ۇكىمەت باسشىسى باقىتجان ساعىنتايەۆتىڭ پىكىرىنشە، بەبي-بوكستى پايدالانۋ تاستاندى بالالار ماسەلەسىن شەشپەي، كەرىسىنشە ولاردىڭ سانىنىڭ ارتۋىنا جانە وتباسىلىق قۇندىلىقتاردى ەسكەرە وتىرا، قوعامدا تەرىس پىكىردىڭ تۋىنداۋىنا اكەلۋى مۇمكىن، دەپ حابارلايدى قامشى اقپاراتتىق اگەنتتىگى Sputniknews.kz پورتالىنا سىلتەمە جاساپ.

ءماجىلىس دەپۋتاتى باقىتگۇل حامەنوۆا تاستاندى سابيلەر ماسەلەسىنە الاڭداۋشىلىق تانىتىپ، ۇكىمەت باسشىسى باقىتجان ساعىنتايەۆقا دەپۋتاتتىق ساۋال جولداعان بولاتىن. ول تىعىرىقتان شىعار ءبىر جول رەتىندە بۇعان دەيىن دە دەپۋتاتتار ۇسىنعان «بەبي-بوكس» دەپ اتالاتىن ءۇمىت بەسىكتەرىن ورناتۋدى تاعى كوتەرگەن ەدى.

«بەبي-بوكس دەپ اتالاتىن ءۇمىت بەسىكتەرى بۇگىندە ءبىراز ەلدە بار. باتىستاعى كوپتەگەن ەل اۋرۋحانا جانىنا قويىلاتىن جاشىكتەردىڭ ارقاسىندا مىڭداعان نارەستەنىڭ ءومىرىن امان ساقتاپ قالدى. قارا سۋىق پەن يت-قۇستىڭ جەمتىگىنە اينالعانشا، وزگە ەلدەردە كەڭىنەن تاراعان تاستاندى نارەستەلەرگە ارنالعان ءۇمىت بەسىكتەرىن ورناتۋ تىعىرىقتان شىعار امال ما دەرسىڭ؟»، — دەگەن ەدى دەپۋتات ءماجىلىس وتىرىستارىنىڭ بىرىندە.

باقىتجان ساعىنتايەۆ دەپۋتاتتىڭ ساۋالىن ءبىر اي قاراستىرىپ جاۋاپ بەرگەن. پرەمەر-مينيستردىڭ جاۋابىندا جازىلعانداي، «Baby box» ورناتۋعا قاتىستى الەمدىك تاجىريبە كوڭىل كونشىتپەيدى. سوڭعى ون جىلدا ەۋروپالىق وداقتىڭ 11 ەلىندە 200-گە جۋىق بەبي-بوكستىڭ ورناتىلۋى تاستاندى بالالار سانىنىڭ ازايۋىنا اكەلگەن جوق. شۆەسيا، ۆەنگريا، گەرمانيا، اۆستريا سياقتى ەلدەر تاستاندى بالالارعا ارنالعان بەبي-بوكستاردى پايدالانۋدىڭ تيىمسىزدىگىنە بايلانىستى مۇنداي تارجىربيەدەن باس تارتقان.

«يۋنيسەف، بۇۇ-نىڭ بالالاردىڭ قۇقىقتارىن قورعاۋ كوميتەتى، ادام قۇقىعى بويىنشا جوعارعى كوميسسار ءوفيسى دە ءار بالانىڭ ءوز اتا-اناسىن ءبىلۋ قۇقىعىن بەكىتەتىن بالا قۇقىقتارى تۋرالى كونۆەنسيانىڭ نورمالارىنا قايشى كەلەتىندىكتەن، بەبي-بوكستاردى ورناتۋدان باس تارتۋدى ۇسىنعان بولاتىن. بەبي-بوكستاردى ورناتۋ 2011 جىلعى 26 جەلتوقسانداعى «نەكە (ەرلى- زايىپتىلىق) جانە وتباسى تۋرالى» كودەكستىڭ 47،70- باپتارىنىڭ، سونداي-اق 2014 جىلعى 3 شىلدەدەگى ق ر قىلمىستىق كودەكسىنىڭ 119، 140، 141-باپتارىنىڭ تالاپتارىن بۇزادى»، — دەپ جازىلعان جاۋاپتا.

«باستىسى، بەبي-بوكستاردى پايدالانۋ كوشەدە قالدىرىپ كەتكەن نارەستەلەردىڭ شەتىنەپ كەتۋ پروبلەمالارىن شەشپەي، تاستاندى بالالار سانىنىڭ ارتۋىنا جانە وتباسىلىق قۇندىلىقتاردى ەسكەرە وتىرا، قوعامدا تەرىس پىكىردىڭ ورىن الۋىنا اكەلۋى مۇمكىن»، — دەيدى ساعىنتايەۆ.

قازىرگى ۋاقىتتا بالادان باس تارتۋدىڭ الدىن الۋ سياقتى الەۋمەتتىك ماڭىزدى ماسەلەنى شەشۋ ءۇشىن «انا ءۇيى» قوعامدىق قورى بارلىق وڭىردە 25 داعدارىس ورتالىعىنىڭ بازاسىندا ءومىردىڭ قيىن جاعدايىنا تاپ بولعان ايەلدەر ءۇشىن ارنايى جوباسىن ىسكە اسىرۋدا.

ستاتيستيكا بويىنشا اي سايىن داعدارىس ورتالىعىنا جاڭا تۋعان نارەستەمەن 45-كە جۋىق انا تۇسەدى ەكەن.

«انا ءۇيى» جوباسىنىڭ وڭ تاجىريبەسىن ەسكەرە وتىرىپ، مەملەكەتتىك ورگاندار مەملەكەتتىك ەمەس ۇيىمدارمەن بىرلەسىپ، نارەستەلەردىڭ ءومىرىن ساقتاپ قالۋ، وتباسىلىق قۇندىلىقتاردى نىعايتۋ بويىنشا جۇرگىزىپ جاتقان باسقا دا كەشەندى شارالارىمەن بىرگە جالعاساتىن بولادى. وسى ماقساتتا ۇكىمەت ۋاكىلەتتى مەملەكەتتىك ورگاندارعا كورسەتىلگەن پروبلەمالاردى شەشۋگە باعىتتالعان قوسىمشا شارالار قابىلداۋ تاپسىرماسىن بەردى»، — دەپ جازىلعان جاۋاپ حاتتا.

كامەلەتكە تولماعاندار اراسىنداعى جۇكتىلىك سانى سوڭعى ەكى جىلدا 4702-دەن 4090-عا، كامەلەتكە تولماعاندار اراسىنداعى تۇسىك تاستاۋ 700-دەن 564-عا دەيىن تومەندەگەن، ەرتە ديسپانسەرلىك باقىلاۋمەن قامتىلعان جۇكتىلەر سانى 78،1%-دان 81،6%-عا دەيىن ارتقان.