ءوز ىسىنە ادال كاسىپكەر مەملەكەتتىڭ، باسپا ءسوز بەن قوعامنىڭ ەرەكشە نازارىندا بولۋى كەرەك
«اتامەكەن» ق ر ۇلتتىق كاسىپكەرلەر پالاتاسىنىڭ ءتورالقا ءتوراعاسى تيمۋر قۇلىبايەۆ جۇمىس ساپارىمەن الماتى وبلىسىنداعى كاسىپورىندارعا بارىپ، ءوڭىر ماسەلەلەرىن تالقىلاۋ ءۇشىن كاسىپكەرلەرمەن كەزدەستى. ءتورالقا ءتوراعاسى تالدىقورعاندا وبلىس اكىمى اماندىق باتالوۆ، وڭىرلىك كەڭەس مۇشەلەرى، قۇقىق قورعاۋ ورگاندارىنىڭ باسشىلارى، بيزنەس-قاۋىمداستىقتار، بانكتەر مەن قارجىلىق ينستيتۋتتاردىڭ وكىلدەرى جانە تاۋار وندىرۋشىلەردىڭ قاتىسۋىمەن كەڭەيتىلگەن جيىن وتكىزدى.
ۇلتتىق پالاتا باسشىسى ءوز سوزىندە ءىسىن ادال اتقارىپ وتىرعان كاسىپكەرلەر مەملەكەتتىڭ قامقورلىعىندا بولۋى كەرەك ەكەنىن اتاپ ءوتتى.
«ءبىز ق ر باس پروكۋراتۋراسىمەن مەملەكەتتىك ورگانداردىڭ باقىلاۋ-قاداعالاۋ قىزمەتىن ازايتۋعا قاتىستى ماڭىزدى جۇمىستى جالعاستىرامىز. كاسىپكەرگە قاتىستى جۇرگىزىلەتىن 28 مىڭ باقىلاۋ-قاداعالاۋ قىزمەتىنىڭ ۇشتەن ەكى بولىگى قىسقارتىلادى، قالعانى، بيزنەس مۇددەسىنە اكىمشىلىكتەندىرىلەدى. ءبىز ادال كاسىپكەردىڭ مەملەكەتتىك ساياساتتىڭ ورتاسىندا بولعانىن قالايمىز. ادال كاسىپكەر مەملەكەتتىڭ قامقورلىعىنا الىنۋى كەرەك. مۇنداي كاسىپكەرگە ءباسپاسوزدىڭ دە، قوعامنىڭ دا ايرىقشا نازارى اۋدارىلۋى ءتيىس»، – دەدى تيمۋر قۇلىبايەۆ.
ۇلتتىق پالاتا ءتورالقا ءتوراعاسى ەلباسىنىڭ قولداۋىمەن «اتامەكەن» ۇكپ ادال كاسىپكەرلەردىڭ بيزنەستى جۇرگىزۋىنە وڭتايلى جاعدايدى قامتاماسىز ەتۋ ءۇشىن جانە شاعىن جانە ورتا بيزنەستەن تۇسەتىن سالىق اۋدارىمدارىنىڭ بولىگى سول وڭىردە قالۋ ءۇشىن قولدانىستاعى سالىق كودەكسىنە وزگەرتۋ ەنگىزۋگە قاتىستى جۇمىستى قارقىندى جۇرگىزىپ جاتقانىن ايتتى. بۇل تيىسىنشە جەرگىلىكتى بيلىكتى بيزنەستى دامىتۋعا جاعداي جاساۋعا ىنتالاندىرادى.
«ءبىز سالىق اكىمشىلىگىنە قاتىستى ماسەلەلەر تۋىندايتىنىن كاسىپكەرلەردەن كەلەتىن كوپتەگەن وتىنىمنەن بايقادىق. كاسىپكەرلەردى زاڭسىز تەكسەرۋلەردەن، سالىق ورگاندارىنىڭ سوتىندا نەمەسە باسقا دا سوتتا ءوز مۇددەلەرىن قورعاۋ قاجەتتىلىگىنەن شەكتەۋ كەرەك. وسى ماقساتتا مينيسترلىكتەرگە ءوز ۇسىنىستارىمىزدى بەردىك. (...) ۇلتتىق پالاتا ساراپتامالىق پىكىر ءبىلدىرىپ، سوتتا قورعايدى جانە ادال كاسىپكەرلەردى قولداۋ جۇمىسىن جالعاستىرا بەرەدى»، – دەپ ناقتىلادى تيمۋر قۇلىبايەۆ.
الماتى وبلىسىندا كاسىپكەرلىكتىڭ 118 مىڭ سۋبەكتىسى جۇمىس ىستەيدى، ونىڭ ىشىندە 97 مىڭى، ياعني 82%-ى اۋىلدىق جەردە.
