سيرياعا كوشىپ كەتىپ، ەكى جىل دايش قۇرامىندا بولعان بريتاندىق ارۋ ءوز ەلىنە ورالىپ، سوت ۇكىمىن كۇتۋدە. قىزىنىڭ وقيعاسى جايىندا سوتقا تولىق اقپاراتتى اكەسى ايتىپ بەرگەن، دەپ حابارلايدى قامشى اقپاراتتىق اگەنتتىگى شەتەلدىك life.ru باسىلىمىنا سىلتەمە جاساپ.

يسلام ءدىنىن قابىلداعان 22 جاستاعى كولسوما بەگۋم مەن ونىڭ 23 جاستاعى كۇيەۋى ستەفان اريستيدۋ تۇتقىندالىپ، وتكەن اپتادا تۇركيا بيلىگىنە قايتارىلعان بولاتىن. بريتاندىق وتباسىلىق جۇپ 2015 جىلى دايش قۇرامىنا كىرگەن. كەيىننەن سيريا شەكاراسىنا جاقىن ورنالاسقان تۇركيانىڭ كيليس قالاسىندا ەكسترەميستىك سيپاتتاعى قىلمىس جاسادى دەگەن ايىپپەن تۇتقىنعا الىنعان بولاتىن.

سوعىس ءجۇرىپ جاتقان ەلدە كولسوما ءبىر بالا بوسانعان، كەيىننەن ونى ۇلىبريتانياعا قايتارۋعا تالپىنعان. وتباسىلىق جۇپتىڭ ايتۋىنشا، ولار دايش-تىڭ قۇرامىنا شاريعات زاڭىدارى بويىنشا ءومىر ءسۇرۋ ماقساتىندا قوسىلعان، الايدا ونىڭ ەكسترەميستىك باعىتتاعى ۇيىم ەكەندىگىن بىلگەننەن سوڭ دەرەۋ باس ساۋعالاۋعا تىرىسقان. ال ءوزىنىڭ تۋعان جەرلەرىنە كەلۋ ءۇشىن، ولار ەڭ الدىمەن سوتتىڭ الدىندا جاۋاپ بەرۋلەرى ءتيىس.

«ولار جاستىقپەن ىستەگەن قاتەلىكتەرىنىڭ جازاسىن وتەۋى قاجەت. دەگەنمەن كەز كەلگەن ادام ەكىنشى مۇمكىندىك الۋعا لايىقتى دەپ ويلايمىن»، - دەپ مالىمدەدى كولسومانىڭ اكەسى احمەد ءالي.

اكەسى قىزىنىڭ ستەفانعا تۇرمىسقا شىعىپ، سيرياعا كەتۋ جايلى پىكىرىن قۇپ كورمەي، كىنالاعان. 2015 جىلى تۇرمىس قۇرعان ۋاقىتتا قىز اكۋشەر ماماندىعىندا وقىپ جۇرگەن بولاتىن. ال ءقازىر احمەد ءالي قىزىنىڭ ءوز قاتەلىگىن تۇسىنگەندىگىن، دايش-تىڭ قانداي ۇيىم ەكەندىگىن بىلگەننەن سوڭ تۋعان جەرىنە ورالۋعا شەشىم قابىلداعاندىعىن ايتىپ، قورعاۋ ۇستىندە.

كولسوما اكەسىنىڭ سوزىنە قارسى شىعىپ، باسقا مەملەكەتكە قاشىپ كەتىپ، سول جەردە تۇرمىسقا شىققان. ءبىر كۇندە جوعالىپ كەتكەن قىزىنىڭ ەلدەن كەتىپ قالعاندىعىن اكەسى باستاپقىدا بىلمەگەن دە. لوندون قالاسىنداعى پاتەرلەرىنە پوليسيا قىزمەتكەرلەرى باسا-كوكتەپ كىرىپ، اكەسىنە ءمان-جايدى تۇسىندىرگەن ەكەن.

«مەنىڭ قىزىمدى سيرياعا كەتىپ قالدى دەگەن سوزدەرىنە باسىندا سەنە المادىم»، - دەيدى احمەد ءالي.

وتباسىلىق جۇپتىڭ ايتۋىنشا، ولار سيريادا اباقتىدا تۇرعان سەكىلدى ءومىر سۇرگەن جانە دە سوتتا جاۋاپ بەرۋگە دايىن ەكەندىكتەرىن، تەك انگليادا تۇرۋعا رۇقسات بەرگەندەرىن قالاپ وتىر. دەرەكتەرگە سايكەس، اريستيدۋدىڭ قانداي دا ءبىر تەرروريزمگە قاتىسى بار ەكەندىگى انىقتالسا، وعان 15 جىلعا باس بوستاندىعىنان ايىرىلۋ ءقاۋىپى ءتونىپ تۇر.

اۋدارعان: نازەركە لابيحان