جايىق وزەنىنىڭ تاسىپ، سۋدىڭ كوتەرىلۋىنە بايلانىستى جەتى حان جەرلەنگەن سارايشىقتى سۋدان قورعاۋ جۇمىسى ۋاقىتشا توقتاتىلدى دەپ حابارلايدى قامشى اقپاراتتىق اگەنتتىگى اتىراۋ وبلىسى باسپا ءسوز قىزمەتىنە سىلتەمە جاساي وتىرىپ.

جاعانى بەكىتۋمەن اينالىسىپ جاتقان باس مەردىگەر “ايس-استانا” كومپانياسىنىڭ وكىلى اسقار تولەنوۆتىڭ ايتۋىنشا، جۇمىستىڭ ۋاقىتشا توقتايتىنى اۋەل باستا بەلگىلى بولعان، سوندىقتان بۇل كىدىرىس 2018 جىلى اياقتالۋى كەرەك جوبانىڭ ۇزاقتىعىنا اسەر ەتپەيدى. ول جۇمىستىڭ ءۇش كۇن بۇرىن توقتاعانىن ايتتى.

سۋ رەسۋرستارىن پايدالانۋدى رەتتەۋ جانە قورعاۋ ءجونiندەگi جايىق-كاسپيي باسسەيندiك ينسپەكسياسىنىڭ باسشىسى عاليدوللا ءازيدۋلليننىڭ ايتۋىنشا، بۇگىن جايىقتاعى سۋ دەڭگەيى 365 سانتيمەترگە دەيىن كوتەرىلىپ، 672 سانتيمەتردى القىمداعان. ال ايماقتاعى ءقاۋىپتى دەڭگەي – 850 سانتيمەتر. عاليدوللا ءازيدۋللين سۋدىڭ بۇل ءقاۋىپتى كورسەتكىشكە جەتپەيتىنىن بولجاپ، ءتىلسىز جاۋدىڭ ماۋسىم ايىنىڭ باسىندا قايتا باستاۋى مۇمكىن ەكەنىن ايتتى.

ال، باس مەردىگەر كومپانيا وكىلى بارلىق قاۋىپسىزدىك شارالارىنىڭ جاسالعانىن ايتتى.

“جۇمىستى توقتاتپاس بۇرىن جاعاعا توپىراق سالىنعان قاپشىقتاردى ءتىزىپ قويدىق. بۇنى اعىس-تولقىننىڭ جارعا سوعۋىن بارىنشا باسەڭسىتۋ ءۇشىن جاسادىق”، – دەيدى ول. وكىلدىڭ ايتۋىنشا، سۋ قايتقان سوڭ ماماندار بىردەن ىسكە كىرىسەدى.

اسقار تولەنوۆ ءتيىستى 6000 شارشى مەتر بەتوننىڭ ۇشتەن ءبىرىنىڭ قۇيىلىپ ۇلگەرگەندىگى جەتكىزدى.

ايتا كەتەلىك، بىلتىر اتىراۋ وبلىسىنىڭ اكىمدىگى 1،5 ميلليارد تەڭگە قاراستىرىپ، كونە شاھاردى شايىپ بارا جاتقان جايىق وزەنىنىڭ جاعاسىن بەكىتۋدى باستادى.  ودان كەيىن مادەنيەت جانە سپورت مينيسترلىگى ەجەلگى قالانى قالپىنا كەلتىرۋ ءۇشىن تاعى 100 ميلليون تەڭگە بولەتىنىن مالىمدەدى. سارايشىق قالاسىن تۋريستىك ورتالىققا اينالدىرۋ ءۇشىن كاسىپكەرلەردى تارتۋ جوسپارلانىپ وتىر.

كونە شاھار اتىراۋ قالاسىنان 45 شاقىرىم جەردە جايىق وزەنىنىڭ جاعاسىندا ورنالاسقان. التىن وردا حاندىعىنىڭ ساياسي، ەكونوميكالىق ورتالىقتارىنىڭ ءبىرى بولعان قالا قاسىم حاننىڭ تۇسىندا قازاق حاندىعىنىڭ استاناسى اتاندى. جىبەك جولىنىڭ بويىندا تۇرعان مۇندا 7 حان جەرلەنگەن. ولار: موڭكە، توقتاعۋ، جانىبەك، ءامىر وقاس، قاسىم حان، شيح ماماي جانە ءجۇسىپ حاندار.