قازاقستانعا باتىس سىبىردەن كەلگەن سۋىق اتموسفەرالىق فرونتتاردىڭ سالدارىنان ەلىمىزدىڭ كەي وڭىرلەرىندە اۋا تەمپەراتۋراسى كۇرت تومەندەيدى دەپ بولجايدى سينوپتيكتەر. اۋا رايى بولجامى تۋرالى قامشى اقپاراتتىق اگەنتتىگى وتاندىق باق-تارعا سىلتەمە جاساپ حابارلايدى.

كەي جەرلەرىندە جاڭبىر جاۋىپ، نايزاعاي، جەل كۇشەيىپ، تۇندە سولتۇستىك ايماقتارىنىڭ كەي جەرلەرىندە ۇسىك كۇتىلەدى. رەسپۋبليكانىڭ تەك وڭتۇستىك جانە وڭتۇستىك-شىعىسىنا سۋىق اۋا كەلمەيدى.

سۋىق اتموسفەرالىق اعىننان ەلىمىزدىڭ باسىم بولىگىندە جاڭبىر جاۋىپ قويماي، اۋا تەمپەراتۋراسى دا تومەندەيدى. سولتۇستىك وڭىرلەردە كەي جەرلەردە تۇندە 0-3º ايازعا دەيىن سالقىنداۋى مۇمكىن، قار ارالاس جاڭبىر جاۋۋى دا ىقتيمال. سۋىق اتموسفەرالىق فرونتتاردىڭ وتۋىنە بايلانىستى وڭتۇستىك جانە وڭتۇستىك-شىعىس وبلىستاردا كەي جەرلەردە قاتتى جاۋىن جاۋادى.

اقمولا وبلىسىنىڭ كەي جەرلەرىندە جەل 15-20 م/س كۇشەيىپ، تۇندە 2 گرادۋسقا دەيىن ۇسىك كۇتىلەدى.  قوستاناي، سولتۇستىك قازاقستان وبلىستارىنىڭ كەي جەرلەرىندە تۇندە 2-3 گرادۋسقا دەيىن ۇسىك كۇتىلەدى، كۇندىز نايزاعاي مەن جەل 15-20 م/س كۇشەيەدى. باتىس قازاقستان وبلىستارىنىڭ كەي جەرلەرىندە، الماتى وبلىسىنىڭ جالاڭاشكول اۋدانىندا جەل كۇشى 15-23 م/س بولادى. قاراعاندى وبلىسىندا، كۇندىز جامبىل، وڭتۇستىك قازاقستان، ماڭعىستاۋ، شىعىس قازاقستان وبلىستارىنىڭ كەي جەرلەرىندە نايزاعاي، جەل 15-20 م/س كۇشەيەدى. اتىراۋ وبلىسىنىڭ كەي جەرلەرىندە نايزاعاي بولادى.