سەمەيدە دە وتان قورعاۋشىلار كۇنى ايتۋلى شارالارمەن ايشىقتالدى.

قالاداعى ينتەرناسيوناليست-جاۋىنگەرلەرگە ارنالعان ەسكەرتكىشكە گۇل شوقتارى قويىلىپ، جاستارعا ەرلىك داستاندارى وقىلدى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە بەرىپ.

 ءداستۇرلى «ۆەنا بالى» بي مەرەكەسىندە 70-كە جۋىق جۇپ ءوز ونەرىن پاش ەتتى.  نەگىزىنەن «شىعىس» وڭىرلىك قولباسشىلىعىنىڭ اسكەريلەرى مەن ستۋدەنت جاستار قاتىسىپ، ءۆالستىڭ 10-نان استام ءتۇرىن بيلەدى. بيىل 6-رەت وتكەن ءداستۇرلى  كەشكە اسكەريلەر بىرنەشە اپتا دايىندالىپتى.

مارجان بايعازينوۆا، كوللەدج ستۋدەنتى: - ءبيدىڭ تورەسى ۆالس قوي، سول سەبەپتەن ءاربىر جاس ۆالس بيلەۋى ءتيىس. بۇل تاربيەلەلىكتىڭ ءبىر ءتۇرى دەپ ەسەپتەيمىن. ەلىمىز امان، اسپانىمىز اشىق، جۇرتىمىز تاتۋلىقتا ءومىر سۇرە بەرسىن!

ەركەبۇلان قاناتوۆ، كوللەدج ستۋدەنتى: - ءبىر جىلدىڭ ىشىندە 3 رەت قاتىستىق. دايىندىق جاقسى بولدى. سەبەبى بيلەپ جۇرگەنىمىز ءبىرىنشى رەت ەمەس. مادەنيەتتىلىككە، ەتيكەتكە، بارىنە ۇيرەتەتىن بي بولىپ تابىلادى. 

قۇمار قۇسمانوۆ، «شىعىس» وڭىرلىك قولباسشىلىعىنىڭ اعا سەرجانتى:  - اسكەري ادام تەك قانا قولىنا قارۋ الىپ، قاتىپ قالعان تارتىپكە باعىنۋ ەمەس، سونىمەن بىرگە ونەردەن دە كەندە ەمەس. ءبىز قارۋلى كۇشتەردىڭ ءاربىر جاۋىنگەرى، ازاماتتارى ەلباسىنىڭ قويىلعان تالاپتارىن مۇلتىكسىز ورىنداۋعا دايىنبىز. قازاقستان رەسپۋبليكاسىنىڭ قارۋلى كۇشتەرىنىڭ 25 جىلدىعى قۇتتى بولسىن! قازاقستان، تەك عانا العا دەگىم كەلەدى!
 

دايىنداعان: ايگەرىم تاۋباي