جۇڭگو حالىق رەسپۋبليكاسىنىڭ ينتەرنەت اقپارات قۇرالدارىنىڭ ىشىندەگى ىقپالدى، تارالىمى كەڭ ەلەكتروندى اقپارات قۇرالدارىنىڭ ءبىرى بولىپ سانالاتىن شينلاڭ (sina.com.cn) سايتىندا قازاق حالقىنىڭ ءسالت-داستۇرىن بۇرمالاۋ، قورلاۋ، جانە مازاق ەتۋ ماقساتىمەن جازىلعان ماقالا جارىق كوردى. «ەستەلىك» رەتىندە جازىلعان ماقالانىڭ اۆتورى حۇڭ باۋ: «قازاق قوناقشىل حالىق، قوناعىن كۇتكەنى سونداي قوناعىنا قوي سويىپ، ەت بەرىپ كۇتۋمەن قويماي، قوينىنا ۇزاتىلماعان ۇلكەن قىزىن سالىپ بەرەدى!» دەپ، قازاقتىڭ سالت-داستۇرىندە جوق، قازاق حالقىنىڭ ۇلتتىق ار-نامىسىنا تيەتىن جالعان وقيعانى ءوز باسىنان وتكەن شىندىق رەتىندە جاريالادى. حۇڭ باۋ مىرزانىڭ قازاق حالقىن ماسقارالاۋعا ارنالعان وسى وتىرىگى جۇڭگو ەلىندە تۇراتىن قازاقتاردا عانا ەمەس، سان عاسىر كورشى وتىرعان قازاق ەلىنىڭ ازاماتتارىنىڭ، بۇنداعى قازاقتاردىڭ دا اشۋ-ىزاسىن تۋعىزدى.
ءيىسى تۇركى حالقىنىڭ، قالا بەردى كۇللى مۇسىلمان قاۋىمىنىڭ نامىسىن اياققا تاپتاعان وسى جاعدايعا بايلانىستى 22 قازان دۇيسەنبى كۇنى تاڭعى ساعات 10:00 دە استانا قالاسىنداعى جۇڭگو ەلشىلىگىنە (قونايەۆ كوشەسى مەن قابانباي باتىر كوشەلەرىنىڭ قيىلسى) ەلىمىزدەگى ساياسي قايراتكەرلەر مەن زيالى جۇرتىنان، جۋرناليستەر مەن وزگە دە قوعامدىق ۇيىمداردىڭ وكىلدەرىنەن كوپتەگەن ادام قولداپ قول قويعان نارازىلىق حاتىن تاپسىرۋ شاراسى وتەدى، بۇل شاراعا قازاقستان رەسپۋبليكاسىنداعى بارلىق ب ا ق وكىلدەرىن بىرگە ءۇن قوسۋعا شاقىرامىز.
قحر حالىق ۇكىمەتىنە، قحر سىرتقى ىستەر مينستىرلىگىنە، قحر-دىڭ قازاقستانداعى باس ەلشىسىنە ارناپ نارازىلىق رەتىندە جازىلعان اشىق حات تاپسىرۋ شاراسىنا استانا قالاسىندا تۇراتىن اقىن-جازۋشىلار، جۋرناليستەر، ستۋدەنتتەر، ت.ب. كوپشىلىك قاۋىم قاتىسادى.
سۋرەتتە قحر-نىڭ قازاقستانداعى ەلشىسى چجوۋ لي
دەرەككوز: "شىن" پورتالى
پىكىر قالدىرۋ