"فەرعانا" اگەنتتىگىنىڭ ساراپشىلارى قازاقستانداعى بۇقارالىق اقپارات قۇرالدارىنىڭ كىمگە، قاي ۇيىمعا باعىنىشتى ەكەنىن وزدەرىنشە انىقتاپ، ءتىزىمىن شىعارعان. ول تۇلعالار ءوز ەسىمدەرىن جاسىرعانىمەن، ايدان انىق دۇنيە ەكەنى حالىققا بەلگىلى ەدى. الايدا، كەي تىلشىلەر Abai.kz تيمۋر قۇلىبايەۆتىڭ قاراماعىندا، ال DAT قوعامدىق پوزيسيا گازەتىن بولات وتەمۇراتوۆقا ءتان دەگەن ساراپشىلار مالىمەتىنە كۇماندانىپ، نارازىلىق ءبىلدىردى. بۇل اقپاراتقا قاتىستى DAT گازەتىنىڭ رەداكسياسى ءۇنسىز قالمادى. گازەتتىڭ بولات وتەمۇراتوۆقا قاتىسى بار دەپ جازعان «فەرعانا» ساراپشىلارىن ايىپتاپ، جاۋاپ جازدى. جازىلعان جاۋاپتى قامشى اقپاراتتىق اگەنتتىگىنىڭ ءتىلشىسى قازاق تىلىنە اۋدارىپ، وقىرمان نازارىنا ۇسىنادى.

«فەرعانا» سايتىنىڭ ساراپشىلارى انىقتاعان ءبىزدىڭ باسىلىم مەن قازاق تىلىندەگى «جاس الاش» گازەتىنە قاتىستى مالىمەتكە نازار اۋدارا وتىرىپ، دات فيزيگى، نوبەل سىيلىعىنىڭ  1922 جىلعى يەگەرى نيلس بوردىڭ مىنا ءافوريزمىن ەسكە تۇسىرۋگە بولادى: «ساراپشى – اۋقىمى تار سالاعا قاتىستى مەيلىنشە قاتەلىكتەرگە بوي الدىراتىن ادام». بۇل – ءبىر.

ەكىنشىدەن، «فەرعانا» ساراپشىلارىنىڭ ميللياردەر بولات وتەمۇراتوۆقا باعىنىشتى ەتىپ بىرنەشە اقپارات قۇرالدارىن كورسەتۋى، ونىڭ ىشىندە ەلىمىزدە وپپوزيسيالى ب ا ق بولىپ تابىلاتىن «DAT-تىڭ» بولۋى اگەنتتىكتىڭ «جاعىمپازدىعىن» كورسەتەدى.

ۇشىنشىدەن، العاشقى مۇمكىندىكتە-اق كەز-كەلگەن باسىلىم ءوز يەسىنىڭ ارقاسىنان پىشاق سۇقپاس ەدى. لوگيكاعا كەلمەيدى.

تورتىنشىدەن، ەگەر DAT-قا قانداي دا ءبىر ۇيىم قولداۋ كورەتكەن بولسا نەمەسە ميللياردەر وتەمۇراتوۆتىڭ اقشاسىنا قاراپ وتىرسا، ونسىز دا ساۋساق سانارلىق قىزمەتكەرلەرىن قىسقارتار ما ەدى. بۇگىنگى تاڭدا گازەتتە كوررەكتورمەن قوسقاندا 5 ادام جۇمىس جاسايدى، ال سىزدەردىڭ باعىنىشتى قىزمەتكەرلەرىڭىز – رەداكسيا شتاتىنداعى جالعىز ورىس ءتىلدى جۋرناليست.

بەسىنشىدەن، DAT رەداكسياسىندا ايىنا 50-60 مىڭ تابىس تاباتىن التۋريستەر جۇمىس اتقارادى. ءبىزدىڭ بار تابىسىمىز جالعا العان كەڭسەنىڭ اقىسىن تولەۋ مەن باسپا جۇمىسىنا كەتەدى. رەداكسيانىڭ جەكە قىزمەتتىك كولىگى دە جوق، ال گازەتتىڭ «باس وقىرمانى» ەرمۇرات باپي كەي-كەزدەرى قىزمەتكەرلەر ءۇشىن «شوپىر بالا» بولىپ جۇمىس ىستەيدى. ەگەر DAT وتەمۇراتوۆتىڭ جەكە مەنشىگى بولسا، مۇنداي ماسەلەلەردىڭ تۋىنداۋىنا جول بەرمەس ەدى، ءتىپتى قىزمەتكەرلەردىڭ ايلىعى 300 مىڭعا دەيىن جەتەر ەدى. الايدا، ءبىز وكىنبەيمىز. باستىسى، گازەت جۇمىسىن جالعاستىرۋدا جانە سۇرانىسقا يە».

سونداي-اق، «جاس الاش» جايىندا دا ايتىپ ءوتتى. رەداكسيانىڭ ايتۋىنشا، «فەرعانا» ەكى قاراعايدىڭ اراسىندا اداسىپ كەتكەن سەكىلدى. «جاس الاشتى» قارجىلاندىراتىن ازاماتتار دەپ بىرەسە «اتامەكەن» ۇلتتىق كاسىپكەرلەر پالاتاسىنىڭ ءتوراعاسى تيمۋر قۇلىبايەۆتى، بىرەسە ق ر ءماجىلىس پارلامەنتىنىڭ سپيكەرى نۇرلان ءنىعماتۋلليندى ايتقان.

تاعى ءبىر ايتا كەتەرلىك جاعداي، قازتاگ حاا-نى تيمۋر قۇلىبايەۆتىڭ باقىلاۋىندا دەپتى. تەك ماسەلە مىندا: قۇلىبايەۆ ەلىمىزدەگى ەڭ اينالمالى حالىقارالىق اگەنتتىككە قاشان قول سۇعىپ ۇلگەرگەن؟ ونىڭ ناعىز يەسى سەيىتقازى ماتايەۆتى بيلىك تۇرمەگە توعىتقان سوڭ با؟

ەڭ ۇلكەن كۇدىك تۋدىرعانى «Abai.kz» ينتەرنەت-پورتالىن تيمۋر قۇلىبايەۆتىڭ باقىلاۋىنداعى باسىلىمداردىڭ تىزىمىنە ەنگىزىپ قويعانى. ول باسىلىمنىڭ تاۋەلسىز ساراپشىسى، جۋرناليست، التىنبەك سارسەنبەكوۆتىڭ سەرىكتەسى ايدوس سىرىم تيمۋر اسقار ۇلىنىڭ قولىنا قاراپ قالدى دەپ ويلامايمىن.

قورىتىندىلاي كەلە، «فەرعانا» ساراپشىلارىنىڭ ساراپتاماسىنان گورى، نيلس بوردىڭ ايتقانى شىندىققا جاناسادى.

دايىنداعان: جۇمابيكە ءجۇنىسوۆا

اۋدارعان: گۇلىم جاقان