بۇگىن پارلامەنت سەناتىنىڭ جالپى وتىرىسىندا ۇكىمەت باسشىسىنىڭ اتىنا سەناتور مۇرات باقتيار ۇلى: «ەڭبەك كوشى-قونىنا تالاپتى كۇشەيتىپ، ەتنيكالىق كوشى-قوندى جەڭىلدەتۋگە ءتيىسپىز»، - دەپ ساۋال جولدادى.
سەنات دەپۋتاتى ءوز سوزىندە سوڭعى جىلدارى ەلگە ورالىپ جاتقان ورالمانداردىڭ ازاماتتىق الۋداعى جانە ەلىمىزدە تۇراقتى تۇرۋداعى قۇقىقتىق، اكىمشىلىك كەدەرگىلەرگە تاپ بولىپ جاتقانىن ايتتى. اتاپ ايتقاندا، ەل ۇكىمەتىنىڭ 2012 جىلعى №362 قاۋلىسىمەن، 2014 جىلدىڭ №111 قاۋلىسىنىڭ نەگىزىندە جۇزەگە اساتىن، قانداستارىمىزدىڭ اتامەكەنىنە قونىستانۋىن قيىنداتىپ وتىرعان قۇجاتتىق قيىندىقتار ءسوز بولدى. بۇل نەگىزدە قانداستارىمىزدان ونىڭ ازاماتتىعى، مەملەكەتتىڭ جازباشا كەلىسىمى رەتىندە بولۋى مۇمكىن كەتۋ پاراعى، شەتەلگە تۇراقتى تۇرۋ ءۇشىن رۇقساتتى راستايتىن باسقا قۇجاتتار مەن كەلگەن ەلىندە سوتتىلىعىنىڭ بار، نە جوقتىعىن راستايتىن قۇجاتتار تالاپ ەتىلە باستاعان. ال كەلگەن ەلىنەن اكەلىنگەن قۇجاتتارعا سول ەلدىڭ وسىنداعى ديپلوماتيالىق وكىلدەرى ءمور باسىپ، ماقۇلدايتىنى ءتىپتى كۇلكىلى جاعداي. سەبەبى ءار ءبىر ەل كىمگە ازاماتتىق بەرۋ ماسەلەسىن باسقا ەلدىڭ قانداي دا ءبىر وكىلدەرىنىڭ قاتىسۋىنسىز ءوزى شەشەدى. وسى تۇرعىدان مۇرات باقتيار ۇلى ۇكىمەت باسشىسى اتىنا: «ارينە، ۇكىمەتتىڭ اتالعان قاۋلىلارى ەلىمىزگە سىرتتان كەلەتىن كەلىمسەكتەردىڭ كوشى-قونى اعىنىنان تۋىندايتىن قاۋىپ-قاتەردىڭ الدىن الۋ ماقساتىندا قابىلدانعانىن تۇسىنۋگە بولاتىنداي. ءبىراق، بۇدان بۇرىن مۇنداي تالاپتار ەتنيكالىق قازاقتارعا قاتىسى جوق ەدى، بۇعان دەيىنگى ۇكىمەت قاۋلىلارىنىڭ باسىم بولىگىندە ماسەلە شەتەلدەگى قازاقتارعا قاتىستى بولعان جاعدايدا «ەتنيكالىق قازاق وكىلدەرىنەن وزگە» دەگەن تىركەس ارنايى قوسىلاتىن. وكىنىشكە قاراي، سوڭعى بىرنەشە جىلدىڭ كولەمىندە شەتەلدەگى قازاقتار مۇددەسى كوبىنەسە ۇمىت قالىپ، ولاردىڭ قۇقىقتىق دارەجەسى وزگە شەتەلدىكتەردىڭ دارەجەسىنە دەيىن قۇلدىراپ كەتتى»، - دەپ مالىمدەمە جاسادى. سونداي-اق، سەناتور شەتەلدەگى قانداستارىمىزدىڭ قازاقستانعا كەلىپ تۇراقتى تۇرۋىنا كەدەرگى بولماسى ءۇشىن، ۇكىمەت قاۋلىسىنا «ەتنيكالىق قازاقتاردان وزگە» دەگەن ءبىر اۋىز ءسوز تىركەسىن قوسۋدى تالاپ ەتەدى ءارى ەتنيكالىق كوشى-قونعا بارىنشا جەڭىلدىكتەر جاسالۋىن سۇرايدى.
شەتەلدەن ورالاتىن قانداستارىمىزدىڭ الدىنان شىعاتىن كولدەنەڭ قيىندىقتار تۋرالى قازاق ءتىلدى باسىلىمدار ۇزدىكسىز جازىپ كەلسە دە، ورالمانداردىڭ ازاماتتىق الۋ ءتارتىبى 4 جىل بولىپ بەكىتىلگەلى العاش رەت پارلامەنت زالىندا كوتەرىلىپ وتىر. مۇرات باقتيار ۇلى ورالماندار ماسەلەسىن ۇكىمەتتىڭ ەسىنە ءجيى سالىپ تۇراتىن دەپۋتاتتاردىڭ ءبىرى. اتاپ ايتساق، وسىدان ەكى جىل ۋاقىت بۇرىن، 2012 جىلى 18 قازاندا قانداستارىمىزدىڭ جاعدايىن جاساۋ تۋرالى ۇكىمەت باسشىسى اتىنا سال جولدادى.
ەستەرىڭىزدە بولسا مينيستر تامارا دۇيسەنوۆا حانىم جارىم جىل بۇرىن «ەلگە ورالاتىن ەتنيكالىق قازاقتارعا قىسقا ۋاقىت ىشىندە ازاماتتىق بەرۋ ءتارتىبىن قاراستىراتىن زاڭ دايىندالادى» دەپ مالىمدەدى. ەلباسى نۇرسۇلتان نازاربايەۆ تا 6 تامىزدا وتكەن ۇكىمەتتىڭ جالپى وتىرىسىندا شەتەلدەن كەلەتىن قانداستارىمىزعا بار جاعدايدى جاساۋ تۋرالى تاپسىرما بەردى.
تاعدىر تاۋقىمەتىمەن الەمنىڭ ءار تۇكپىرىنە تارىداي شاشىراعان قازاقتاردىڭ «ەلگە كەلىپ ورنالاسۋىنا جاعداي جاسايتىن» زاڭ جوباسى الدىنا كەلە قالسا، «ەاەو شارتىن راتيفيكاسيالاۋ» سياقتى اسا ماڭىزدى زاڭداردى ءبىر وقىلىمدا قابىلداپ جىبەرەتىن دەپۋتاتتارىمىز ەل ءۇشىن ايانبايدى دەپ سانايمىز. ال، ۇكىمەت باسىندا ۇزاق جىل وتىرعان، مول تاجىريبەلى پرەمەر-مينيستر كارىم ءماسىموۆ سەناتور مۇرات باقتيار ۇلى كوتەرگەن ماسەلەگە بايلانىستى زاڭ جوباسىن تەزدەتىپ دايىنداۋعا ءتيىستى مينيسترلىكتەرگە تاپسىرما بەرەدى جانە قانداستارىمىزدىڭ ەلگە دەگەن ساعىنىشى مەن قۇجاتتىق قيىندىقتارعا بايلانىستى ءوتىنىشىن جەتە تۇسىنەدى دەپ ءۇمىت ارتامىز.
نۇرعالي نۇرتاي
