پارلامەنت ماجىلىسىندەگى «اق جول» فراكسياسىنىڭ دەپۋتاتتارى ازەربايجاننىڭ پروبلەمالىق بانكىنە ينۆەستيسيالاۋ تۋرالى شەشىم قابىلداعان بجزق-نىڭ لاۋازىمدى قىزمەتكەرلەرىن جاۋاپقا تارتۋدى ۇسىندى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

«2014 جىلدىڭ كۇزىندە بجزق قارجىسىنا ازەربايجاننىڭ حالىقارالىق بانكىنىڭ 70 ملرد-تان استام تەڭگە سوماسىنداعى وبليگاسيالارىن نەگىزسىز ساتىپ الۋ فاكتىسىن انىقتاعان تاۋەلسىز ساراپشى راحىم وشاقبايەۆ «اق جول» پارتياسىنىڭ وكىلدەرىمەن جۇزدەستى. بۇدان بۇرىن ءبىزدىڭ فراكسيا كازينۆەستبانكتى ليسەنزياسىنان ايىرۋ بارىسىندا قاۋىپتىلىك دالىزىندە قالعان 3 ملرد. تەڭگەگە تارتا سوماداعى بجزق قارجىسىنا قاتىستى ۇندەۋ جاساعان بولاتىن. سول كەزدە بجزق باسشىلىعىمەن 5 ملرد. تەڭگەگە KASE-دە كۇماندى ەميتەتپەن باعالى قاعازداردى الۋ فاكتىسى انىقتالعان ەدى»، - دەدى ماجىلىسمەن ازات پەرۋاشيەۆ ق ر ۇلتتىق بانك باسشىسىنا ارنالعان دەپۋتاتتىق ساۋالىندا.

ونىڭ پايىمىنشا، وسى مىسالداردىڭ بارلىعى ازاماتتاردىڭ زەينەتاقىلىق جيناقتارى بويىنشا نەمقۇرايدىلىق مەن جاۋاپسىزدىقتى كورسەتىپ وتىر.

«وسىعان بايلانىستى «اق جول» فراكسياسى اتالعان بانككە ينۆەستيسيا سالۋ تۋرالى شەشىم قابىلداعان بجزق-نىڭ لاۋازىمدى تۇلعالارىن جاۋاپكەرشىلىككە تارتۋدى ۇسىنادى»،-دەپ اتاپ ءوتتى پەرۋاشيەۆ.