الماتىدا جەڭىس كۇنى قالا تۇرعىندارى مەن قوناقتارى داڭق مەموريالىنا گۇل شوقتارىن قويۋ جانە ەكىنشى دۇنيەجۇزىلىك سوعىستا قۇربان بولعانداردى ەسكە الۋ ءۇشىن 28ء-شى گۆاردياشىل-پانفيلوۆشىلار ساياباعىنا كەلدى، دەپ حابارلايدى قامشى اقپاراتتىق اگەنتتىگى قالا اكىمدىگىنىڭ باسپا ءسوز قىزمەتىنە سىلتەمە جاساپ.

ماڭگىلىك الاۋعا گۇل شوقتارىن قويۋ ءراسىمى بارىسىندا الماتى اكىمى باۋىرجان بايبەك وراسان ادمداردىڭ قۇرباندىعى ارقاسىندا ۇلى جەڭىسكە قول جەتكەنىن اتاپ ءوتتى. تۇرعىندارى 6 ميلليوننان اساتىن قازاقستان قان مايدانعا ءوز ازاماتتارىنىڭ 20%-ىن اتتاندىردى، سولاردىڭ ءاربىر ەكىنشىسى سۇراپىل سوعىستا قازا تاپتى.

«سوعىستىڭ بارلىق مايداندارىندا قازاقستاندىقتار جاۋمەن ايانباي شايقاستى. باۋىرجان مومىش ۇلىنىڭ، تالعات بيگەلدينوۆتىڭ، ءاليا مولداعۇلوۆانىڭ، مانشۇك مامەتوۆانىڭ، سەرگەي لۋگانسكييدىڭ، لەونيد بەدانىڭ، نۇركەن ءابدىروۆتىڭ جانە مىڭداعان باسقا دا قازاقتاندىقتاردىڭ ەسىمى ۇلى ەرلىكتەر تاريحىنا التىن ارىپتەرمەن جازىلدى. ءبىزدىڭ باستى بورىشىمىز – تاۋەلسىز قازاقستاندا بەيبىتشىلىك پەن كەلىسىمدى ساقتاي وتىرىپ، وسكەلەڭ ۇرپاقتىڭ اشىق اسپان استىندا ءومىر ءسۇرۋىن قامتاماسىز ەتۋ»، - دەدى الماتى اكىمى.

ول ءوزىنىڭ سوزىندە تىلدا دا قازاقستاندىقتاردىڭ جانقيارلىق ەرلىك كورسەتكەنىن، ايەلدەردىڭ، قارتتاردىڭ، بالالاردىڭ جەڭىس ءۇشىن ايانباي ەڭبەك ەتكەنىن ايتتى. سوعىس جىلدارى بارلىق ءوندىرىس ورىندارى قان مايدانعا قاجەت زاتتار شىعارۋمەن بولدى. ون وقتىڭ توعىزى قازاقستاندىق قورعاسىننان قۇيىلدى.رەسپۋبليكادا جالپىوداقتىق مىستىڭ 35%-ى، قورعاسىننىڭ 83%-ى، موليبدەننىڭ 60% -ى شىعارىلدى.

باۋىرجان بايبەك ءوزىنىڭ سوزىندە مايدانعا اتتانعان 1 ملن. 200 مىڭ قازاقستاندىقتىڭ 160 مىڭنان استامى الماتىلىق ەكەندىگىن ايتتى. ول جاستاردىڭ ەرلىكتەرى عاسىرلارعا جالعاسقان ارداگەرلەردى ۇنەمى قۇرمەت تۇتۋى ءتيىس ەكەندىگىن ءسوز ەتتى. قازاقستان مەن ءبىزدىڭ تۋعان ولكەمىزدىڭ قان مايدانداعى جەڭىسكە قوسقان ۇلەسى جاستاردىڭ جادىندا بولۋى ءتيىس.

«ەلباسىنىڭ سىندارلى ساياساتى ارقاسىندا ءبىزدىڭ ەلىمىز بىرلىك پەن تۇراقتىلىقتى، كەلىسىمدى تۋ ەتىپ، بەيبىت اسپان استىندا ءومىر سۇرۋدە. ءدىنى مەن ءتىلى، ۇلتى بولەك ءاربىر قازاقستاندىق ەرتەڭگى بولاشاعىنا ۇلكەن سەنىممەن قاراۋدا، تامىرلارىن تەرەڭگە جايىپ، ۇرپاق وسىرۋدە. مەملەكەت باسشىسى ايتىپ وتكەندەي، قازاقستان تۋرالى ءسوز بولا قالسا، ءبىزدىڭ قازاقستاندىقتارعا قۇرمەت كورسەتىلەدى. ويتكەنى، ءبىزدىڭ ۇرانىمىز- بەيبىتشىلىك. جاستار سوعىس ارداگەرلەرىنىڭ، باتىر قازاقستاندىقتاردىڭ، سولاردىڭ ىشىندە الماتىلىقتاردىڭ ماڭگىلىك ەرلىكتەرىن ۇنەمى ەستە ساقتاۋلارى ءتيىس. بۇل ءبىزدىڭ تاريحىمىزدىڭ ءبىر بولىگى.پاتريوتيزم رۋحى ءبارىمىزدى بىرىكتىرىپ، ۇلى ۇلتىمىزدى مىقتى ەتەدى»، -دەپ اتاپ ءوتتى ب.بايبەك.

