ماسكەۋدە رەسەيدىڭ ۇلكەن تەاترى مەن «استانا وپەرا» اراسىندا ىنتىماقتاستىق تۋرالى مەموراندۋمعا قول قويىلدى. اتالعان شارا قازاقستاننىڭ رەسەيدەگى ەلشىلىگىنىڭ مۇرىندىق بولۋىمەن جۇزەگە استى دەپ حابارلايدى قامشى اقپاراتتىق اگەنتتىگى رەسەيدەگى قازاقستان ەلشىلىگىنە سىلتەمە جاساپ.
قۇجاتقا رەسەي ۇلكەن تەاترىنىڭ باس ديرەكتورى ۆلاديمير ۋرين مەن «استانا وپەرا» ديرەكتورى عالىم احمەدياروۆ قول قويدى.
مۇنداي تىڭ وزگەرىس ەلىمىز تاۋەلسىزدىك العالى تۇڭعىش رەت جۇزەگە اسىپ وتىر. ويتكەنى وسى بايلانىس ارقىلى ارتىستەرمەن، ورىنداۋشى ۇجىممەن الماسۋ، ءوزارا كەڭەس بەرۋ كومەگىن ۇسىنۋ، گاسترولدىك ساپارلاردى ۇيىمداستىرۋ، بىرلەسكەن شىعارماشىلىق جوبالاردى ۇيىمداستىرۋ جوسپارلانۋدا.
«بۇرىن مادەني شارالارمەن الماسۋ شەڭبەرىندە قوس ەلدىڭ ارتىستەرى استانا جانە ماسكەۋ ساحنالارىندا وتە سيرەك ونەر كورسەتەتىن. ەندى بۇل ءۇردىس ۇدايى جۇرگىزىلەتىن بولادى. سونداي-اق، الەمنىڭ ۇزدىك تەاترلارىنىڭ بىرىمەن جاسالعان بۇل مەموراندۋم ۇلكەن جەتىستىك ەكەنىن، ارتىستەردىڭ كەلەشەگىنە جول اشا وتىرىپ، قازاق مادەنيەتىنە جاڭا سەرپىن بولاتىنىن ايتا كەتۋ كەرەك»، - دەيدى «استانا وپەرا» ديرەكتورىنىڭ ورىنباسارى الەكساندر سوۆوستيانوۆ.
تاراپتار قول قويىلعان قۇجاتتىڭ اياسىندا شىعارماشىلىق توپتار اراسىندا كوپتەگەن قاجەتتى دە پايدالى شارالار ۇيىمداستىرۋعا بولاتىنىنا سەنىم ءبىلدىردى.
