جاقسى ءانشى ءاننىڭ باعىن اشسا، جاقسى ءان دە انشىگە جول اشارى ءسوزسىز. بۇل اقيقات. ءبىر انمەن عانا تانىلعان انشىلەر كوپ.

يبراگيم ەسكەندىردىڭ ەسىمى ءقازىر كوپكە تانىمال. ءانشى رەتىندە ونى حالىققا تانىتقان الماس احمەتبەك ۇلىنىڭ سوزىنە جازىلعان ەرمۇرات زەيىپحان ۇلىنىڭ «كوك تۋدىڭ جەلبىرەگەنى» اتتى ءانى. كوپ جىل بۇرىن جازىلىپ بىرنەشە ورىنداۋشىسى بولسا دا وسى ءاننىڭ باعىن اشقان يبراگيم باۋىرىمىز بولدى. قازاقى اۋەن قوسىلعان ءان اسىرەسە 2016 ريو-دە-جانەيرودا وتكەن وليمپيادا كەزىندە ەلىمىزدىڭ سپورتشى وعلاندارى جەڭىس تۇعىرىنان كوتەرىلگەن ساتتەرىندە «قازاقستان»، «حابار» سەكىلدى تەلەارنالاردىڭ ەفيرىنەن تۇسكەن جوق. كوپتەگەن سپورتتىق  جانە باسقا شارالار كەزىندە ءالى دە ورىندالىپ كەلەدى. حالىق تا تەز قابىلدادى. پاتريوتتىق سەزىمدى وياتىپ-اق تاستايدى.

ءوز باسىم ي.ەسكەندىر ورىنداعان اندەردى ءسۇيىپ تىڭدايمىن. سونىڭ ءبىرى «امانات» ءانى. وعان تۇسىرگەن بەينەبايان دا ءساتتى شىقتى.

تۇياعى توزعان تۇلپاردىڭ،

قاناتى تالعان سۇڭقاردىڭ،

اتادان قالعان كيەلى بۇل جەر

امانات بىزگە، امانات!- دەپ كەلەتىن قايىرماسىمەن قوسىلىپ وسى انگە ءوزىڭ دە ىلەسىپ ىڭىلداپ وتىرعانىڭدى بىلمەي قالاسىڭ.

جاقىندا ايگىلى امەريكالىق اكتەر سيلۆەستر ستاللوننىڭ رەجيسسەرلىگىمەن ءوزى باستى رولدە ويناعان «رەمبو 4» ءفيلمىن تاماشالاپ وتىرعان بولاتىنمىن. ءفيلمنىڭ 5 مينۋتىنان كەيىن وينالىپ جاتقان مۋزىكانى تىڭداعان كەزدە ءوز قۇلاعىما ءوزىم سەنبەدىم. «امانات» ءانىنىڭ باستالۋ شاعىنداعى اۋەن ورىندالىپ جاتىر (مۋزىكا تىلىندە ساۋندترەكت دەپ ايتىلادى ەكەن). تۇپ-تۋرا 1 مينۋت 15 سەكۋنت. تەك «اماناتقا» قاراعاندا ءسال باياۋ. ال ءبىزدىڭ  ەسكەندىر ونى ءوز داۋىسىمەن ورىنداپ تۇر.

«رەمبو 4» فيلمىندەگى ساۋندترەكتىڭ اۆتورى Brian Tylەr. ساۋندترەكت «Theme Rambo» دەپ اتالادى.  ول تانىمال امەريكالىق كومپوزيتور جانە ءدريجور. كوپتەگەن فيلمدەرگە ساۋندترەك جازعان دەگەن دەرەك عالامتوردا تۇر.

«رەمبو 4» 2008 جىلى تۇسىرىلگەن. ال ي.ەسكەندىردىڭ «اماناتى» ءدال قاشان جازىلعانىن بىلمەيمىن. «كورمەيىن دەسەم كوزىم بار...» دەمەكشى بىزدىكى تەك ەستىگەن قۇلاق. جازىق جوق. ال شىندىعىن تەك يبراگيم باۋىرىمىز ايتپاسا...

ا.ماناپوۆ

،