ءفريشتىڭ «دون جۋاننىڭ دۋمانىندا» دون جۋان، گ.گاۋپتماننىڭ «ىمىرتتاعى ماحابباتىندا» دوكتور كلاۋزەن جانە ت.ب. كوپتەگەن رولدەرىمەن ۇلتتىق اكتەرلىك مەكتەپتىڭ دامۋىنا ولشەۋسىز ۇلەس قوستى.

         ول قازاق كينو ونەرىن جاڭا بەلەستەرگە  كوتەرۋ ءۇشىن كوپ ەڭبەك ءسىڭىردى.  وتىزدان اسا فيلمگە تۇسكەن اكتەردىڭ ەسىمىن، ۇلتتىق كينونىڭ ءتولقۇجاتىنداي بولعان «قىز جىبەكتەگى» بەكەجان،  «اتاماننىڭ اقىرى» مەن «ءترانسسىبىر جۇردەك پويىزىنداعى»  قاسىمحان شادياروۆ بەينەلەرى شەتەلدەردە تانىمال ەتتى.

         ا.ءاشىموۆ تەاتر مەن كينو سالاسىندا رەجيسسەرلىك قىزمەت ەتۋىمەن قاتار، ونەر قايراتكەرى رەتىندە ەلىمىزدەگى جانە شەتەلدەردەگى مادەني شارالارعا بەلسەندى ات سالىسادى. سونىمەن قاتار،  ت.جۇرگەنوۆ اتىنداعى قازاق ۇلتتىق ونەر اكادەمياسىندا  ءدارىس بەرىپ، تەاتر ونەرىنىڭ دامۋىنا وزىندىك ۇلەس قوسىپ جۇرگەن كوپتەگەن شاكىرتتەردى تاربيەلەگەن  ۇلاعاتتى ۇستاز.

         سۋرەتكەر تالانتىنىڭ تاعى ءبىر قىرى – جازۋشىلىق. ونىڭ «مايرانىڭ ءانى» (1995)، 5 تومدىق شىعارمالار جيناعى (2007)، «س ليۋبوۆيۋ، ۆاش اسانالي اشيموۆ» (2008)،  «عۇمىر-داريا» (2012) جيناقتارى قالىڭ وقىرماننىڭ سۇيىكتى شىعارمالارىنا اينالعان تۋىندىلار.

         ا.ءاشىموۆ بۇگىنگى تاڭدا م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى جانە قازاقستان تەاترلار اسسوسياسياسىنىڭ ءتوراعاسى رەتىندە ۇلتتىق ساحنا ونەرىنىڭ وركەندەۋىنە مول تاجىريبەسىمەن، ابىروي-بەدەلىمەن ەلەۋلى ۇلەس قوسىپ ءجۇر.

         ءاسانالى ءاشىموۆتىڭ ۇلتتىق ونەرگە قوسقان وراسان زور ەڭبەگى مەملەكەت تاراپىنان جوعارى باعالاندى.  ول قازاقستاننىڭ حالىق ءارتيسى (1976)، كسرو حالىق ءارتيسى (1980)، تاۋەلسىز «تارلان» سىيلىعىمەن (2000)، «وتان» (2001)، «قۇرمەت» (2007)، «پاراسات» (2007)، ق ر مادەنيەت جانە اقپارات مينيسترلىگىنىڭ «مادەنيەت ۇزدىگى» توسبەلگىسىمەن  (2012)،  جانە «دوستىق» (2014) رەسەي فەدەراسياسىنىڭ م.لومونوسوۆ اتىنداعى (2007) جانە يۋنەسكو -نىڭ  «التىن قىران» وردەندەرىمەن ماراپاتتالعان.

وتەتىن ورنى: م.اۋەزوۆ اتىنداعى قازاق مەملەكەتتىك اكادەميالىق دراما تەاترى (ۇلكەن زال)

ءوتۋ ۋاقىتى: 12 مامىر، 2017 جىل.

باستالۋى: 17.00