قاراعاندىلىق رەپ-ورىنداۋشىلار جەكپە-جەك شەبەرى سەرگەي موروزوۆقا ارناپ بەينەبايان ءتۇسىردى

    Zhazira Baidaly
    قاراعاندىلىق رەپ-ورىنداۋشىلار جەكپە-جەك شەبەرى سەرگەي موروزوۆقا ارناپ بەينەبايان ءتۇسىردى

    ەڭ تارتىستى سپورتتىق جارىستاردىڭ ءبىرى – ارالاس جەكپە-جەكتەن M-1 Challenge 76 حالىقارالىق ءتۋرنيرى 22 ءساۋىر نازراني (ينگۋشەتيا) قالاسىندا وتەدى. اتالمىش حالىقارالىق ارالاس جەكپە-جەكتە ەل نامىسىن ارالاس جەكپە-جەكتەر بويىنشا قازاقستان چەمپيونى، ازيا چەمپيوناتىنىڭ كۇمىس جۇلدەگەرى، ارالاس جەكپە-جەك بويىنشا الەم بىرىنشىلىگىنىڭ ۆيسە-چەمپيونى سەرگەي موروزوۆ قورعايتىن بولادى.

    تالانتتى سپورتشىنىڭ جانكۇيەرلەرى قاراعاندىلىق رەپ-ورىنداۋشىلار اكەجان لۇقپانوۆ پەن انتون زەنين سپورتشىنى قولداپ، ءان جازىپ، بەينەبايان ءتۇسىردى. ونداعى ماقساتتارى – قازاقستاندىقتاردى وتانداسىمىزعا جانكۇيەر بولۋعا شاقىرۋ.

    - بارلىعى ويلاماعان جەردەن بولدى. دوسىم اكەجان سەرگەيدىڭ مىقتى جىگىت ەكەنىن، كەرەمەت كۇرەسەتىنىن ايتتى. وسىلايشا ءبىز ءوز سپورتشىمىزدى قولداپ، بەينەبايان تۇسىرۋگە بەل بۋدىق. بۇل – قاناتتاندىراتىن ءان. وندا تەك سپورتشىمىزعا دەگەن قولداۋىمىز عانا ەمەس، وتانىمىز – قازاقستانعا دەگەن ىستىق ىقىلاسىمىزدى جەتكىزدىك،  - دەدى B.u.ll.d.o.G دەگەن لاقاپ اتتى رەپەر انتون.

    رەپ-ورىنداۋشى اكەجان DIEZO لۇقپانوۆ:

    - مەن ءوزىم ەكى جىل جەكپە-جەك ونەرىمەن اينالىسقانمىن. جانە سەرگەي موروزوۆتى كوپتەن بايقاپ ءجۇرمىن. ونىڭ كۇرەسۋ مانەرى، ادامگەرشىلىگى ۇنايدى. م1 Global حالىقارالىق كومپانياسىمەن كەلىسىمشارت جاساسقان العاشقى قازاقستاندىق سپورتشى بولعانىنا قاراماستان، قاراپايىمدىلىعىن جوعالتپاعان جان. سوندىقتان ونى قولداعىمىز كەلدى.

     حالىقارالىق تۋرنيردە قازاقستاندىق سپورتشىنىڭ قارسىلاسى برازيليالىق چەمپيون فابريسيو سارراف بولماق. سەرگەي موروزوۆ تۋرنيرگە دايىندىقتىڭ نەگىزگى كەزەڭىن اياقتادى. قازىرگى تاڭدا ول تاجىريبەلى باپكەرلەرىمەن تۋعان قالاسى اقتوبەدە جاتتىعۋدا.

    - ارينە، العا تۇسپەي-اق قويايىن. الايدا، تەك جەڭىسكە دەگەن ۇمتىلىس بار. مەن وندا جەڭۋ ءۇشىن بارام. بۇل جەكپە جەكتىڭ مەن ءۇشىن ماڭىزى ۇلكەن. وتكەن جولى ينگۋشەتيادا جەڭىلىس تاپقان ەدىم... ماعان بويىمدى تىكتەپ، قارىمتا قايتارۋعا مۇمكىندىك بەرگەنىنە قۋانىشتىمىن. مەنى ونداعىلار جاقسى بىلەدى، ماعان جانكۇيەر بولىپ، قولداۋ كورسەتۋدە. جەڭىس نە جەڭىلىس بولاتىنىن تەك رينگ شەشەدى. تەك شارشى الاڭدا عانا قارسىلاستىڭ قانداي ارتىقشىلىقتارى بار ەكەنى تۇسىنىكتى بولادى. الايدا مەن جەڭىس ءۇشىن بارا جاتىرمىن»، - دەيدى سپورتشى.

    ايتا كەتەيىك، M-1 Challenge – 2008 جىلدان باستاپ وتكىزىلە باستاعان ارالاس جەكپە-جەكتەر بويىنشا تۋرنيرلەردىڭ تۇتاس توپتاماسى. سودان بەرى الەمنىڭ ءتۇرلى ەلدەرىندە 75 تۋرنير ءوتىپ ۇلگەردى. 2010 جىلى كوماندالىق جارىستان الشاقتاپ، چەمپيوندار بەلدىگىن بەس سالماق دارەجەسىندە ويناتۋ تۋرالى شەشىم قابىلداندى.

    حالىقارالىق ارالاس جەكپە-جەكتى قازاقستاندىقتار ەۋرازيا ءبىرىنشى ارناسىنان 22 ءساۋىر كۇنى 23:00-دە تاماشالاي الادى. 

    قاتىستى ماقالالار