قازاقستان پرەزيدەنتى جۇڭگو حالىق رەسپۋبليكاسىنىڭ ءتوراعاسى سي سزينپينمەن كەزدەستى،  - دەپ حابارلايدى قامشى اقپاراتتىق اگەنتتىگى.

مەملەكەت باسشىسى جۇڭگو حالىق رەسپۋبليكاسىنىڭ ءتوراعاسىنا «ءبىر بەلدەۋ، ءبىر جول» فورۋمىنا شاقىرعانى ءۇشىن العىس ايتىپ، ءىس-شارانىڭ جاقسى ۇيىمداستىرىلعانىن اتاپ ءوتتى.

– فورۋم بۇكىل دۇنيە ءجۇزى بويىنشا بيىلعى ەڭ باستى وقيعانىڭ بىرىنە اينالدى دەپ ويلايمىن. بۇگىنگى فورۋمنىڭ اشىلۋىندا سويلەگەن ءسوزىڭىز مازمۇندى بولدى، ول ەلدەر اراسىنداعى ىنتىماقتاستىقتىڭ كوپ ساۋالىنا جاۋاپ بەردى. «ءبىر بەلدەۋ، ءبىر جول» – جاڭا پاراديگما، جاڭا دەڭگەيدەگى ىنتىماقتاستىق جۇيەسى، – دەدى قازاقستان پرەزيدەنتى.

نۇرسۇلتان نازاربايەۆ «ءبىر بەلدەۋ، ءبىر جول» يدەياسىنىڭ وڭىرلىك دەڭگەيدەگى ىنتىماقتاستىقتىڭ عانا ەمەس، سونىمەن بىرگە ءتۇرلى قۇرلىق ەلدەرى اراسىنداعى ءوزارا ءىس-قيمىلدىڭ كورىنىسى ەكەنىن اتاپ ءوتتى.

فورۋمعا قاتىسقان قازاقستان پرەزيدەنتى نۇرسۇلتان نازاربايەۆ  "ءبىر بەلدەۋ، ءبىر جول" باستاماسىن جۇزەگە اسىرۋ بويىنشا بەس ۇسىنىس ايتتى.

نازاربايەۆ فورۋمعا قاتىسىپ جاتقان 20 مەملەكەت جانە ۇكىمەت باسشىلارىنا حالىقارالىق ارەكەتتeستىكتىڭ ەڭ باستى بەس ماسەلەسىن قاراستىرۋدى ۇسىندى.  

"ءبىرىنشىسى، جولداردىڭ ءوسىپ كەلە جاتقان ترانزيت الەۋەتىن ءتيىمدى يگەرۋ ءۇشىن تاۋارلاردىڭ ءوتۋىن جەڭىلدەتەتىن سەرۆيس دەڭگەيىن جوعارىلاتۋ كەرەك ءارى اكىمشىلىك كەدەرگىلەردى جويۋ قاجەت، بۇل ماقساتتا قازاقستان ناقتى شارالار قابىلداپ جاتىر. ال بۇعان لايىقتى ساراپتامالار مەن قارجىلاندىرۋ قاجەت. ازيا بانكىنە وسىنداي باعدارلامالاردى بەلسەندى قارجىلاندىرۋى كەرەك دەپ ەسەپتەيمىن - بۇل بولاشاققا ينۆەستيسيا قۇيۋ"، - دەدى قازاقستان پرەزيدەنتى. 

نازاربايەۆ ەكىنشى پۋنكتىندە جىبەك جولى بويىنداعى ازىق-تۇلىك قاۋىپسىزدىگىن قامتاماسىز ەتۋ ماقساتىندا اۋىل شارۋاشىلىعى كووپەراسيالارىن دامىتۋدىڭ ماڭىزدىلىعىن اتاپ ءوتتى. 

"ۇشىنشىدەن، ءبىز يننوۆاسيالىق جانە تەحنيكالىق دامۋ سالاسىندا بەلسەندى ارىپتەستىك ورناتۋعا جۇمىلۋىمىز كەرەك. عىلىمي-زەرتتەۋ جانە تاجىريبە-كونسترۋكتورلىق زەرتتەۋلەر ورتالىقتارىن اشۋدى بىرىگىپ قارجىلاندىرۋ ماسەلەسىن قاراستىرۋ ويعا قونىمدى، سونداي-اق، يننوۆاسيالىق تەحنولوگيالار كومپانيالارى مەن ۆەنچۋر قورلارىن قارجىلاندىرۋ ابزال. وسى كونتەكستە دوڭگەلەك ۇستەل قاتىسۋشىلارىنىڭ نازارىن قازاقستاندىق عالىمداردىڭ جىبەك جولى حالىقارالىق عىلىم اكادەمياسىن قۇرۋ بويىنشا باستاماسىنا اۋدارعىم كەلەدى. بۇل يدەيانى قىتايلىق ارىپتەستەر، سونىمەن قاتار، 16 ەلدىڭ عىلىمي مەكەمەلەرى قولدادى. باستاماعا قولداۋ كورسەتەسىزدەر دەپ ۇمىتتەنەمىز"، - دەپ مالىمدەدى مەملەكەت باسشىسى. 

ەلباسى قورشاعان ورتانى ساقتاپ قالۋ ماسەلەسىنە نازار اۋدارىپ، ءتورتىنشى ۇسىنىس رەتىندە كولىك كۇرە جولى بولاتىن ءقۇرلىقىشى ترانسشەكارالىق وزەندەردىڭ سۋ رەسۋرستارىن ءتيىمدى پايدالانۋ ماسەلەسىن اتادى. 

"بەسىنشىسى - "بەلبەۋ جانە جول" يدەياسىنىڭ باستى دامۋ شارتتارىنىڭ ءبىرى تارتىلعان ەلدەردىڭ ءوزارا سەنىمى مەن ولاردىڭ تەڭ قۇقىلى ءارتاراپتى ارىپتەستىككە دايىندىعى ەكەنى ءسوزسىز، بۇعان وسى فورۋمدى بۇدان كەيىن دە وتكىزۋ ىقپال ەتەر ەدى. وسى پروسەستە ازياداعى سەنىم ارەكەتتەستىگى بويىنشا جيىندار جاقسى كومەكشى بولا الادى، ونىڭ اياسىندا قاۋىپسىزدىك سەنىمى شارالارىن نىعايتۋ بويىنشا ارىپتەستىك تاجىريبەسى مول"، - دەپ قورىتتى نۇرسۇلتان نازاربايەۆ. 

پرەزيدەنتتىڭ سوزىنشە، جۇڭگو "ءبىر بەلدەۋ، ءبىر جول" باستاماسىن كوتەرۋى ارقىلى الەمگە وڭىرلىك كووپەراسيانىڭ جاڭا مودەلىن كورسەتتى. بۇل ءادىس - "بىرىككەن دامۋ ارقىلى تۇراقتىلىققا قول جەتكىزۋ" - حالىقارالىق ارىپتەستىكتىڭ جاعىمدى فورماسى، ول وسى جول بويىنشا ونداعان ەلدىڭ ەكونوميكالىق مۇددەسىن كورسەتەدى. 

"جىل سايىن تىنىق مۇحيتىنان اتلانتيكاعا دەيىن جاڭا ءارى جىلدام باعىتتار يگەرىلىپ جاتىر، ونىڭ ارقاسىندا ەۋرازيانىڭ وزىندەگى ساۋدا كولەمى 2020 جىلى 1،2 تريلليوننان اسادى دەپ بولجانىپ وتىر"، - دەدى ەلباسى.