استانا اكىمى اسەت يسەكەشيەۆ قۇرىلىس كومپانيالارىنىڭ اباتتاندىرۋ ەرەجەلەرىن بۇزعانى ءۇشىن قاتاڭ سىنعا العان سوڭ قۇرىلىس الاڭدارىن تارتىپكە كەلتىرۋگە كىرىستى، دەپ حابارلايدى قامشى اقپاراتتىق اگەنتتىگى قالا اكىمدىگىنىڭ باسپا ءسوز قىزمەتىنە سىلتەمە جاساپ.

ەسكە سالساق، 24 ساۋىردە ەلوردا اكىمدىگىندە كەڭەيتىلگەن وتىرىس ءوتىپ، ونىڭ بارىسىندا قالا باسشىسى «ق ر ساۋلەت، قالا قۇرىلىسى جانە قۇرىلىس قىزمەتى تۋرالى» ق ر زاڭىن بۇزعانى ءۇشىن قۇرىلىس كومپانيالارىنىڭ باسشىلارىنان تۇسىنىكتەمە بەرۋدى تالاپ ەتتى.

«قۇرىلىس كومپانيالارى زاڭ تالاپتارىن دۇرىس ورىنداماي وتىر، سانيتارلىق كۇتىپ-ۇستاۋ ەرەجەلەرىنە جاۋاپ بەرمەيدى. قۇرىلىس الاڭدارىندا كولىك دوڭگەلەكتەرىن جۋاتىن ورىن جوق، قوقىس شىعارىلمايدى، جانە ۇيلەردىڭ ساپاسى دا كۇدىك تۋدىرادى. بىزگە قۇرىلىس مادەنيەتىن جاڭا ساپالىق دەڭگەيگە كوتەرۋ قاجەت»، - دەگەن بولاتىن اكىم.

وسىدان كەيىن اكىم سوزدەن ىسكە كوشىپ، ەلورداداعى بارلىق قۇرىلىس كومپانيالارىن تەكسەرۋگە كىرىستى.

بۇگىنگى كۇنى ەلوردا اۋماعىندا جەكە تۇرعىن ۇيلەردىڭ قۇرىلىسى مەن پاتەرلەردى قايتا جوسپارلاۋدى ەسەپكە الماعاندا، 560 كومپانيا 1020 نىساننىڭ قۇرىلىسى جۇرگىزىلۋدە.

2017 جىلدىڭ ءبىرىنشى توقسانىندا قولدانىستاعى زاڭنامانى بۇزعانى ءۇشىن 17 كومپانيادا جۇمىستار توقتاتىلدى.

سونداي-اق، اباتتاندىرۋ ەرەجەلەرىن بۇزعانى ءۇشىن رۇقسات بەرىلمەگەن كومپانيالار دا بار.

اتالعان كەزەڭدە 27 كومپانيا 2 425 030 تەڭگە سوماسىنا اكىمشىلىك جاۋاپكەرشىلىككە تارتىلدى. ال رەيد شارالارى شەڭبەرىندە استانا قالاسى ءىىد جەرگىلىكتى پوليسيا قىزمەتىنىڭ تابيعات قورعاۋ پوليسياسىنىڭ ماماندارى اباتتاندىرۋ جانە سانيتارلىق كۇتىپ-ۇستاۋ ەرەجەلەرىن بۇزعانى ءۇشىن بىرنەشە كومپانيادا جۇمىستاردى توقتاتقان.

سونىمەن بىرگە، جەر قاتىناستارى باسقارماسى جەر يگەرۋ مەرزىمدەرىن بۇزعانى ءۇشىن 58 كومپانيانىڭ جەر تەلىمىن جالعا بەرۋدى ۇزارتۋ تۋرالى ءوتىنىشىن كەرى قايتاردى.

اكىم وسى باعىتتاعى جۇمىستاردى ودان ارى جالعاستىرىپ، قالاداعى بارلىق قۇرىلىس الاڭدارىنىڭ سانيتارلىق جاعدايىن باقىلاۋدا ۇستاماق. قالا باسشىسى زاڭ بۇزعان قۇرىلىس كومپانيالارىنا قاتىستى قۇرىلىس جۇرگىزۋگە بەرىلەتىن رۇقساتتى كەرى قايتارىپ الۋعا دەيىن قاتاڭ شارالار قابىلداناتىنىن ايتىپ ەسكەرتتى.