وتكەن اپتانىڭ جۇماسىندا، «قامشى» پورتالى «بەردىبەكتىڭ بەس كەمشىلىگى جانە اتاق پەن ارۋاق تالاسى» اتتى ماقالا جاريالاعان ەدى. ول ماتەريالدا شقو اكىمىنە بايلانىستى دات سوزبەن قاتار، قوزى-باياننىڭ  باسى جاتقان «تارلاۋلى» اۋىلى جۇمان قوجاعاپانوۆ اتىنا  اۋىسۋى مۇمكىن ەكەنى، وعان جەرگىلىكتى بيلىك وكىلدەرى مۇددەلى ەكەنى جازىلعان.  

بەلگىلى جۋرناليست جۇماش كەنەبايدان «قامشىنىڭ» پوشتاسىنا تومەندەگىدەي حات كەلىپ ءتۇستى. حات مازمۇنىندا اتالعان ماسەلەنىڭ وڭ شەشىم تاپقانى ايتىلعان.

«اقىرى، ادىلەتتىلىك جەڭدى!

 شقو اكىمى ب.ساپاربايەۆ ءوزى باسقاراتىن وبلىستىق ونوماستيكا كوميسسياسىنىڭ بۇعان دەيىنگى شەشىمىنىڭ كۇشىن جويۋعا ءماجبۇر بولدى. ول ادامدى تاۋبەسىنە كەلتىرگەن قازاقستان رەسپۋبليكاسى پرەزيدەنتىنىڭ اپپاراتى بولعانىن جۇرت ايتىپ ءجۇر. رەسپۋبليكالىق «ەگەمەن قازاقستان»، «دات» جوباسى بويىنشا جارىق كورىپ جاتقان باسىلىم، abai.kz، qamshy.kz سياقتى قازاق ءتىلدى سايتتار، «31» تەلەارنا قوزى مەن بايان كەسەنەسىنە ارا تۇسكەنىن، قالىڭ وقىرمان جاقسى بىلەر دەپ ويلايمىن

سونىمەن بەس جىلدان استام ۋاقىت بويى  باسى داۋعا قالعان قوزى مەن بايان كەسەنەسى تۇرعان جەر «اۋپىرىممەن» امان قالدى. قاسيەتتى ءارۋاقتارعا اۋىز سالعانداردىڭ تۇمسىعى تاسقا ءتيدى!..»

ءجۋرناليستتىڭ جازۋىنشا قوزى مەن باياننىڭ ەسكەرتكىشى ورنالاسقان اۋماق اتى اۋىسپايتىنىن راستايتىن قۇجات – الداعى ۋاقىتتا جاريالانادى.