استاناداعى ۇلتتىق مۋزەيدە 4 مامىردا جەڭىستىڭ 72 جىلدىعىنا ارنالعان كورمە اشىلدى، دەپ جازادى قامشى اقپاراتتىق اگەنتتىگى.
حابار ارناسى تىلشىلەرىنىڭ حابارلاۋىنشا، وندا ۇلى وتان سوعىسى ارداگەرلەرىنىڭ فوتوسۋرەتتەرى، جەكە زاتتارى مەن تاريحي جادىگەرلەر قويىلعان. قاندى شايقاستى بەينەلەيتىن ديورامالاردى دا كەزدەستىرۋگە بولادى. كورمە ەكى اپتا بويى وتەدى. ماقسات – جاستاردى وتانسۇيگىشتىككە باۋلىپ، ەلى ءۇشىن جانىن پيدا ەتكەن باتىرلاردىڭ ەسىمىن جاڭعىرتۋ.
«ەشكىم دە، ەشقاشان دا ۇمىتىلمايدى!» ۇلى جەڭىستى سىيلاعان جاۋىنگەرلەر ەرلىگى ماڭگىلىك ەل ەسىندە. وسكەلەڭ ۇرپاق تا ولاردى قۇرمەتتەۋگە ءارى ۇلگى تۇتۋعا مىندەتتى. بۇگىنگى ۇلتتىق مۋزەيدە ۇيىمداستىرىلعان جەڭىستىڭ 72 جىلدىعىنا ارنالعان كورمە قاھارماندارىمىزدىڭ ەرلىگىن دارىپتەيدى.
"بارلىق قۇجاتتار مۇراعاتتان الىنعان. كورمەگە سوعىس ارداگەرلەرىنىڭ سۋرەتتەرى، مەدالدارى جانە جەكە زاتتارى قويىلدى. ءتىپتى جاۋىنگەرلەردىڭ حاتتارى بار"، - دەيدى ق ر ۇلتتىق مۋزەيى ەكسپوزيسيا جانە كورمە قىزمەتىنىڭ جەتەكشىسى توعجان ادىلبەكوۆا.
ءوز جەرىن جاۋعا تاپتاتپاي، شىبىن جاندارىن شۇبەرەككە ءتۇيىپ، قاسىق قانى قالعانشا شايقاسقان باتىرلارىمىزدىڭ ەرلىكتەرىن باياندايتىن كىتاپتار دا كورمەگە قويىلعان. سۇم سوعىسقا توتەپ بەرگەن جۋىنگەرلەردىڭ قارۋ-جاراقتارى مەن جەكە زاتتارى بۇگىندە مۇراجايدىڭ باستى جادىگەرلەرىنە اينالعان.
مانشۇك مامەتوۆا ماكسيم پۋلەمەتىمەن تالاي جاۋدىڭ كوزىن جويعاندىعى بەلگىلى. ارينە، بۇل پۋلەمەتتىڭ رەستاۆراسيا جاسالعان ءتۇرى. كورمەگە 150-دەن استام ەكسپونات قويىلعان. ولاردىڭ بارلىعى 1941-45 جىلدار ارالىعىنداعى ۇلى وتان سوعىسىنان سىر شەرتەدى.
ق ر ۇلتتىق مۋزەيىنىڭ قىزمەتكەرى سەرىك ءابدىراحمانوۆ تاريحي فوتولارعا قاراپ، ورنالاسقان جەردىڭ رەكونسترۋكسياسىن جاساعان. ونىڭ ايتۋىنشا، ءار جاسالعان دۇنيە ەستەتيكا جاعىنان بالالاردىڭ موتوريكاسىن دامىتادى، ءارى كورەرمەندەر وتكەن شايقاستاردىڭ تەحنيكاسى قالاي بولعانىن كورەدى.
ءبىز سۇم سوعىستى كورگەن جوقپىز. ول ءۇشىن 72 جىل بۇرىن جەڭىس سىيلاعان قاھارماندارىمىزعا قارىزدارمىز. قانشاما جاۋىنگەر ۇرىس دالاسىنان قايتپاي قالدى، قاپىدا قولعا تۇسكەندەرى نەمىس تۇتقىنىندا ازاپ شەكتى. ەلى ءۇشىن جانىن پيدا ەتتى.
