ءساۋىر ايىندا قازاقستاننىڭ بىرنەشە وبلىسىندا سۋ تاسقىنى تابيعي اپاتى بولدى. وسىعان وراي بانكتەر اراسىندا حالىق بانك العاشقى بولىپ، تاسقىننان زارداپ شەككەندەرگە 50 ميلليون تەڭگە قايىرىمدىلىق قاراجاتىن ءبولدى دەپ حابارلايدى قامشى اقپاراتتىق اگەنتتىگى.

«ءدال وسىنداي قيىن-قىستاۋ ساتتەرگە Halyk Bank جەتەكشىلەرى مەن قىزمەتكەرلەرى بەيجاي قاراپ قالمادى. اقتوبە، اقمولا، قوستاناي، شىعىس قازاقستان جانە قاراعاندى وبلىسىندا سۋ تاسقىنىنان زارداپ شەككەندەرگە #HalykFund قايىرىمدىلىق قورى ءار وڭىرگە 10 ملن تەڭگەدەن جالپى سوماسى 50 ملن تەڭگە ءبولدى.

قۇرمەتتى قازاقستاندىقتار، ءبىر كىسىدەي جۇمىلا، كومەك قولىن سوزايىق!»، - دەلىنگەن بانك حابارلاماسىندا.

وقىرماندى اقپاراتتاندىرا كەتسەك، توتەنشە جاعدايلار كوميتەتى جاريالاعان 27 ءساۋىر كۇنگى اقپاراتقا ساي ىس-شارالارمەن قاراعاندى وبلىسىندا بۇدان بۇرىن سۋ باسۋعا ۇشىراعان تۇرعىن ۇيلەردىڭ بارلىعى تاسقىن سۋىنان بوساتىلدى.

تۇرعىن ۇيلەردى تاسقىن سۋىن سورۋ جانە بۇرۋ جونىندەگى جۇمىستار 186 تۇرعىن ءۇيدى سۋ باسقان سولتۇستىك قازاقستان، شىعىس قازاقستان جانە قوستاناي وبلىستارىندا جۇرگىزىلىپ جاتىر.

سۋ تاسقىنىنا قارسى ءىس-شارالار اقمولا، جامبىل، اقتوبە جانە قاراعاندى وبلىستارىندا دا جالعاسىپ جاتىر.

اۆاريالىق-قۇتقارۋ جانە كەزەك كۇتتىرمەيتىن جۇمىستاردى جۇرگىزۋگە ءبىر تاۋلىك ىشىندە تج كوميتەتىنىڭ، جەرگىلىكتى اتقارۋشى ورگاندارىنىڭ، ۇلتتىق ۇلاننىڭ، ءىىد جانە تارتىلعان ۇيىمداردىڭ 1529 ادامى، 345 بىرلىك تەحنيكاسى، 16 سۋ سورۋ قۇرىلعىسى جانە 23 ءجۇزۋ قۇرالى جۇمىلدىرىلدى.

بىرلەسكەن كۇشتەرمەن حالىق پەن ءۇي جانۋارلارىن ەۆاكۋاسيالاۋ، سۋ سورۋ مەن بۇرۋ، قورعانىش ۇيىندىلەرىن نىعايتۋ، پسيحولوگيالىق كومەك كورسەتۋ، قورعانىش ۇيمەلەرىن مونيتورينگتەۋ، قورعانىش بوگەندەرىن تۇرعىزۋ، اۆتوجولدار مەن بوگەت دەنەسىن قالپىنا كەلتىرۋ، قۇم سالىنعان قاپتار مەن ينەرتتى ماتەريالداردى توسەۋ، توپىراق ۇيىندىلەرىن سالۋ، سۋ ايدىندارىن مونيتورينگتەۋ، جاعالاۋدى نىعايتۋ، سۋ دەڭگەيىن باقىلاۋ، قوعامدىق ءتارتىپتى قورعاۋ، تاۋلىك بويعى كەزەكشىلىك مەن پاترۋلدەۋ بويىنشا جۇمىستار جۇرگىزىلۋدە.

سۋ تاسقىنى كەزەڭىنىڭ باسىنان بەرى اقمولا جانە اقتوبە وبلىستارىندا 86 ادام قۇتقارىلدى، اقمولا، اقتوبە، جامبىل، قاراعاندى، سولتۇستىك قازاقستان، شىعىس قازاقستان جانە قوستاناي وبلىستارى ەلدى مەكەندەرىنىڭ 10 106 تۇرعىنى الدىن الا ەۆاكۋاسيالاندى. ولاردىڭ ىشىندە 6 622 ادام ءوز ۇيلەرىنە ورالدى، 30 ادام ەۆاكوپۋنكتتەردە جاتىر، 3454 ادام تۋىستارىندا ورنالاستىرىلدى.

ىقتيمال سۋ باسۋ ايماقتارىنان 21102 باس اۋىل شارۋاشىلىعى جانۋارلارى مەن قۇستار ءقاۋىپسىز جەرگە كوشىرىلدى. قازىرگى ۋاقىتتا 16 240 باس مال مەن باس جەكە شارۋاشىلىققا قايتا كەلدى.

ءقاۋىپتى ۋچاسكەلەردە 44708 مەتر ۋاقىتشا بوگەن تۇرعىزىلدى، ينەرتتى ماتەريالدارى بار 228019 قاپ تولتىرىلىپ، توسەلدى، 1،5 ملن. تەكشە مەتردەن استام سۋ سورىلدى.

سولتۇستىك قازاقستان جانە اقمولا تجد-دا «قاۋىرت جەلى» تەلەفوندارى جۇمىس ىستەۋىن جالعاستىرىپ جاتىر.