الماتى قالاسىنىڭ اكىمى باۋىرجان بايبەكتىڭ قىزمەتى ءوسىپ استاناعا قايتۋى مۇمكىن دەپ جازادى قامشى اقپاراتتىق اگەنتتىگى.

بەيرەسمي دەرەككوزدەردىڭ مالىمدەۋىنشە ەرتەڭ استانادا ءبىرقاتار كادرلىق وزگەرىستەر مەن تاعايىنداۋلار ورىن الۋى مۇمكىن. ونىڭ ىشىندە الماتى اكىمى باۋىرجان بايبەكتىڭ استاناعا قايتۋ ىقتيمالى باسىم. اكىمنىڭ قىزمەتى اقوردادان ءبىراق شىعۋى مۇمكىن دەيدى بىلەتىندەر. ساراپشىلار ونى پرەزيدەنت اكىمشىلىگىنە لايىق كورەدى. ولاي دەيتىن نەگىز دە بار، ويتكەنى باۋىرجان بايبەك پرەزيدەنت اكىمشىلىگىندە بۇعان دەيىن دە اتتاي 8 جىل قىزمەت اتقارعان. ونىڭ كەيىنگى ءتورت جىلىن پرەزيدەنت اكىمشىلىگى جەتەكشىسىنىڭ ورىنباسارى رەتىندە وتكەردى. ول ەرتە جاسىنان پرەزيدەنت سەنىمىنە بولەنىپ، اينالاسىنان تابىلعان ساناۋلى جاستاردىڭ ءبىرى.

بۇعان دەيىن دە باۋىرجان بايبەك استاناعا اۋىسقالى جاتىر دەپ بىرنەشە سىبىس شىققان. الايدا، ءتورت بىردەي وبلىستىڭ اكىمىن اۋىستىرعان ەلباسى الدىڭعى جولى باۋىرجان قىدىرعاليۇلىن استاناعا اكەتكەن جوق. وسى جولى ونىڭ استاناعا قايتۋىنا دا سەبەپتەر بار. باۋىرجان بايبەك ءاۋ باستا الماتىدا XXVIII قىسقى ۋنيۆەرسيادا ويىندارىن ءساتتى وتكىزۋ ميسسياسىمەن اكىم بولىپ تاعايىندالعان بولۋى مۇمكىن. الماتى «اق وليمپيادانى» شىپ-شىرعاسىن شىعارماي-اق وتكەردى. الماتىنىڭ مىڭ جىلدىعىن دا باۋىرجان بايبەك دۇبىرلەتىپ تويلاپ بەردى. ونىڭ كەزىندە ەسىموۆتىڭ كەزىندەگىدەي قار قالىڭ تۇسسە دە كۇرەلمەي قالعان جوق. اللا ساقتاپ سۋ تاسقىنى سياقتى ۇلكەن اپات تا بولمادى. قالانىڭ حالقى ءوستى، ەكونوميكاسى ارتتى. ءبىرسىپىرا جول جاسالدى. جالپى، باۋىرجان بايبەك اكىم قىزمەتىندە ابىرويمەن كورىنە ءبىلدى.

ول استاناعا كىمنىڭ ورنىنا كەتەدى؟ الماتىعا كىم كەلەدى؟ بۇل سۇراقتارعا جاۋاپ كوپ. پرەزيدەنت اكىمشىلىگىن ەكى مارتە باسقارعان ادىلبەك جاقسىبەكوۆ زاڭعا ساي شىلدە ايىندا زەينەتكە شىعادى. وسى قارساڭدا ەلباسى جاقسىبەكوۆتى الدەقايدا تىنىشىراق «سامۇرىق-قازىنا» ءۇاق-ڭ باسقارما ءتوراعاسى قىزمەتىنە اپارۋى مۇمكىن.  ول قازىنادان حابارسىز ادام ەمەس. مەملەكەتتىك قىزمەتكە كەلەر الدىندا ۇزاق جىل كورپوراسيا باسقارعان. ال، ادىلبەك ىرىسكەلدىۇلىنان 10 جاسقا جاس ءومىرزاق شوكەيەۆ الماتىعا اكىم بولىپ كەلۋى بەك مۇمكىن. بۇعان دەيىن دە تۇرعىنى ەڭ كوپ وبلىستى باسقارعان تاجىريبەسى بار شوكەيەۆ كەلىپ الىپ الماتىنى، ءىرى مەگاپوليستى باسقارادى دەگەن سىبىس شىققان. بۇلاي بولعان جاعدايدا مارات ءتاجين باۋىرجان بايبەككە ورىنباسار بولا ما؟ كەرىسىنشە بولا ما؟ انىعىن پرەزيدەنت بىلەدى. بىزدىكى ورەكپىگەن كوڭىل عانا.

نۇرعالي نۇرتاي