سالتاناتتى شارا بارىسىندا جينالعاندار قۇربان بولعانداردى ءبىر مينۋت ۇنسىزدىكپەن ەسكە الدى، ارتىنان قۇرمەتتى قاراۋىلدىڭ شەرۋى ءوتىپ، مەرەكەلىك كونسەرت بولدى. روزا رىمبايەۆا، تاعات كۇزەمبايەۆ، «ILCanto» كۆارتەتى، «ارت-كلاسسيك توبى، بەرەكە ەڭكەبايەۆا، الەكسەي تيموفەيەۆ جانە باسقالارى «پوكلونيمسيا ۆەليكيم تەم گودام»، «سۆياششەننايا ۆوينا»، «جاس قازاق»، «ءاليا»، «تاليانوچكا»، «ساعادات»، «سمۋگليانكا» سىندى كومپوزيسيالاردى ورىندادى.

سالتاناتتى ميتينگتەن سوڭ قالا كوشەلەرىندە «قاھارمان ۇلت» شەرۋى باستالدى. ۇوس-نا قاتىسۋشىلاردىڭ سۋرەتتەرىنەن وزگە، اسكەريقىزمەتشىلەر جيناعان 164 فوتوسۋرەتتىڭ ىشىنەن ۇوس باتىرلارىنىڭ 10 فوتوموزايگى شەرۋگە قاتىسۋشىلار قولىندا بولدى.

استانا الاڭىندا ساعات 20:00 دەن 22:00-گە دەيىن «تاعزىم!» اتتى كونسەرت بولىپ، وندا «ساعادات»، «تەمنايا نوچ»، «نا بەزىمياننوي ۆىسوتە»، «كەستەلى ورامال»، «سوعىستان قايتقان سولداتتار» جانە باسقادا اسكەري اندەر ورىندالادى. سالتاناتتى شارا وتشاشۋمەن اياقتالادى.

اتاپ وتەرلىك جايت، جەڭىس كۇنىنە وراي قالادا ءتۇرلى اكسيالار وتۋدە. مىسالى، مەكتەپ وقۋشىلارى «ەسكەرتكىش ۆاحتاسى» اياسىندا ۇلى وتان سوعىسىنا قاتىسۋشىلاردىڭ ەسكەرتكىشتەرى جانىندا قۇرمەتتى قاراۋىلدا تۇرۋدا. بارلىق مەكتەپتەردە «ەرلىك ساباقتارى» ءوتتى. 28 گۆاردياشىل-پانفيلوۆشىلار جانە تۇڭعىش پرەزيدەنت ساياباقتارىندا، ارباتتا ءتۇرى شارالار ۇيىمداستىرىلدى. وعان ءا.قاستەيەۆ اتىنداعى قولدانبالى ونەر جانە تەحنيكالىق ديزاين مەكتەبىنىڭ 302 وقۋشى- سۋرەتشىسى قاتىستى.جۇبانوۆ اتىنداعى مۋزىكا مەكتەبى مەن چايكوۆسكيي اتىنداعى كولەدج وقۋشىلارى دا ءوز ۇلەستەرىن قوستى. ال، ع.مۇسىرەپوۆ اتىنداعى جاستار تەاترىنىڭ ارتيستەرى باۋىرجان مومىش ۇلىنىڭ، ءاليا مولداعۇلوۆانىڭ، مانشۇك مامەتوۆانىڭ، يۆان پانفيلوۆتىڭ، تالعات بيگەلدينوۆتىڭ، راحىمجان قوشقاربايەۆتىڭ، مالىك ءعابدۋلليننىڭ، سەرگەي لۋگانسكييدىڭ ءتىرى بەينەلەرىن سومدادى. داڭق مەموريالى الدىنداعى الاڭدا العىس قابىرعالارى مەن «ءبىز - باتىرلاردىڭ ۇرپاعى»، «#ءبىز_جەڭىس ۇرپاعىمىز!» اتتى قوندىرعىلار ورناتىلدى.

دايىنداعان: گۇلىم جاقان