قازاقستاندا بۇگىن پارلامەنت سەناتى دەپۋتاتتىعىنا كانديدات ۇسىنۋ باستالدى. وسىنىڭ قارساڭىندا ەل پرەزيدەنتى نۇرسۇلتان نازاربايەۆ سەنات دەپۋتاتتارىنىڭ كەزەكتى سايلاۋىن ماۋسىمنىڭ 28ء-ى كۇنى وتكىزۋ تۋرالى جارلىق شىعارعان، دەپ حابارلايدى قامشى  اقپاراتتىق اگەنتتىگى azattyq.org-كە سىلتەمە جاساپ.

ورتالىق سايلاۋ كوميسسياسى ءتوراعاسى بەرىك يماشيەۆتىڭ ايتۋىنشا، 2011 جىلعى تامىزدىڭ 19-ىندا سايلانعان سەنات دەپۋتاتتارىنىڭ وكىلەتتىگى بيىل تامىزدىڭ 31-ىندە اياقتالادى. بيىلعى سايلاۋدا قازاقستاننىڭ 16 وڭىرىنەن سەناتقا ءبىر-بىر دەپۋتاتتان سايلانادى. سەنات دەپۋتاتتىعىنا كانديدات ۇسىنۋ مامىردىڭ 28-ىنە دەيىن، ولاردى تىركەۋ - ماۋسىمنىڭ 7-ىنە شەيىن جۇرگىزىلەدى.

قازاقستان زاڭناماسى بويىنشا، سەنات دەپۋتاتى جاناما سايلاۋ جولىمەن – جەرگىلىكتى ءماسليحاتتار دەپۋتاتتارىنىڭ داۋىس بەرۋى ارقىلى سايلانادى. كونستيتۋسيا مەن سايلاۋ تۋرالى زاڭعا سايكەس، جاسى 30-عا تولعان، جوعارى ءبىلىمى بار جانە جۇمىس ستاجى بەس جىلدان كەم ەمەس، ەل اۋماعىندا سوڭعى ون جىل بويى جانە ءوزى داۋىسقا تۇسەتىن ءوڭىر اۋماعىندا كەمىندە ءۇش جىل تۇراقتى تۇراتىن قازاقستان ازاماتى پارلامەنت سەناتىنىڭ دەپۋتاتى بولا الادى.

پارلامەنت سەناتىنداعى 47 دەپۋتاتتىڭ 15ء-ىن ەل پرەزيدەنتى تاعايىندايدى، 32ء-سىن (ەل استاناسى مەن رەسپۋبليكالىق ماڭىزى بار قالادان جانە ءار وبلىستان ەكى-ەكى ادامنان) جەرگىلىكتى ءماسليحاتتار 6 جىلعا سايلايدى. دەپۋتاتتاردىڭ جارتىسى ءۇش جىل سايىن جاڭارىپ تۇرادى. سوڭعى رەت سەنات سايلاۋى 2014 جىلى قازاندا وتكەن.