تۋعان كۇندى كوپشىلىگىمىز اسىعا كۇتەمىز.  سىيلىق الۋ، كوپشىلىكتىڭ ىقىلاسىنا بولەنۋ، جىلى لەبىزدەر ەستۋ – ىزگىلىكتىڭ ءبارى وسى اتاۋلى كۇندە بولىپ جاتادى. تۋعان كۇندى تويلاۋ قايدان شىقتى؟ وسى سۇراققا قامشى اقپاراتتىق اگەنتتىگى جاۋاپ ىزدەپ كوردى.

تاريحقا ۇڭىلسەك، ەرتەدە فاراوندار «قۇدايدىڭ بالالارى» بولىپ ەسەپتەلدى، ولاردىڭ دۇنيەگە كەلگەن كۇندەرى مەمەلەكەتتىك مەرەكە سانالاتىن. بۇل اتاۋلى كۇندە ءاربىر تۇرعىن پاتشاعا شاماسى جەتكەن ەڭ باعالى سىيلىق اكەلەتىن. پاتشايىمداردىڭ تۋعان كۇنىندە ءاربىر قىزمەتكەر پاتشايىمدى تاڭعالدىرۋ ءۇشىن ادام تاتىپ كورمەگەن جەمىس-جيدەكتەردى الىس-الىس جەرلەردەن الدىراتىن. پاتشاعا ارناپ ەڭ ادەمى جانۋارلاردى قۇرباندىققا شالۋ ەرەكەشە قۇرمەتتىڭ بەلگىسى بولىپ ەسەپتەلگەن. وسىدان كەيىن، حالىق وزدەرىنىڭ وتباسىنداعى باستى تۇلعانىڭ دۇنيەگە كەلگەن مەرزىمىن اتاپ ءوتۋدى داستۇرگە اينالدىرعان. وسىلايشا، تۋعان كۇن قوعامنىڭ ءاربىر مۇشەسى ءۇشىن اتالۋى كۇنگە اينالعان.

ءبىزدىڭ بۇگىنگى كۇندە تۋعان كۇندى تورتپەن وتكىزۋ ءداستۇرى  نەمىس حالقىنان شىققان. ولار تۋعان كۇن يەسىن ەرتە وياتىپ، شاقىرىلعان قوناقتارعا بىرگە دايىندالىپ، كەشكى اس باستالماس بۇرىن ءۇيدىڭ وتاناسى ازىرلەگەن بالىشكە بالاۋىز ورناتىپ، تۋعان كۇن يەسىنە ۇسىنعان. تۋعان كۇن يەسى ىشىنەن تىلەك ايتىپ، بالاۋىزدى وشىرگەن. وسى ءسات سالتاناتتى وتباسىلىق داستارحاننىڭ اشىلۋ بەلگىسى بولىپ ەسەپتەلگەن. 

ەجەلدەن، شىركەۋ سەكىلدى ءدىني ورىندار تۋعان كۇن تويلاۋعا رۇقسات بەرمەگەن. سەبەبى، ادام جاسى قانشالىقتى ۇلعايسا، ونىڭ كۇنالارى دا سونشالىقتى كوپ بولادى. مۇنداي جاعدايدى تويلاتۋ دۇرىس ەمەس دەپ ەسەپتەلگەن.  قايتا ورلەۋ داۋىرىنەن باستاپ، اتالعان ىرىمدى باسقاشا تۇسىندىرۋشىلەر پايدا بولدى: ادامعا ءبىر جاس قوسىلسا، ول قۇدايعا ءبىر تابان جاقىندايدى.  قازىرگە دەيىن، وسى ءداستۇر بويىنشا ءارتۇرلى دىندەردە تۋعان كۇندى جىلى لەبىزدەر ايتىپ، جاقىن ادامدار اراسىندا تويلاۋعا رۇقسات بەرىلگەن. الايدا، ونى شۋلاتىپ، الكوگولدى پايدالانىپ، ەس كەتكەنشە تويلاتۋعا ەشقانداي دىندە رۇقسات بەرىلمەگەن.

قالاي بولعاندا دا، جىلدىڭ 365 كۇنىنىڭ ءبىر كۇنىن ەرەكشە قارسى الىپ، وزىڭە نازار اۋدارىپ، جالعىز ەمەس ەكەنىڭدى سەزىنۋ ارتىق ەتپەسى انىق. تۋعان كۇندە ىستىق ىقىلاسقا بولەيتىن جاقىندارىڭىز كوپ بولعاي!

دايىنداعان: الينا بولاتبەك